Zjarri shkrumbon tregun industrial në Laç, Tregtarët: U kërcënuam një javë më parë…

Zjarr i madh ka shpërthyer në tregun industrial në Laç.

Ngjarja ka ndodhur në oret e para të mengjesit të sotëm, dhe për fat nga raportimet e para nuk ka persona të lënduar, por vetëm dëme materiale.

Tregtarët rrëfejnë se nga flakët u janë shkaktuar dëme të shumta materiale dhe japin fakte pse zjarri ishte i qëllimshëm.

Një tregtare ka deklaruar për mediat se pak ditë më parë ka qenë një person i cili ka kërcënuar tregtarët se do t’u vinte zjarrin.

“Këtu fajin e ka vetëm shteti. Ka një javë që na paralajmëron se do të na vendosë zjarrin. E kisha me borxh dhe pa borxh për të jetuar për fëmijët e mi. Na kanë kërcënuar këta që janë në konflikt me tokën këtu. Erdhi policia dhe nuk e shoqëroi burrin. Janë 70 tregtarë që kanë humbur mallin dhe djersën këtu. Kanë jetuar me këto lekë. Kemi hyrë borxh me mund dhe djersë. Kush do na përgjigjet ne. Kam punuar me 3 mujor në Greqi dhe erdha e hodha lekët këtu. 3-4 mln lekë i kam humbur unë. Ka të tjerë që kanë humbur 10 mln lekë,” tha ajo.

Zjarr i qëllimshëm, është njëra nga pistat që po hetohet ndërkohë tregtarët dëshmojnë se në vendgjarje është gjetur një shishe benzinë.