Zgjidhja e Krizës, Basha: Gati për proces politik, por me ndihmën e…

Një ditë pas marshimit të lirisë, demokracisë dhe kundër dhunës qeveritare, Kryetari i PD, Lulzim Basha, tha se ka marrë mesazhe nga ndërkombëtarët, dhe se e mirëpret angazhimin e tyre për të zgjidhur krizën politike në vend, ndërsa ka shtuar se PD dhe opozita janë gati të përfshihen në një proces politik me ndihmën e ndërkombëtarëve, dhe largimi i Edi Ramës është çelësi që i hap rrugën këtij procesi politik, një qeveri tranzitore me detyra të përcaktuara qartë.

“Ky ishte një mesazh kombëtar, i qartë dhe i prerë për këdo e në veçanti për pengmarrësin e Shqipërisë, demokracisë, e drejtësisë, për pengmarrësin e familjeve shqiptare, për njeriun që ka bllokuar derën e hapjes së negociatave, derën për të hyrë në Bashkimin Europian, se nuk ka dhe nuk do të ketë asnjë hap pas. Do të ketë vetëm hapa para.“

Bashkimi ynë, tha Lulzim Basha, ka marrë përmasa që i tejkalojnë kufijtë politikë të mbështetësve të opozitës, është një bashkim popullor.

“Kjo që kemi nisur është një betejë për të transformuar Shqipërinë. Nuk është një betejë për pushtet politik, nuk është një betejë për partitë politike. Dhe ky transformim nis me rikthimin e votës së lirë.

Kjo pjesëmarrje madhështore dëshmoi besimin e madh që qytetarët kanë tek kauza e zgjedhjeve të lira dhe të ndershme, tek kauza e vendosmërisë tonë të hekurt për të mos lejuar rikthimin e një regjimi monist, kësaj radhe jo mbi ideologji, por mbi bashkëpunimin me krimin e organizuar.”

Me këtë rast, lideri i opozitës garantoi se fatin e Shqipërisë nuk do ta lënë në duart e qeverisë së lidhur me krimin, nuk do ta lënë në duart e oligarkëve të babëzitur, grabitqarë dhe të korruptuar, nuk do ta lëmë në duar të një njeriu që ka marrë peng zgjedhjet, ka marrë peng parlamentin, ka marrë peng qeverinë, ka marrë peng të ardhmen e shqiptarëve dhe të vogëlushëve të tyre.

“Mesazhi ynë i dytë është për ata dhjetëra të shoqëruar të protestës së ditës së shtunë që i bashkohen grupit të arrestuarve të protestave të tjera, dhe dua t’ju them fare qart: vëllezër dhe motra, nuk jeni vetëm, sakrifica juaj për demokraci është shënuar jo thjesht në kujtesën e Partisë Demokratike dhe partive të tjera të opozitës, maxhorancës së re politike, numerike dhe morale në vend por në kujtesën dhe në mirënjohjen e çdo qytetari shqiptar. Ju jeni sot të burgosur politikë të një regjimi monist që i ka ardhur fundi. Ju siguroj se çdo e drejtë e dhunuar e juaja do të vihet në vend në të gjitha aspektet ligjore, ju siguroj se dhunuesit tuaj do të vendosen para përgjegjësisë,” tha Basha duke nisur me pinjollin e diktaturës dhe babain e nënkryetarit të FRESSH, i cili, sot, pas fjalës së Edi Ramës që vazhdon të kërcënojë me burg e mendon se me kërcënime mendon se do ta zgjasë dhe do ta mbajë pushtetin, mbajti nën arrest 19 protestues, 19 të tjerë të burgosur politikë. “Këtij palogjyqtari, këtij pseudogjyqtari politik i them që asgjë nuk do të të shpëtojë nga shkelja flagrante e ligjit dhe bindja e verbër ndaj urdhërave politikë.”

Dhe jo vetëm kaq! Ai siguroi edhe shqiptarët:

“Nuk do ta lëmë drejtësinë dhe as reformën në drejtësi të përfundojë siç ka përfunduar aktualisht, në një sebep për ti dhënë në dorë Edi Ramës të gjitha veglat, sikurse janë Prokuroria, gjykatat, shkatërrimin e Gjykatës Kushtetuese; se kjo do të marrë fund shumë shpejt dhe se kjo është një nga qëllimet kryesore të betejës, për të ndarë dhe balancuar pushtetet siç është në Europë. Sepse pushteti të korrupton dhe pushteti absolut korrupton në mënyrë absolute. Dhe kjo është arsyeja përse kemi kryeministrin jo thjesht më të paaftë, më të dështuar, më mashtrues, por edhe më të korruptuar dhe të inkriminuar të Europës.”

