Zgjerimi 12 milje, MPJ e Greqisë: Sot hyn në fuqi Dekreti presidencial!

Sot ka hyrë në fuqi Dekreti presidencial i Greqisë për zgjerimin me 12 milje në Detin Jon. Lajmin e bënë të ditur Ministra e Punëve të Jashtme e Greqisë duke saktësuar se Dekreti është publikuar sot në Fletoren Zyrtare.

“Me publikimin në Fletoren Zyrtare sot hyn në fuqi dekreti presidencial mbi mbylljen e gjireve dhe ndërtimin e vijave bazë në rajonin e Detit Jon dhe Ishujt e Jon deri në Kepin Tenaro në Peloponez.

Dekreti Presidencial përputhet me zbatimin e rregullores së ratifikuar të Konventës së OKB-së viti 1982 mbi të Drejtën e Detit. Ky dekret përbën një hap të domosdoshëm për procesin e zgjerimit të zonës bregdetare të vendit në rajonin përkatës, akt i cili, sipas Konventës, është një e drejtë e padiskutueshme e vendit.

Dekreti i Presidentit thekson se Greqia rezervon të drejtën të ushtrojë të drejtat e saj përkatëse në rajonet e tjera të territorit të saj, siç ato rrjedhojnë nga Konventa për të Drejtën e Detit, që pasqyron të drejtën tipike ndërkombëtare.

Greqia e përkushtuar në mbrojtjen e të Drejtës Ndërkombëtare, përfshi të Drejtën e Detit, vepron në mënyrë rigoroze në përputhje me ligjet ndërkombëtare, ” thuhet në deklaratën e Ministrisë së Punëve të Jashtme të Greqisë për hyrjen në fuqi të Dekretit presidencial për mbylljen e gjireve dhe përcaktimin e vijave bazë në rajonin e Detit Jon dhe Ishujve të Jonit deri në Kepin Tenaro në Peloponez.

Tashmë ky Dekret dhe Marrëveshje tjera nëse ka, pritet të jenë lëndë për shqyrtim në Gjykatën Ndërkombëtare të Drejtësisë në Hagë, për përcaktimi e vijave bazë në rajonin e Detit Jon dhe mbylljen e gjireve, si dhe zgjerimin e ujërave territoriale në Detin Jon.

Kryeministri Edi Rama, i cili në opozitë ka kundërshtuar Marrëveshjen me Greqinë në vitin 2009 dhe e bëri nul përmes Gjykatës Kushtetuese ndërsa e kundërshtoi dhe Gjykatën e Hagës, tani si i pari i qeverisë ka bërë të ditur se për zgjidhjen e mosmarrëveshjeve mes dy vendeve, është rënë dakord gjatë vizitës së ministrit të Jashtëm, Nikos Dendias, në Tiranë, se të dyja vendet do t’i drejtohen Gjykatës Ndërkombëtare të Hagës për çështjen e kufirit detar dhe Zonave Ekskluzive Ekonomike.

E meqë viti 2009 është në shekullin XXI, ashtu si dhe viti 2020, Kryeministri Edi Rama thotë se në mes të Europës nuk mund të “shiten” e “blihen” dot dete e territore as fshehurazi, as haptazi nga asnjë autoritet i veçantë!

“Këto mund të ndodhin vetëm në batakun e ligësisë e të injorancës,ku llumi i shqiptarisë gjen shesh për përsheshin e tij!”

I ligu, injoranti dhe llumi i shqiptarisë

Pa u deklaruar Athina zyrtare, dje Kryeministri Edi Rama u irritua kur raportua për një shkrim të gazetës greke “To Protothema” e cila fliste për Dekretin presidencial dhe zgjerimin prej 12 miljeve.

Mediat që raportuan dhe politika që citoi këto raporte i cilësoi si llum nacional-folklorik, pa din e pa iman:

“Llumi nacional-folklorik i politikës shqiptare pa kufij, pa din e iman, është derdhur sërish në oqeanin digjital përmes shpifjes së madhe të “shitjes së detit” Greqisë! Këtë marrëzi ekstreme për përfitime politike mund ta besojnë vetëm ata që s’duan të dëgjojnë e as të kuptojnë!” thotë Edi Rama për të gjithë ata që lexojnë, interesohen dhe lexojnë për atdheun e tyre pa i marrë leje atij!

Dhe i kthehet trofeut të vitit 2009 që i dhuruan zaganjorët, kohë kur Edi Rama ishte në opozitë dhe e kishte të qartë se deputetët e tij do ta votojnë Marrëveshjen e Saliut, dhe me 2/3 do të konfirmoheshin 6 miljet e dakordësuara ashtu siç do të konfirmohej në Gjykatën e Hagës.

Tani si Kryeministër Edi Rama thotë:

“Pas rrëzimit të marrëveshjes famëkeqe të 2009 dhe mosmarrëveshjes që pasoi, ne kemi arritur më në fund dakordësinë me palën greke që delimitimin e kufirit tonë detar ta çojmë në Gjykatën Ndërkombëtare! Shtrirja 12 milje e Greqisë në Jon s’ka lidhje me zonën joniane mes nesh!”

