Zjarri kërcënon Shëngjinin, në Fier pësojnë ullishtet
Duke filluar nga ora 22:00 e mbrëmjes së të enjtes, zjarret vijojnë të jenë aktive në malin e Shëngjinit ku situata tashmë është shqetësuese si pasojë e flakëve që kanë përfshirë malin me pisha në vendin e quajtur “Lugu i Lemes”.
Zjarrfikëset janë në vendngjarje, por për shkak të terrenit të vështirë malor, po hasen probleme në izolimin e vatrës së zjarrit, kjo pasi era në zonë favorizon përhapjen e flakëve. Sakaq edhe terreni i vështirë malor nuk ndihmon zjarrfikësit të ndërhyjnë pranë vatrave me qëllin izolimin e flakëve ndërkohë në ndihmë kanë shkuar edhe zjarrfikëset nga Tirana.
Prefekti i Qarkut Lezhës, Gjok Jaku tha se situata me zjarret ka agravuar:
“Ka dy orë që ka agravim të situatës. Era e fortë ka bërë që zjarri të përparojë sipër kurorës së Shëngjinit afër varrezave publike. Në një zonë flakët i janë afruar banesave dhe kemi kërkuar evakuimin e tyre. Ndërkohë që ka forca zjarrfikëse për të ndaluar flakët të përparojnë drejt banesave. Është e pamundur ndërhyrja në terren pasi është i thyer. Është i pamundur afrimi tek vatrat e zjarrit për shkak të terrenit të thyer,” tha Jaku duke shtuar se nuk mungon bashkëpunimi, që në orën 22:00 janë në terren të gjithë llojet e shërbimeve, ai pyjor, ushtria por terreni është shumë i vështirë dhe nuk na lejon të lokalizojmë flakët ndërsa erërat e forta e kanë shtrirë shumë perimetrin e zjarrit.
Ndërkohë dy vatra të mëdha zjarri kanë rënë sot në fshatin Peshtan në Fier ku janë djegur rreth 300 rrënjë ullinj ndërsa flakët ende nuk janë shuar.
Terreni i vështire ka bërë forcat zjarrfikëse ta kenë jo të lehtë rrugën për të mbajtur nën kontroll flaket e për të shuar zjarrin. Ende nuk dihen shkaqet e zjarrit, ndërsa kanë mbërritur atje edhe uniformat blu
Në situatën e krijuar me përhapjen masive të zjarreve në disa qarqe të vendit, Presidenti i Republikës thekson se po ndjek me shumë shqetësim situatën, veçanërisht në Gjirokastër dhe Lezhë.
“Duke theksuar rëndësinë e ruajtjes së mjedisit dhe të natyrës, i bëjë thirrje dhe nxis institucionalisht autoritetet qendrore e vendore, për koordinimin në kohë, me qëllimin përballimin me efektivitet të situatës, për t’u ardhur në ndihmë zonave të prekura nga zjarret, veçanërisht për eliminimin e rrezikut për jetët e qytetarëve,” thekson Presidenti duke inkurajuar personelin e Forcave të Armatosura dhe të Ministrisë së Brendshme, njësitë e Emergjencave Civile, si dhe drejtuesit e pushtetit vendor në këto qarqe, për marrjen e menjëhershme të të gjitha masave efektive të emergjencës, për të neutralizuar vatrat e zjarrit dhe për t’iu ndodhur pranë qytetarëve të cilët mund të rrezikohen nga përhapja masive e tyre.