Por kemi po kështu edhe një kryeministër në ikje, të delegjitimuar faqe gjithë shqiptarëve, faqe komunitetit ndërkombëtar. Mesazhet e partnerëve tanë europianë dhe euroatlantikë, tha Lulzim Basha, janë të qartë:

-Europa thotë fut në burg hajdutët, ky fut në burg qytetarët.

-Ata thonë ndëshko dhunuesit e zgjedhjeve, ky dhunon dhe godet opozitën.

-Ata thonë nuk ka demokraci pa opozitë, ky bëhet gati për një proces fallco dhe mendon se mund ta çojë deri në fund.

-Ata thonë se qeveria është e lidhur me krimin, ky ka në krah më fundërrinat e këtij vendi dhe i mbron dhe i promovon.

-Ata thonë mos shemb Teatrin Kombëtar, ky  guxon projektin e hajdutërisë.

-Ata i thonë nuk e hapim derën me hajdutët në pushtet, nuk e hapim derën pa ndëshkuar vjedhësit e votave, ky i afron edhe më shuëm i gradon, i bën anëtarë të Task Forcës elektorale, kryetarë të fushatës elektorale.

-Europa thotë me dokumente zyrtare nuk helmohet populli me gaz, ky iu rreh shpatullat gangsterëve me uniformë.

-Europa thotë nuk ka shtet europian pa drejtësi, ky zhduku gjykatat dhe qeverisë me fermanin e tij.

“Ndërkohë gjatë 24 orëve të fundit përmes kontakteve të drejtpërdrejta dhe telefonike jam njohur me angazhimin e miqve dhe partnerëve tanë strategjikë për të ndihmuar, për të dalë nga kjo krizë e thellë, për të ndihmuar Shqipërinë të dalë nga kjo krizë e thellë politike, kushtetuese e cila ka shkaktuar këtë krizë të thellë ekonomike dhe sociale në vend dhe ka destabilizuar vendin.Ndërkohë që shkaktari i kësaj krize, nuk është majftuar me kaq por vazhdon në fshehtësi të përpiqet që këtë destabilizim ta shtrijë edhe përtej në rajon,” tha lideri i opozitës duke e bërë të ditur se i ka komunikuar atyre se e mirëpret angazhimin e tyre për zgjidhjen e krizës politke në vend.

“Partia Demokratike dhe opozita kanë qenë dhe janë gati të përfshihen në një proces të vërtetë politikë me ndihmën e partnerëve tanë ndërkombëtarë për të zgjidhur këtë krizë dhe për t’i kthyer shqiptarëve sovranitetin e vjedhur dhe institucionet dhe proceset politike të marra peng nga një qeveri ilegjitime dhe një parlament ilegjitim, produkt i bashkëpunimit të krimit të organizuar me kupolën aktuale në pushtet.”

Largimi i Edi Ramës është çelësi që i hap rrugën këtij procesi politik, tha Kryetari i Partisë Demokratike, duke sqaruar se një qeveri tranzitore me detyra të përcaktuara qartë sa i takon opozitës, sa na takon ne, dhe të gatshëm për të diskutuar edhe mbi detyra dhe aspekte të tjera të reformave të thella kushtetuese dhe zgjedhore që do të bëjën të mundur që kurrë më asnjë forcë politike, asnjë kupolë njerëzish me pushtet, të mos kenë mundësinë të marrin peng vendin duke marrë peng zgjedhjet, përmes bashkëpunimit me kriminelët, përmes grabitjes së pasurive të vendit me një grusht oligarkësh. Pra, të krijojnë një Shqipëri të pakicës absolute që sundon mbi shumicën absolute.

“Ky është synimi im: T’i japim fund këtij aparteidi, një Shqipëri të tërë të përjashtuar nga mirëqenia, nga liria, nga barazia para ligjit, nga siguria, duke i dhënë fund një pakice që ka marrë peng vendin përmes pushtetit të fituar jo thjesht në tavolinë por të fituar me dhunën, kërcënimin, shitblerjen e votave në bashkëpunim me krimin e organizuar.”

Ndaj, të frymëzuar nga përgjigja e jashtëzakonshme e qytetarëve, në dy protesta masive kombëtare, njëra pas tjetrës, në harkun e 48 orëve, Kryetari i Partisë Demokratike,Lulzim Basha, i bëri thirrje të gjithë bashkëqytetarëve të vazhdojnë të qendrojnë së bashku, në betejën për liri dhe demokraci, për Shqipërinë si e gjithë Evropa, duke e bërë të ditur në fund:

“Nesër kam thirrur forumet më të larta të Partisë Demokratike dhe një konsultë të të gjithë koalicionit të bashkuar të opozitës, për axhendën e aksionit politik dhe protestave të qytetarëve të bashkuar. Ky është momenti për të intensifikuar dhe për të vazhduar me vendosmëri betejën tonë. Kam marrë me mijëra mesazhe, entuziazmi, optimizmi, përgëzimi, nuk më takojnë mua, ju takojnë gjithësecilit prej jush, aksionerë në këtë betejë, ju takojnë gjithë qytetarëve shqiptarë që do të jenë gjithësecili aksionerë të demokracisë dhe lirisë së re që do të lindë nga kjo betejë.

