Zjarret nëpër Shqipëri/ “Zbulimi”, Xhaçka:Janë ndezur qëllimisht dhe…
Javë kaotike e qeverisjes së Edi Ramës ku Ministri i Jashtëm flet për situatën e sigurisë dhe trafikun ndërkombëtar të drogës, Ministri i Brendshëm flet për integrimin evropian dhe sot Ministrja e Mbrojtjes, Olta Xhaçka, flet për aktet vandale ndërsa komenton situatën e zjarreve.
Sipas saj, zjarrvënia nuk ka lidhje me hapjen e kullotave apo zjarreve të vëna padashje duke djegur mbeturinat. Kjo mund të jetë edhe e vërtetë por ç’punë ka ajo me zjarret dhe klasa politike së cilës i bëri thirrje, vetëm ajo e din:
“Ju bëj thirrje të gjitha forcave politike, të gjithë politikanëve pa dallim që të na bashkohen për të denoncuar dhe luftuar këtë fushatë që nuk shkon në dëm të qeverisë por në dëm të vendit. Jam ndjerë e keqardhur dhe e revoltuar kur kam dëgjuar ndonjë syresh që është rrekur të krijojë ndonjë alibi për këtë situatë,” tha Xhaçka, e cila në vend se ti drejtohet ministrit të Brendshëm për akte vandale del dhe akuzon në konferencë shtypi se nuk mund të ketë alibi dhe as justifikim për këto akte:
“Nuk ka e nuk duhet të ketë asnjë forcë politike, pavarësisht problemeve që ajo ka, që të mbështesë duke justifikuar, apo të nxisë përmes gjuhës së konfliktit e dhunës akte, që e theksoj, nuk dëmtojnë qeverinë, por rrezikojnë të kthehen në një kërcënim real për pronën dhe jetën e qytetarëve.
U bëj thirrje autoriteteve lokale, të gjitha strukturave të njësive të qeverisjes vendore që në disa raste kanë qenë gati inekzistente përpara këtyre situatave, se, minimumi që këto struktura duhet të bëjnë me punonjësit e drejtorët, me këshilltarët bashkiakë e administratorët e kryepleqtë, pra me këtë ushtri njerëzisht që janë sot në borderotë e njësive të qeverisjes vendore, është që të informojnë në kohë për këto zjarre, të veprojnë menjëherë për parandalimin e përhapjes së tyre.
Bashkë me ta ftoj edhe të gjithë qytetarët që të na ndihmojnë duke na informuar në kohë për zjarret, por edhe duke na informuar kurdo që kanë informacion për individët e grupet që qëndrojnë pas këtyre akteve të qëllimshme kriminale.”
Ajo çfarë i bën përshtypje Olta Xhaçkës është fakti se ndërsa marsin e këtij viti janë regjistruar 243 vatra zjarri, vitin e shkuar nuk ka pasur asnjë dhe pse kushtet klimatike janë të ngjashme.
“Situatë e pazakontë. Gjatë muajit mars janë shënuar 243 vatra zjarri, rreth 8 vatra zjarri të qëllimshme. Krahasuar me një vit më parë, ky numër ka qenë zero dhe pse me kushte atmosferike të ngjashme. Nuk mund të gjesh një vit tjetër me këtë frekuencë zjarri. Janë ndezur qëllimisht dhe në pjesën dërmuese pa asnjë arsye përfitim.
Kemi të bëjmë me akte ta pastra vandalizmi për të mos i vënë një emër tjetër në mungesë të provave konkrete që do ti zbulojnë hetimet. Janë akte që për nga logjika dhe natyra u ngjajnë si dy pika uji atyre sulmeve me kallëpe tritoli të shtyllave të tensionit të lartë, që ndoshta si për rastësi kanë ndodhur po këtë periudhë,” tha Ministrja Olta Xhaçka dukshëm e painformuar se ku janë këto vatra zjarri ndryshe sikur të ishte informuar Ish-Gjeneral Lleshaj se shumë prej tyre janë edhe në komuna të administruara nga Partia Demokratike, me siguri se do të shikonte punët në Zyrën e saj për të cilën edhe paguhet. Ose, dhe ti sygjeronte shefit, Edi Rama që të konsolidoj shërbimin zjarrfikës, në mënyrë që të mos ngelin ushtarët shqiptarë me kova uji në dorë duke fikur zjarret nëpër fshatëra.
