Znj.Marku! S’bëhesh dot Sabiha po mos u bëj “teneqexhie”!

Letër e hapur Prokurores së Përgjithshme të Përkohshme Arta Marku në ditën e lindjes së Sabiha Kasimatit

E nderuar Znj. Arta Marku, Prokurore e Përgjithshme e Përkohshme e Republikës së Shqipërise!

Vendosa të të shkruaj publikisht sot në këtë përvjetor të lindjes së martires antikomuniste, Sabiha Kasimait një prej grave më të shquara e më model në historinë e këtij kombi e populli, pasi konstatoj me keqardhje të madhe dhe revoltë që prokuroria e drejtuar prej jush po aplikon të njëjtin qëndrim me prokurorët, gjykatësit dhe drejtuesit e tjerë të diktaturës komuniste duke mbuluar e penguar zbardhjen e krimeve kundër njerëzimit dhe gjenocidit të kryer prej tyre,

Znj. Kryeprokurore!

Në datën 26 shkurt 2018, në emër të Shoqatës Antikomuniste të të Përndjekurve Politikë te Shqipërisë që unë drejtoj si dhe te familjareve, kemi depozituar në Prokurorinë e Krimeve të Rënda një kallëzim penal për “krime kundër njerëzimit dhe gjenocid” për autorët e “Masakrës së Bombës në Legatën Sovjetike” më 26 shkurt 1951, ku u pushkatuan pa gjyq 22 intelektualë të njohur të Tiranës midis tyre edhe shkencëtarja e intelektualja e mirënjohur Sabiha Kasimati.

Ndoshta nuk ke dijeni për këtë krim kundër njerëzimit prandaj me qëllim që të merremi vesh përse bëhet fjalë po e përshkruaj me pak fjalë, prandaj :

“Më 19 shkurt 1951 ndodhi një shpërthim në Ambasadën e ish-Bashkimit Sovjetik në Tiranë. Nga sulmi nuk kishte asnjë të plagosur, por autoritetet komuniste shqiptare të asaj në shenjë hakmarrje dhe servilizmi ndaj Bashkimit Sovjetik vendosën të ndërmarrin një akt të pa shoq terrori duke caktuar si fajtorë një grup prej 22 intelektualësh të rinjë që punonin asokohe në Tiranë, duke përfshirë edhe Sabiha Kasimatin (si e vetmja grua). Në çdo provë ekzekutuesit i dinin mungesat, 22 intelektualët u dënuan me vdekje pa asnjë proces gjyqësor. Dënimi u ekzekutua natën e 26-27 shkurtit 1951 në afërsi të fshatit Mënik, disa kilometra në perëndim të Tiranës. Trupat u varrosën në një varr të cekët në fushën prapa? Më vonë autoret e krimit sajuan një “gjyq” në letra që mbanë datën 25 shkurt 1951 por edhe ky procesverbal ka shkelje të rënda edhe të ligjeve komuniste, gjë që provon qartë vrasjen e tyre pa gjyq dhe konsumimin nga autorët e kësaj masakre të krimit kundër njerëzimit dhe gjenocidit.

Në qershor 2018 i kam dërguar një tjetër kërkesë zyrtare Prokurorisë së Krimeve të Rënda për dijeni edhe Juve por ende nuk kemi marrë asnjë njoftim .

Në këto kushte, kam dyshime të qenësishme se Prokuroria e Krimeve të Rënda nuk ka vullnetin politik të fillojë hetimin e një krimi kundër njerëzimit dhe gjenocid të kryer ditën për diell, me prova e fakte publike. Kjo situatë e krijuar nga vartësit tuaj përbën një shkelje me dashje të ligjeve dhe Kushtetutës se Republikës së Shqipërisë si dhe atyre ndërkombëtare për krimet kundër njerëzimit dhe gjenocidit .

Të them të drejtën personalisht por edhe si Shoqatë nuk kemi pasur besim e shpresë që drejtësia shqiptare, veçanërisht prokuroria të hetojë e të dënojë seriozisht autorët e krimeve të komunizmit në Shqipëri, por ne na duhej një përgjigje zyrtare nga ju për të na hapur rrugën ti drejtohemi prokurorive e gjykatave te posaçme ndërkombëtare për këto lloj krimesh.