Bashkëbisedimi me gazetarët

Pyetje: Ju sapo thatë se e mirëprisni ndërhyrjen e ndërkombëtarëve për zgjidhjen e krizës, por ndërkombëtarët kanë kërkuar një dialog pa kushte, dialog pa kushte të cilin e ofroi sot edhe Edi Rama, i cili tha se ju konsideron ende si mikun e tij. Ju a jeni të gatshëm të dialogoni pa kushte me Edi Ramën? Nëse jo, çfarë jeni i gatshëm të ofroni për zgjidhjen e krizës politike?

Basha: Nuk kam qenë asnjëherë miku i Edi Ramës, kështuqë kursejani vetes tuaj ironinë. Edi Rama i ka zgjedhur miqtë e tij, disa prej tyre janë kriminelë të dënuar, disa janë kriminelë që i kanë shpëtuar dënimit, disa janë oligarkë, disa janë pronarë mediash, disa e shfaqin miqësinë hapur, marrin edhe favore nga Edi Rama, disa e bëjnë natën vonë miqësinë, edhe aty marrin favore. Por këta janë miqtë e Edi Ramës, kurrë jo Lulzim Basha.

Megjithatë kjo s’është midis meje dhe tij, kjo s’është një betejë mes dy personave. E thashë herën e fundit që ishim këtu, përballjen me njëri-tjetrin unë e kam fituar me të. Nuk jam nisë të mund një njeri, aq më shumë një njeri që e ka mundë zullumi i tij, e ka mundë varfëria e shqiptarëve, e kanë mundë mashtrimet me të cilat erdhi në pushtet herën e parë dhe krimi me të cilin erdhi në pushtet dhe mbajti pushtetin përsëri në 2017-n, e ka mundur arroganca, e ka mundë hajdutëria. Kjo betejë bëhet pikërisht që shqiptarët të mos jenë të detyruar të zgjedhin midis një njeriu të lidhur me krimin dhe një njeriu tjetër, i cili mund të vijë në pushtet vetëm duke u lidhur me krimin. Por, duke eliminuar krimin nga procesi politik, për të rikthyer procesin politik, dhe duke ju dhënë mundësinë qytetarëve të zgjedhin sipas ofertave politike të partive politike. Që kjo të ndodhë, është e padiskutueshme që Edi Rama nuk mund të jetë kryeministër kujdestar i një procesi tjetër zgjedhor, pasi është kapur nga prokuroria, duke vjedhur 3 palë zgjedhje. Përdhunuesi serial i zgjedhjeve të shqiptarëve nuk mund të jetë mbikëqyrësi i zgjedhjeve të ardhshme. Kjo është e prerë, e padiskutueshme, e panegociueshme. Dhe këtë ju e dini fare mirë. Edhe socialisti më i thekur 24 karat, nuk do të besonte, se të pranosh të bësh zgjedhje me Edi Ramën është një zgjidhje parimore e krizës, por do të pyeste: çfarë të dha, si të bleu? Asnjë shqiptar nuk beson më se mund të ketë zgjedhje me Edi Ramën. Nuk është thjesht dhe vetëm bindja e Lulzim Bashës, e Partisë Demokratike, e opozitës së bashkuar. Nuk ka njeri në Shqipëri të besojë se me Edi Ramën kryeministër mund të ketë një proces të lirë zgjedhor.

Tani dua të them diçka tjetër. Në Evropë për të gjitha këto që kanë ndodhur, për gjithë këto skandale, Edi Rama jo vetëm s’do tëishte kryeministër, por do të ishte para drejtësisëdhe, me gjasa, i dënuar.

Opozita nuk kërkon pushtet në tavolinë.

Kjo është arsyeja pse kemi paraqitur zgjidhjen më të drejtë politike. Nuk i kemi kërkuar as drejtësisë ta çojë në burg dhe as Partisë Socialiste ta heqë, por me Edi Ramën kryeministër nuk ka dhe nuk do të ketë asnjë proces politik dhe zgjedhor. Vetëm largimi i Edi Ramës i hap rrugë një procesi politik.

