Zgjerohet harta e të infektuarëve/ Thirrje Qeverisë, Basha: Ndryshoni strategjinë e testimeve për COVID-19!
Kur të dhënat e fundit tregojnë se harta e të infektuarve është zgjeruar, siç ishte rasti i Kukësit dhe Mallakastrës, Kryetari i Partisë Demokratike, Lulzim Basha, vlerëson dhe i bënë thirrje qeverisë që të ndryshojë strategjinë e testimeve me COVID-19, duke bërë të mundur identifikimin e saktë të rasteve
“Të dhënat e fundit tregojnë një zgjerim të hartës së të infektuarve, në Kukës dhe Mallakastër. Sot kemi 6 anëtarë të personelit mjekësor të infektuar. Kjo sjell vëmendje të rritjes së testimit.
Duke nisur me testimin e stafeve mjekësore dhe me punonjësit e vijës së parë, të policisë, të Forcave të Armatosura, të administratës, furnitorët, njerëz që punojnë në shërbim të tregtisë. Testim dhe prekja e situatës në thellësinë e saj do të na japë shifra të sakta dhe përhapjen e vërtetë të infeksionit.
Në besimin tonë, testimi nuk po bëhet në masën e duhur. Kërkesës tonë për testimin i janë bashkangjitur edhe zëra të ekspertëve kombëtarë, dhe zëra të maxhorancës, ndaj përsëris sot, që të ndryshohet strategjia për testimin.
Nëse ne prekim sipërfaqen e problemin, majën e ajsbergut, do ta kemi të vështirë që të drejtojmë vendin drejt hapjes, që t’i japim fund qëndrimit në shtëpi dhe mbylljes në ekonomi,” tha Lulzim Basha duke e quajtur të pamundur që njerëzit të mbahen në shtëpi pa plan.
“Sa i përket pasojave që kjo ka te qytetarët dhe stafet mjekësore, nëse ne lejojmë infektimin e mjekëve dhe infermierëve, ne dobësojmë vijën mbrojtëse që ka shoqëria. Prioritet absolut duhet të jetë zbulimi i infeksionit, gjurmimi i kontakteve.
Ndaj kërkesa jonë është që në bazë të ligjeve në futi të normohen përmes VKM, për të bërë të mundur gjurmimin edhe izolimin e infeksionit, pa të cilin karantina s’do të ketë kuptim. Ky proces kërkon protokolle të qarta nga njerëzit në terren. Dua të përsëris dhe një herë thirrjen për pajisje mbrojtëse për personelin mjekësor.”
Beteja, natyrisht, është me virusin. Beteja është me pasojat e virusit. Beteja nuk është me njerëzit, thotë Kryetari i PD, Lulzim Basha, duke shtuar se virusi luftohet e njerëzit ndihmohen por Qeveria nuk po bën mjaftueshëm dhe shpesh po lë përshtypjen sikur po lufton njerëzit.
“Propozimet janë sporadike, janë të pastudiuara dhe efekti për të parandaluar rënien në ekonominë e gjithësecilit dhe në ekonominë kombëtare, eshtë, deri më tani, pothuajse i pandjeshëm,” tha lideri i opozitës duke vlerësuar se këto masa janë një seri masash dhe jo një plan as për daljen nga kriza dhe as për përballjen me sukses të plotë të pasojave të krizës.
“Akoma nuk e dimë, nëse qeveria ka një plan të tillë, nëse ka një strategji për daljen nga karantina, për sistemin shëndetësor, për testimet, për periudhën e tranzicionit derisa të gjendet vaksina. Nëse e ka, i përsëris thirrjen, për herë të dytë brenda 24 orëve, që ta bëjë atë publik. Transparenca mbetet një problem i madh.”
Të gjithë përpiqemi të analizojmë mbi fakte gjysmake, tha Kryetari i Partisë Demokratike, sepse nuk thuhet e vërteta. Ka një frikë nga shifrat, ka një frikë nga e vërteta. Por ka, po kështu, një shprehje, “vetëm e vërteta do të na çlirojë.”
“Vendi ka nevojë për një plan dhe për një strategji që do t’u mundësojë njerëzve të kapërcejnë këtë krizë ekonomikë dhe t’i kthehen sërish punës, aty ku munden, normalitetit apo shanseve dhe mundësive për normalitet. Pa planin e duhur, njerëzit do të vazhdojnë të gjenden për një kohë të gjatë në këtë situatë dhe ekonomia jonë e brishtë do të vazhdojë të fundoset,” tha Kryetari i Partisë Demokratike, Lulzim Basha, duke përfunduar:
Ia kam kërkuar dhe ia përsëris këtë kërkesë kryeministrit publikisht, të nisë urgjentisht ndihmën financiare për njerëzit, të ndryshojë buxhetin dhe të rrisë fondin e emergjencës, sepse akoma nuk jemi as në nivelin e Kosovës.
Koha nuk pret!
