Zgjidhja më e mirë, Ish-kreu i KQZ: Ndarja në 4 qarqe, me numër të barabartë zgjedhësish

Derisa Partia Socialiste dhe grupimi i deputetëve që mbështesin Lulzim Bashën vazhdojnë aktrimin me Komisionin për Reformën Territoriale, njëri ndër njohësit më të mirë të sistemit zgjedhor në Shqipëri, Ish-Kryetari i KQZ-së, Kristaq Kume, vjen me një propozim në emër të shoqërisë civile, duke dhënë dhe zgjidhjen, sipas tij më të mirë, ndarjen territoriale të Shqipërisë në 4 qarqe me numër të barabartë zgjedhësish

Komisioni i Reformës Territoriale, tha Kristaq Kume, nuk duhet të ketë në fokus vetëm konfigurimin e hartës, por të nisë ridimensionimi i sistemit që funksionon pushteti vendor.

“Propozojmë që të trajtohet si i tillë dhe të zgjidhet si pjesë e një procesi të një reforme të thellë. Objekt i kësaj reforme territoriale duhet të jetë i gjithë sistemi. Kërkimi për zgjidhje legjislative që do të bëjë të mundur decentralizimin, e konsiderojmë si nevojë të kohës. Vullneti politik për një reformë të kësaj përmase duhet të jetë i shprehur se sa angazhimi i derisotëm i forcave politike, për të bërë ndërhyrje në hartën territoriale administrative. Ky propozim tashmë i formalizuar si draft-ligj i cili për të marrë fuqi vepruese duhet të pasqyrohet me ndryshime, është depozituar në Kuvend,” tha Ish-Kryetari i KQZ-së, Kristaq Kume, dhe ajo që do të vazhdojnë të këmbëngulin, është kërkesa që ajo çka është nisur në kuadër të punës që po bën Komisioni për Reformën Territoriale të mos konsiderohet e përfunduar vetëm me një ndryshim të hartës, ndërsa përfundoi:

“Të konsiderohet si nisje e një procesi që ridimensionon sistemin që funksionin pushteti vendor në vendin tonë. Ndarja e Shqipërisë në 4 qarqe me numër të barabartë zgjedhësish do të ishte më i miri. Me rëndësi është, këtë e kemi propozuar, që qarku të vetëqeveriset nga Këshilli i Qarkut, pra një Mini-Kuvend. Të kemi 4 qarqe.”