Zjarret, Ministria e Mbrojtjes: Zgjerohet perimetri në Thirrë, shmanget rreziku pranë pikës kufitare Rips

Pas vatrave të reja të zjarrit që kanë pushtuar vendin dhe rrezikut që u shfaq pranë pikës kufitare Rips në fshatin Livadhja, Ministrja e Mbrojtjes thekson se zjarri është shuar dhe shmangur rreziku për banesat ndërkohë në Thirrë të Fanit është zgjeruar perimetri ndonëse po punohet për ndërprerjen e vijës së zjarrit.

Ndërhyrja, sipas Ministrisë së Mbrojtjes, vijon të paraqitet e vështirë për shkak të terrenit në Majën e Rrunës, në Kukës, ku forcat po punojnë për të mos lejuar përhapjen e flakëve në zonat e banuara.

Njoftim:

Pranë pikës kufitare Rips në fshatin Livadhja, në bashkinë Finiq, është shuar zjarri duke shmangur rrezikun për banesat.

Zjarri në fshatin Gjorgos, njësia administrative Cakran, bashkia Fier po mbahet nën kontroll, ndërsa ka vijuar puna me helikopterin çek për shuarjen përfundimtare të tij.

Në Kepin e Rodonit, në Durrës është raportuar një vatër zjarri, për të cilën po vijon puna për vënien nën kontroll nga forcat në terren. Nuk paraqitet rrezikshmëri.

Një vatër zjarri në një sipërfaqe me shkurre dhe ferra është raportuar në malin e Xhyrës, në bashkinë e Librazhdit. Ai po shuhet nga forcat zjarrfikëse të bashkisë.

Zjarri në fshatin Thirrë, njësia administrative Fan, bashkia Mirditë ka vijuar të zgjerojë perimetrin, duke shkaktuar tym në të gjithë kodrën. Forcat po punojnë për të ndërprerë vijën e zjarrit në afërsi të rrugëve të fshatit. Ndërkaq është izoluar plotësisht zjarri në fshatin Munellë-Domgjon, bashkia Mirditë.

Vijon të paraqitet e vështirë ndërhyrja për shkak të terrenit në Majën e Rrunës, në Kukës, ku forcat po punojnë për të mos lejuar përhapjen e flakëve në zonat e banuara.

Nën kontroll mbeten flakët në fshatin Klysyrë të bashkisë Tropojë si dhe në Vermosh të Malësisë së Madhe.