Zjarr në një ndërtesë në Johanesburg, 63 të vdekur

Shkon në 63 numri i të vdekurve nga zjarri që përfshiu një ndërtesë shumëkatëshe sot në Johanesburg, qytet ky më i madhi në Afrikën Jugore, bënë të ditur autoritetet.

Shërbimi Emergjent i Johanesburgut, raporton RFE, tha se më shumë se 40 persona të tjerë u lënduan nga zjarri, i cili shpërtheu në orët e hershme të ditës së sotme.

“Aktualisht i kemi 63 të vdekur. Kurse janë edhe 43 të lënduar, të cilët janë dërguar në qendra të ndryshme spitalore”, tha zëdhënësi i Shërbimit Emergjent, Robert Mulaudzi.

Mulaudzi bëri të ditur se zjarri tashmë është shuar dhe se operacioni i kërkimit është duke u zhvilluar në ndërtesën e nxirë në qendër të Johanesburgut.

Në mesin e viktimave është edhe një fëmijë, theksoi ai.

“Po shkojmë nga kati në kat për t’i tërhequr trupat. Kjo është një ditë e trishtueshme për qytetin e Johanesburgut. Unë kurrë nuk kam parë diçka të tillë gjatë 20 vjetëve sa jam në shërbim”, theksoi Mulaudzi.

Ende nuk është e qartë se çfarë e ka shkaktuar zjarrin, ndërkohë që njerëzit nga ndërtesa janë evakuuar plotësisht tashmë.

Mulaudzi theksoi se ndërtesa ishte “një vendbanim joformal” ku njerëzit e pastrehë ishin vendosur në kërkim të akomodimit pa ndonjë marrëveshje kontrate formale. Sipas tij, kjo e ka bërë të vështirë kërkimin e njerëzve në këtë objekt.

Në ndërtesë mund të kenë qenë duke jetuar rreth 200 njerëz, sipas dëshmitarëve.

Uzurpimi i jashtëligjshëm i ndërtesave të papërdorura në qendër të qytetit është i madh dhe thuhet se shumë prej tyre janë nën kontrollin e sindikatave kriminale, të cilët marrin qira nga banuesit.

Në qershor, raporton RFE, zjarri në një ndërtesë të vjetruar në Johanesburg la të vdekur dy fëmijë nën moshën 10-vjeçare, të cilët kishin mbetur të ngujuar në një banesë.