Thënë kjo, ndryshe nga sa deklaroi ai sot, ku, qartësisht, hodhi poshtë oferta të bëra publike, por, me siguri, dhe të tjera, për një angazhim të faktorit ndërkombëtar, Partia Demokratike dhe opozita e bashkuar mbeten të gatshëm dhe mirëpresin çdo angazhim të faktorit ndërkombëtar për të zgjidhur këtë krizë të thellë, sepse kjo krizë vetëm sa do të thellohet, nëse lihet në dorë të një njeriu, interesat e të cilit, papërgjegjshmëria e të cilit mund ta çojë vendin në një krizë edhe më të thellë, në një konfrontim edhe më të thellë. Pse? Për të vazhduar për të mbajtur karrigen, për të vazhduar për të mbajtur Shqipërinë peng të aferave të tij korruptive dhe të lidhjeve të tij kriminale.

Ndaj rruga që kemi përpara është fare e qartë. Ne do të vazhdojmë me qytetarët shqiptarë aksionin dhe axhendën tonë opozitare, ku padyshim ndërthuren, siç janë ndërthurur, protestat më të fuqishme që ka parë Shqipëria në dekada, me ofertën tonë, si politike, qeveria tranzitore, dekriminalizimi i zgjedhjeve, reforma e thellë zgjedhore, por edhe po kështu me vizionin tonë për të ndërtuar një Shqipëri me ekonomi të fortë, me shëndetësi dhe arsim për të gjithë, me liri dhe mundësi e mirëqenie për të gjithë shqiptarët. Do ta bëjmë këtë siç e kemi bërë për arsimin, për shëndetësinë, për sipërmarrjen, për fermerët, për studentët, për pedagogët, për pensionistët, për shtresat në nevojë, ndërkohë që do të vazhdojmë fuqimisht aksionin tonë politik.

Zgjedhje të diktuara nga krimi, zgjedhje fallco, zgjedhje të marra peng nga një kryeministër që ka marrë peng Shqipërinë me krimin e organizuar, nuk do të ketë më në Shqipëri. Koha e hajdutëve të zgjedhjeve, koha e kriminelëve, që diktojnë deputetë e kryetarë bashkish ka mbaruar. Ky është mesazh i qartë që sot kumbon nga çdo cep i Shqipërisë dhe nga çdo protestë, që sa vjen e bëhet më e madhe dhe do të bëhet edhe më e madhe.

Pyetje: Në konferencën e sotme, zoti Rama u shpreh se zgjedhjet e 30 qershorit nuk mund të shtyhen për shkak se shkelet kushtetuta. A ka Partia Demokratike një mekanizëm ligjor si do të bëjë të mundur shtyrjen e zgjedhjeve lokale, nëse bihet dakord politikisht?

Basha: Kjo tregon se sa në panik dhe i dëshpëruar është. Sepse, shpresoj të mos jetë rrëgjuar deri në atë masë sa të mos kujtojë se vetë i ka shtyrë zgjedhjet lokale dy herë për çertifikatat në 2007-n. S’ka vend për ironi, jam i sigurtë se ju kujtohet. Pra, bie poshtë pretendimi se s’paska mekanizëm. Këto janë të gjitha justifikimet e fundit të një njeriu që ka humbur çdo lidhje me realitetin politik dhe realitetin e njerëzve të thjeshtë të këtij vendi, që është ngjitur pas karriges që e ka marrë peng me krimin e organizuar, dhe që thotë se nuk iki, se më kërcënojnë. Kush e kërcënon? Krimi i organizuar? Ka ndodhur edhe kjo. Njihen edhe precedentë të tillë. Por kjo është një arsye më shumë që të largohet. Dhe jam i sigurtë se një republikë e çliruar nga krimi ka mënyrat për ta vënë në mbrojtje, sepse nëqoftëse krimi i organizuar e kërcënon të mos lërë karrigen, imaagjino se çfarë i ndodh qytetarëve të thjeshtë nga krimi i organizuar. Kërcënimi i kryeministrit nga krimi i organizuar, pavarësisht se kjo vjen ngaqë ka lidhur një pakt me ta për zgjedhjet, siç tregohet qartë nga dosja 339 dhe mijëra orë të pazbardhura përgjimesh. Ky nuk është thjeshtë problem personal i tij. Kjo është një arsye më shumë se pse duhet të largohet një orë e më parë. Një kryeministër i marrë peng nga krimi, duhet të largohet një orë e më parë.

Ndonëse, unë besoj se më shumë se i kërcënuar nga krimi, ai vazhdon të jetë në bashkëpunim të hapur me krimin, çka e provon dhe lista që u ka servirur socialistëve. Njerëz të diktuar nga krimi.

Kandidati i Shijakut, i diktuar nga Avdylajt dhe Keçajt.