Sigurisht që këtë qellim tonin mund ta kenë marrë me mend edhe vartësit tuaj dhe injorimi pa asnjë përgjigje apo veprim juridik hetimor i padisë sonë synon pikërisht bllokimin e ankimimit tonë në institucionet gjyqësore ndërkombëtare .

Znj. Kryeprokurore!

Unë e di që hapja e një hetimi dhe një procesi gjyqësor për krime kundër njerëzimit dhe gjenocid ndaj autorëve komunistë të tyre është pothuaj e pa mundur, të paktën jo nga kjo prokurori që kemi sot në Shqipëri. Nëse do të niste ky proces, shumë zyrtarë e politikanë të lartë të vendit apo të afërm të tyre do të përfundonin në burgje. Njëri prej tyre është kreu i institucionit që të zgjodhi e para të cilit ti je betuar për kryerjen e detyrës, Kryetari i Kuvendit, Gramoz Ruçi, ministri i fundit i Brendshëm komunist i diktaturës komuniste, të cilin ne e kemi akuzuar publikisht për krime kundër njerëzimit. Vetëm fakti që të zgjodhi ai, e ju betove atij, mjaftoi që ne të mos kishim asnjë besim në hetimin e padisë sonë pas zgjedhjes suaj në krye të akuzës shqiptare. Shqiperi është i vetmi vend i Evropës Ish-komuniste që nuk ka dënuar krimet e komunzmit dhe kjo sjellje e vartësve tuaj me padinë tonë, ju bën edhe juve përgjegjëse për këtë.

E nderuar Znj.Marku!

Në mos gabohem kam dëgjuar të pretendoni se vini nga një familje e përndjekur politike e komunizmit. Nëse kjo është e vërtetë, atëherë situata Juaj në raport me këtë çështje bëhet e sikletshme edhe moralisht pasi ne presim një tjetër ndërgjegjësim, ndjesi, veprim nga zyrtarët e drejtësisë që ata ose familjet e tyre kanë vuajtur pasojat e gjenocidit komunist.

Në kushte te tilla duhet të ishe në krah të Sabihasë dhe të tjera grave e vajzave të vrarë, burgosur, internuar e lënë të vdisnin nga uria në kampet komuniste të shfarosjeve në masë. Por kjo është një zgjedhje personale. Po deshe mos ma llogarit si argument këtë pasi nuk je ti e para zyrtare e shtetit ish e përndjekur e komunizmit që nuk ia ndjen për shtresën e sajë.

Nuk kam aq fantazi të zhvilluar që të mendoj se ti mund të ishe si Sabihaja dhe nuk kam asnjë të drejtë të ta kërkoj një gjë të tillë.

Por dua të të them një gjë të fundit: A e dini kush dhe pse e vrau Sabihanë? Atë e futi në listën e vdekjes vetë diktatori Enver Hoxha! Duke qenë se Sabihaja kishte mbaruar Liceun Francez bashkë me Enver Hoxhën dhe e njihte mirë, i kërkoi një takim. Aty ajo i tha: “Kam ardhur të të them se ti po vret gjithë intelektualët. Dua të të pyes se me cilët ke ndërmend ta ndërtosh Shqipërinë, me teneqexhinjtë apo me këpucarët?”

“Boll lexove iluministët francezë, të këshilloj të lexosh Marksin dhe Leninin”, ishte përgjigja e Enverit.

Pas dy ditësh, Nako Spiru, të cilin Sabihaja e kishte shok, e thirri Sabihanë për një kafe dhe në bisedë e sipër i tha: “Sabiha, duhet ta qepësh gojën, jo me karficë, por me babushkë”.

Me teneqexhinjtë e kishte fjalën për homologun tënd në ato vite, Prokurorin e Përgjithshëm, Koçi Xoze .

Prandaj po këmbëngul. Për hir të Zotit, nëse nuk ke asnjë shans e mundësi të bëhesh Sabiha, s’ke pse bëhesh teneqexhie e pasardhësve të Enver Hoxhës .

Zoti të mëshiroftë !

Tirane 14,10 2018

*Kryetar i Shoqatës Antikomuniste të të Përndjekurve Politikë të Shqipërisë