Zhvillime negative në sektorin e jashtëm, rritet financimi i llogarisë korente me borxh

Shqipëria importon mallra dhe shërbime më shumë se sa eksporton, por hendeku i mbetur bosh vitet e fundit ishte financuar nga investimet e huaja direkte, tani po financohet me borxh. Banka e Shqipërisë vlerëson se financimi i deficitit korent do të konsiderohej i qëndrueshëm nëse do të financohej nga flukset jo-borxh krijuese të tilla si investimet.

Përfundimi i investimeve të mëdha në gazsjellësin TAP dhe në HEC-et mbi lumin Devoll ka ulur flukset hyrëse nga investimet, por disbursimet nga borxhi i jashtëm ka zëvendësuar hyrjet valutore të investimeve nga jashtë.

Por financimi me borxh i deficitit të llogarisë koherente është një zhvillim negative për periudhën afatmesme pasi më shumë valutë do të duhet të dalë jashtë për shlyerjen e borxhit e për rrjedhojë deficiti do të zgjerohet.

Banka e Shqipërisë përllogariti se, flukset financiare joborxh-krijuese nga investimet direkte neto dhe nga llogaria kapitale u vlerësuan në nivelin 7.9% ndaj PBB-së nominale.

Këto ishin rreth 1.9 pikë përqindje më të ulëta krahasuar me një vit më parë, ndërsa, ndërsa flukset borxh-krijuese u vlerësuan rreth 0.7 pikë përqindje më të ulëta krahasuar me një vit më parë.

Deficiti i llogarisë korrente u raportua në 226.0 milionë euro në tremujorin e parë të vitit 2020, duke u zvogëluar me rreth 8.8% në terma vjetorë. Deficiti u vlerësua në nivelin 7.5% ndaj PBB-së nominale ose rreth 0.6 pikë përqindje më i ulët se i njëjti tremujor i një viti më parë.

Deficiti tregtar në mallra dhe shërbime u ngushtua me rreth 5.7% në terma vjetorë. Ndikimi kryesor lidhet me ngushtimin e deficitit të mallrave me 5.9%. Ndërkohë, suficiti i llogarisë së shërbimeve u ngushtua me 6.3%.

Eksportet e mallrave dhe të shërbimeve u pakësuan me 4.1% në terma vjetorë. Eksportet e “Shërbimeve të udhëtimit” u pakësuan me 0.6% krahasuar me një vit më parë. Në të njëjtin drejtim, edhe eksporti i mallrave u zvogëlua me 4.7% krahasuar me tremujorin e parë 2019.

Importet e mallrave dhe shërbimeve u ngushtuan me 4.6% në terma vjetorë. Përcaktues ka qenë rënia e importit të mallrave me 5.6%. Në të njëjtën kohë, importi i shërbimeve u pakësua me 2.1%. Në këtë rast, ndikimi kryesor ka ardhur nga rënia e importit të “shërbimeve të udhëtimit” me 7.1%./Monitor/