“Zgjohet” SPAK, arrestohet Kryetari Bashkisë Lushnjë, Fatos Tushe

Kryetari i Bashkisë Lushnjë, Fatos Tushe, është arrestuar sot me 10 me zyrtarë të tjerë të akuzuar shpërdorim detyre dhe shkelje të barazisë në tendera.

Aktualisht është duke u ushtruar kontroll në zyrat e bashkisë së Lushnjës dhe disa institucione të tjera dhe në banesat e të ndaluarve.

Favorizimi i një kompanie për rehabilitimin e një kanali vaditës në Lushnjë me vlerë 24 mln lekë, duket se është dhe strumbullari i akuzave për kryebashkiakun Tushe.

“SPAK bën të ditur se e ka shtrirë hetimin dhe për korrupsion, sipas të dhënave për abuzim me fondet publike. Masat e sigurisë që janë marrë ditën e djeshme në GJKKO, ku 7 janë nën masën e arrestit me burg, përfshirë kryebashkiakun, 4 të tjerë në masën e arrestit në shtëpi.

Sipas SPAK bëhet fjalë për një tender në vlerën e 24 mln lekëve të reja për rehabilitimin e kanalit vaditës në Lushnjë. Sipas burimeve Tushe ka favorizuar një nga kompanitë që ka marrë pjesë në tender. Përveç se akuzohen për shkelje e barazisë në tendera pasi kanë skualifikuar kompanitë e tjera, sipas SPAK dyshohet se kanë përfituar dhe para. Ka pasur një ankesë fillimisht nga ana e kompanive,” raporton BW.

Të arrestuar janë: Fatos Tushe, Flamur Peqini, Xhemal Hasko, Blerta Turuku, Ani Simoni, Andri Mushaj, Margarita Gjermeni, Bujar Murati, Ibrahim Lami, Xhemal Hasko, Gazment Çela.

Ndryshe, Fatos Tushe drejton këtë bashki prej 3 mandatesh, ndërsa përfaqëson Partinë Socialiste. Më herët ai bashkë me sekretaren e tij mbetën të plagosur më 31 dhjetor të 2020-ës, pasi në zyrë iu hodh lëndë plasëse. Në atë kohë pati dyshime për përfshirje në afera por prokuroria e mbajti në sekret të plotë hetimin.

Fatos Tushe është mbajtur në ambientet e bashkisë deri sa është përfunduar kontrolli në ambientet e bashkisë. Më pas ai do të shoqërohet në ambientet e drejtorisë së Policisë, ndërsa personat e tjerë janë vendosur në qeli.