Shumë shpejt do të dalin provat dhe për këtë. Po marr vetëm një shembull, kandidatë të tjerë, njerëz me dosje kriminale. Kandidatja e Durrësit, e diktuar drejtëpërdrejtë nga njeriu që e mban peng dhe që është arsyeja se pse nuk hetohet “dosja 339”, Vangjush Dako.

Do të kemi kohë t’i marrim një nga një për të treguar se si, lista e kandidatëve të Partisë Socialiste, është pasqyra e bashkëpunimit kriminal të Edi Ramës, që vazhdon sot e gjithë ditën me të gjithë ata që duhet të ishin para drejtësisë dhe prapa hekurave. Bosë të bandave kriminale, politikanë që bashkëpunojnë me ta. Në vend që të jenë prapa hekurave ata, prapa hekurave janë qytetarët që protestojnë për shtëpitë e tyre, për fëmijët e tyre, për lirinë dhe të drejtat e tyre themelore. Në vend që të jenë prapa hekurave, i merr dhe i promovon.

Shikoni se çfarë mesazhi pervers jep! Damian Gjiknuri, kreu i operacionit të vjedhjes së votave me Ymer Lalën në Dibër me 11 shtator 2016-të, në çdo vend të Europës do ishte duke vuajtur dënimin tashmë. E bën kryetar të Shtabit Elektoral. Kështu me rradhë të gjithë anëtarët e task forcës së tij elektorale!Kjo tregon më qartë se gjithçka tjetër, se pse është akut largimi i Edi Ramës, një orë e më parë. Me këtë njeri e keqja do shkojë thellë e më thellë.

Vetëm largimi i tij i hap rrugë një procesi politik, një qeverie tranzitore që do të kryejë detyrat, për t’ju garantuar shqiptarëve zgjedhje të lira e të ndershme. Detyra e parë të luftojë krimin e organizuar, detyra e dytë t’ja zgjidhë duart drejtësisë, të nisë e të përfundojë hetimi i “dosjes 339”, “dosjes 184”. Dhe detyrat e tjera që kanë të bëjnë me kartat e identitetit, me regjistrin e Gjendjes Civile, me regjistrin e adresave, çeshtje të cilat i kemi bërë të qarta. Këto janë detyra që kanë të bëjnë me ligjin actual.

Dhe së dyti, t’i hapë rrugë një procesi politik reformash të thella kushtetuese dhe zgjedhore, që të garantojmë që kurrë më mos të kthehemi në këtë stacion makthi për shqiptarët, ku 1 në 6 qytetarë është larguar nga vendi, pasi iu shkatërrua çdo mundësi për të ndërtuar jeten e tyre në këtë vend, dhe ku 83 përqind e shqiptarëve duan të largohen nga ky vend. i keni parë statistikat? Apo donin të largoheshin, sepse jam i bindur, që vlera numër 1 e kësaj që ka nisur me 16 shkurt me djegien e mandateve dhe me protestat popullore, është që i ka rikthyer shpresën çdo shqiptari, çdo shqiptari, pavarësisht bindjeve politike, se mund dhe do të ndërtojnë këtu në Shqipëri të ardhmen e tyre. Se mund ta çlirojnë fatin e tyre, nga ata që u janë bërë zotër në shtëpitë e tyre, në tavolinën e tyre të bukës, në ekranet e televizorëve, në shkollat e fëmijëve, në spitale, ta ndjejnë atë vetë zotër dhe jo një qeveri e dalë nga krimi dhe as kriminelët e oligarkët për të cilët ajo punon.

Pyetje: Pak më parë thatë se partnerët ndërkombëtarë kanë paraqitur disa formula për zgjidhjen e krizës…

Basha: Jo, jo Klajd. Të lutem, kam një merak të vetëm. S’kam qënë kurrë gazetar, porkam mësuar që në fillim se, kur citon dikë, duhet ta citosh tamam. Thashë se 24 orët e fundit, në kontaktet e mia direkte dhe indirekte, përmes telefonit, me përfaqësues të faktorit ndërkombëtar, është shprehur angazhimi i këtij faktori për të kontribuar për zgjidhjen e krizës dhe se e mirëpres këtë angazhim. Këtë thashë! Tani vazhdo me formulimin e pyetjes.

Pyetje: Partnerët ndërkombëtarë a kanë shprehur gatishmërinë për të negociuar mbi kërkesen tuaj që deri tani e quani të panegociueshme, largimin e kryeministrit Edi Rama dhe qenien në krye të qeverisë të një kryeministri tranzitor?