Dhe, pas rrëzimit të marrëveshjes famëkeqe të vitit 2009, ku “Saliu i falte grekut 6 milje” dhe nuk kishte transparencë, sot Edi Rama na thotë se drejta e 12 miljeve ushtrohet aty ku është e mundur, dhe shqiptarët jo që nuk shohin transparencë por informohen nga greku:

“E drejta e 12 miljeve ushtrohet aty ku është e mundur dhe jo aty ku s’ka mundësi, siç është rasti në zonën mes nesh ku vija ndarëse do të vendoset me gjyq! Greqia e ka ushtruar këtë të drejtë së fundmi, fiks siç e ka ushtruar Shqipëria qysh në vitin 1990! Të tjerat janë dokrra!”

Që janë dokrra të gjithë e dinë, madje edhe këto që i thotë vetë Edi Rama ashtu si dhe dokumentat që servir:

Nuk dihet nëse i ka lexu ndonjëri nga kabnieti i tij këto dokumenta por është e qartë se Edi Rama jo sepse dokumenti i radhës konfirmon se Kryeministri mashtron! Këtu qartë thuhet se ujërat shtrihen 12 milje ndërkohë dokumenti i radhës konfirmon se Shqipëria i shtrin ujërat në 15 milje:

Ndërkohë atë në gjuhën angleze të vitit 1990, le ta lexoj vetë Edi Rama dhe mashtruesi i tij, Ditmir Bushati, nga marrëveshja e të cilit me Kotzias, deti shqiptarë shpëtoi falë mburrjes së mediave greke.

Se kush është i ligu, injoranti dhe llumi i shqiptarisë është e qartë ndërsa reagoi edhe Partia Demokratike përmes një deklarate duke kërkuar transparencë në lidhje me këtë çështje:

Deklaratë:

Partia Demokratike e Shqipërisë ka ndjekur me vëmendje dhe shqetësim të gjitha zhvillimet lidhur me ecurinë e marrëveshjes së delimitimit të hapësirave detare ndërmjet Republikës së Shqipërisë dhe Republikës së Greqisë.

Partia Demokratike shpreh shqetësimin e saj lidhur me heshtjen dhe mungesën e transparencës së qeverisë ndaj zhvillimeve të fundit sa i përket Dekretimit të zgjerimit të Ujërave Territoriale Greke.

Të gjendur përballë një situate ku Republika Helenike ka deklaruar shtrirjen e ujërave të veta territoriale deri ne 12 milje është krejt legjitime që çdo qytetar shqiptar t’i drejtojë këto pyetje Qeverisë Shqiptare:

1. Përse qeveria shqiptare nuk ka bërë asnjë transparencë në lidhje me negociatat për ndarjen e kufijve ujorë me Greqinë, megjithëse negociatat për këtë qëllim kanë ri-filluar që më 2013?
2. Cilët janë elementët që janë negociuar, ne lidhje me çfarë është rënë dakord dhe çfarë nuk është rënë dakord?
3. A është diskutuar ndonjëherë në këto negociata ideja që qeveria greke t’i shtrinte ujërat e veta territoriale nga 6 ne 12 milje? Nëse po cili ka qenë qëndrimi i qeverisë shqiptare në këtë pikë?
4. A e vendos Shqipërinë kjo shtrirje nga pala greke e detit territorial në 12 milje, në një pozitë më pak të favorshme negociuese?
5. A ka analizuar qeveria shqiptare pasojat juridike dhe të tjera të kësaj shtrirjeje për të cilën mediat kanë raportuar prej kohësh?
6. Nese ky zgjerim e vendos Shqipërinë në një pozitë më pak të favorshme, a duhet që qeveria shqiptare të paraqesë rezervat e saj lidhur me këtë zgjerim si dhe me aspekte të tjera që përkeqësojnë pozitat e Shqipërisë.

Partia Demokratike e Shqipërisë është krejtësisht e angazhuar në respektimn e të Drejtës Detare Ndërkombëtare, të Konventës së OKB mbi të Drejtën e Detit të Montego Bay të vitit 1982, të respektimit të të drejtave të të gjitha palëve dhe mbrojtjes së të drejtave të Republikës së Shqipërisë në përfitimin e të gjitha atyre hapësirave detare që me të drejtën ndërkombëtare i përkasin Republikës së Shqipërisë.

Partia Demokratike i bën thirrje qeverisë, të bëjë transaparencë të plotë mbi çdo veprim apo mosveprim të saj në dëm të interesave të vendit, dhe garanton çdo qytetar shqiptar se nesër në pushtet do të luftojë me forcën e ligjit, në respektim të Vendimit të Gjykatës Kushtetuese, me ekspertizën më të mirë kombëtare e ndërkombëtare, për të mbrojtur interesat legjitime të Republikës së Shqipërisë.