Basha: Në momentin që do të kemi një process të hapur negociatash, patjetër që do t’ju informoj për gjithçka. Për momentin, ajo që ju thashë është e qartë si drita e diellit. Partia Demokratike mirëpret çdo angazhim për të zgjidhur e krizën në këtë moment kritik për vendin. Por është e qartë për ne, se që të zgjidhet kriza nuk mund të jemi në fantazi, nuk mund të jemi në ëndërr.

Largimi i Edi Ramës është i panegociueshëm. Largimi i tij si kryeministër është i panegociueshëm.

Pyetje: Zoti Basha, ju nuk njihni Edi Ramën si kryeministër dhe e keni të panegociueshëm largimin e tij. Do jeni i gatshëm të uleni me Edi Ramën si kryetar i Partisë Socialiste dhe të nënshkruani një marrëveshje me ndërmjetësim të ndërkombëtarëve? Dhe a është një kapitull i mbyllur për PD-në data 30 qershor? Dmth në rast të arritjes së një marrëveshje, mund të kemi zgjedhje me 30 qershor me kandidatë të PD?

Basha: Për të gjithë ndjekësit e vëmendshëm të politikës, është e qartë se me 30 qershor asnjë qeveri nuk plotëson kushtet për zgjedhje të lira dhe të ndershme. Miliona karta identiteti janë të pavlefshme. Regjistri i zgjedhësve është, në pjesën më të madhe i vjetëruar, dhe një pjesë tjetër i manipuluar. Dhjetëra aspekte të tjera teknike kërkojnë kohë të nëvojshme, në mënyrë që të garantojnë edhe nga pikëpamja formale, një proces të rregullt zgjedhor. Pra, edhe nga pikëpamja formale, data 30 qershor është një datë e rrëzuar për një process të rregullt zgjedhor. Nga pikëpamja politike, padyshim që është e rrëzuar.

Kryetarin e Partisë Socialiste, nuk e zgjedh kryetari i Partisë Demokratike. Por procesi i zgjedhjeve të lira e të ndershme, përmes një qeverie tranzitore, mund dhe do të kalojë vetëm  nga një qeveri pa Edi Ramën kryeministër.

Pyetje: A mendoni se aksioni juaj opozitar është një precedent i rrezikshëm për vendin pasi mund të përsëritet nesër, kur ju mund të jeni në maxhorancë dhe PS në opozitë?

Basha: Shumë e thjeshtë përgjigja. E gjitha kjo po bëhet që të mos përsëriten më kriza të tilla. Nëqoftëse prapë do të kemi një qeveri që e merr pushtetin me krimin, që asgjeson Gjykatën Kushtetuese, asgjeson Gjykatën e Lartë, emëron në mënyrë të paligjshme Prokurorin e Përgjithshëm, zhytet në aferat më korruptive, 40 milion euro për 2 kilometra me kompani fallco, dhunon qytetarët dhe liritë e të drejtat e tyre, helmon fëmijët me gaz. Nëqoftëse do të kemi një qeveri të tillë, atëherë ky patjetër duhet të jetë precedent, që një fund i tillë e pret. Patjetër që po, dhe ju duhet ta festoni një precedent të tillë, ku më në fund populli ka fuqinë për ti thënë një grupi që ka marrë peng pushtetin, që jo, sovrani nuk je ti me Ymer Lalën. Sovrani jemi ne, ky vend është i yni. Çdo shqiptar duhet ta festojë një precedent të tillë.

Por, siç ju thashë, kjo nuk është një betejë për të ndërruar Edi Ramën me Lulzim Bashën. Shqipëria ka nevojë për një reform të thellë, që kurrë më, asnjë kryeministër i ardhshëm most ë jetë në gjendje të lidhë pakt me krimin për të marrë dhe mbajtur pushtetin, ti kthejë shpinën njerëzve, ta trajtojë gjithë Shqipërinë si çifligun e tij personal, dhe qytetarët si bujkrobërit e tij.

Kjo është sfida, ky është projekti, ky është objektivi, rreth të cilit kemi thirrur gjithë shqiptarët të na bashkohen dhe që po na bashkohen çdo ditë e më shumë, duke tejkaluar ngjyrat politike. Pse? Sepse e kuptojnë dhe po e kuptojnë, që në fund të kësaj beteje do të vendosin ata me votë. Do të vendosin ata që të emërojnë dhe të shkarkojnë qeveritë. Dhe në një ushtrim të tillë demokracie, do të marrë fund frika si instrument i qeverisjes, sepse qeverisja përmes frikës nuk është demokraci, është tirani.

Liria është kur qeveria ka frikë popullin. Pse? Sepse është populli që e emëron, është populli që e shkarkon.Tirania është kur populli e ka frikë qeverinë!Ku jemi sot? Jemi në kushtet e tiranisë. Pse nuk e ka qeveria frikë popullin? Sepse e ka lidhur kontratën me krimin. Apo më mirë të themi; pse nuk e kishte? Sepse orët kur populli ulte kokën dhe Edi Rama bënte njëherë të fortin, njëherë gastorin, kanë marrë fund. E tregon dhe paniku i tij i përditshëm.

Këto janë orë shprese, këto janë ditë shprese, janë ditët kur shqiptarët janë vetëdijësuar që fatin e tyre e kanë në dorë vetë ata. Që një grusht njerëzish nuk mund ti sjellë vërdallë, ti vjedhë, ti shpunësojë, t’ju vendosë taksa si të dojë, t’ju rrisë çmimin e energjisë, naftës. T’ju premtojë vende pune dhe ti shpunësojë pastaj. T’ju premtojë shëndetësi falas e ta shkatërrojë shëndetësinë pastaj. e kanë ata, e kanë qytetarët fatin e tyre në dorë.

Ky është standardi që ne do të vendosim. Në këtë standard, çdokush do të mendohet dy herë, para se t’i vërë shkelmin sovranit, para se t’i vjedhë votën.

Prandaj, meqë e quajte precedent dhe nëse e quan precedent, duhet ta festosh këtë precedent, do ta celebrosh, do ta hapësh fjalën kudo, që në Shqipëri po vendoset, më në fund,një precedent që e bëri Europën Europë dhe Amerikën Amerikë. Që ata që vjedhin votat, ata që kapin të gjitha pushtetet, ata që lidhin paktin me krimin, ata nuk do të gëzojnë pushtet, por do të largohendhe do të vendosen para drejtësisë.

Para se të jetë precedent, ky është standard europian. Ky është standard amerikan,Dhe nëse do ta quajmë precedent, është precedent europian, është precedent perendimor. Po, një qeveri që bën gjithë këto zullume, duhet të largohet. Do të ishte larguar me dhjetra herë në çdo vend normal europian. Dhe kjo do ntë largohet, nuk ka rrugë tjetër.

Pyetje: A mendoni se Presidenti ka hapësira ligjore për të shtyrë me dekret, datën e zgjedhjeve dhe për të caktuar një datë të re?

Basha: Nuk dua,Elda ,të futem në çeshtje të cilat mund të pyesni Presidentin apo këshilltarët e Presidentit. Natyrisht, ne kemi gjykimet tona, por nuk dua ta bëj këtë pjesë të kësaj konference. Kërkoj mirëkuptimin tënd.

Pyetje: A jeni i gatshëm të uleni në një tryezë me Edi Ramën, me ndërmjetsimin e ndërkombëtarëve për të përcaktuar dhe kushtet e zgjedhjeve, por të uleni dhe ta keni përballë?

Basha: Kundërshtarin politik, nuk e përcaktoj unë, por kryeministrin duhet ta përcaktojë vetëm një proces i lirë zgjedhor. Edi Rama nuk mund të jetë kryeministër i një procesi të ardhshëm zgjedhor. Vetëm një qeveri tranzitore, pa Edi Ramën, mund të çojë drejt zgjedhjeve të lira dhe të ndershme.Kjo është e panegociueshme.Arsyeja pse kemi ardhur këtu, është “kujdestaria” e Edi Ramës mbi zgjedhjet, është pëdhunimi i zgjedhjeve nga Edi Rama.Pa larguar këtë shkak themelor të krizës, nuk mund të ketë zgjidhje të krizës.

Pyetje: Rama deklaroi se nuk tërhiqet nga data 30 qershor dhe nuk e dorëzon pushtetin, por nga tjetër dhe ju deklaroni se nuk do të ketë zgjedhje me 30 qershor. Rrezikohet një situatë konfrontimi dhe a ka mekanizma PD për të parandaluar zgjedhjet me 30 qershor?

Basha: Mekanizmi për të parandaluar tiraninë e krimit, është bashkimi i njerëzve. Nuk ka mekanizëm tjetër historia! Dymijë vjet qytetërim modern, nuk ka mekanizëm tjetër përveç bashkimit të njerëzve kundër tiranisë.Mekanizmi i vetëm për të ndalur kapjen e të gjitha pushteteve, pushtetin absolut që çon në korrupsion absolut, në dhunim absolut të qytetarëve, është bashkimi, është pjesmarrja, është vendosmëria për të luftuar për liri, demokraci, për standarde europiane. Këtë kemi bërë si opozitë, për këtë kemi thirrur qytetarët në betejë, dhe e djeshmja tregon fare qartë se vendosmëria e qytetarëve për ta vazhduar këtë betejë deri në fund, është absolute. Nuk e ndali as gazi, nuk e ndali as dhuna barbare, nuk e ndali as moti, as shiu. Ky është një vullnet që nuk ndalet më dhe kjo është një betejë që bëhet për gjithë Shqipërinë, për të gjithë shqiptarët. Për të garantuar liritë dhe të drejtat e tyre themelore, që sot janë të dhunuara dhe të rrezikuara, pikërisht nga kapja e pushtetit, nga marrja e pushtetit në mënyrë të paligjshme.

Padyshim që me 30 qershor kam besim të madh, se bashkimi i qytetarëve para 30 qershorit, jam i bindur se do ta bëjë fare të qartë se nuk do ta lejojë që 30 qershori të hyjë në historinë e Shqipërisë, si dita kur tirania e krimit çimenton pushtetin dhe kap edhe pushtetin vendor.

Pyetje: Së fundmi janë ofruar dy deputetë gjermën për të zgjidhur krizën, keni parashikuar kontakte apo takime në vazhdim me ta?

Basha: Nuk dëshiroj të komentoj mbi detajet e komunikimit tim me faktorin ndërkombëtar. Nuk e kam bërë kurrë dhe nuk dëshiroj ta bëj as sot. Dua të them vetëm se në përgjigje të shprehjes publike të dëshirës për tu angazhuar, PD dhe opozita, shprehin po kështu vullnetin dhe mirëpritjen e angazhimit të faktorit ndërkombëtar për zgjidhjen e kësaj krize të thellë e të rrëzikëshme për paqen dhe stabilitetin në Shqipëri dhe më gjerë.

Pyetje: Paskan lëvizur gjërat zoti Basha…?

Basha: Në çkuptim Elda?

Pyetje: Për mirë…

Basha: Beteja vazhdon. Ajo që është e rëndësishme, është që kemi një vetëdijësim të dyfishtë. Një vetëdijëshim të shqiptarëve që fuqinë e kanë njerëzit, nuk e kanë fuqinë një grusht horrash, as kur përdorin uniformën e Policisë së Shtetit, as kur përdprin apo kapin mjetet e komunikimit masiv. Fuqia është tek njerëzit. Ky është ndryshimi midis vendeve të lira dhe vendeve despotike. Edi rama pati një projekt për ta kthyer këtë në një despotat, ku urdhëron gjithçka me ferman. Kjo nuk mund të ndodhë. Shqiptarët janë vetëdijësuar, kanë fituar besimin tek vetja e tyre dhe ngjarjet e 48 orëve të fundit e provojnë këtë më së miri. Dhe kjo është fitorja më e madhe e këtyre 3 muajve të aksionit opozitar. Për këtë e bëmë edhe djegien e mandateve, për ti treguar njerëzve, jo vetëm që jemi në krahun e tyre, po që sëbashku jemi ne fuqia që do të diktojë ndryshimin në Shqipëri. Dhe do të ketë ndryshim e do të ketë një të ardhme për gjithë shqiptarët.

E ardhja nuk do të jetë më e një grushti oligarkësh, që plaçkisin gjithçka. Vetë jetojnë në luks të shfrenuar, keni parë besoj pamjet që kanë bërë xhiron e botës, dasma miliona eurosh në hotelet më të shtrenjta të italisë, ndërkohë që këtu merren zvarrë nënat e vogëlushëve, para se tu shembin shtëpitë.

Këto janë dy anët e medaljes sot. Nuk mund të qëndrojnë bashkë. Dhe të jesh e sigurtë, që me këtë mesazh që kanë dhënë shqiptarët ditën e djeshme, protestat e ardhshme do të jenë edhe më të mëdha, edhe më të fuqishme. Dhe vëndosmëria jonë absolute për t’i shkuar deri në fund kësaj kauze popullore, jo për pushtet, për ti kthyer njerëzve lirinë për të zgjedhur me votë. Pastaj do të vendosin vetë njerëzit me zgjedhje të lira e të ndershme, është përgjegjësia e çdo partie politike të bëjë ofertën, programin bindës dhe ta vënë atë në jetë. Se mund ta ketë bindës ofertën, por s’e vë në jetë, prapë do ta ketë në dorë qytetari ta shkarkojë qeverinë. Kjo është Europa, kështu funksionon në Europë, kështu do të funksionojë edhe në vend.Prandaj e them: koha e hajdutëve të zgjedhjeve, koha e zgjedhjeve me krimin ka marrë fund.

Pyetje: Kur do të jetë protesta e rradhës?

Basha: Nesër do të mbledh strukturat drejtuese të PD dhe do të bëj konsultimin me të gjithë anëtarët e koalicionit të bashkuar opozitar dhe do të ju informojmë për të gjithë axhendën politike të opozitës dhe të axhendave të protestës qytetare.

Faleminderit!