Zog Gomari i vitit 2022!
Ti bësh një ekografi popullit shqiptar me të mirat e me të këqijat, me mirëqenie dhe varfëri, me qeveri e opozitë, më mirë se At Gjer Fishta në poemën dramatike “Gomari i Babatasit” themi se është e pamundur ndonëse është shkruar në vitin 1923!
Trajtimi është i njëjtë edhe sot, si i politikës, qeverisë ashtu dhe popullit të vuajtur shqiptar që vazhdon dhe zvarritet ndër këmbët e drejtuesve të tyre, që po i shtypin!
Por, dhe të përzgjedhësh se cili është Zog Gomari i këtij viti, atij që Edi Rama e blen po si Babatasi për të mos bërë shpenzime të mëdha, të zë belaja! Janë aq shumë, sa nuk ndihmon as mënyra se si e shkruajti këngën për gomarin At Gjergj Fishta, “herë tue qeshë, herë tue vajtue”!
Gjithsesi, në këtë vit të vrullshëm gomerësh, mund të renditen ca më të kushtueshmit për xhepin e Edi Ramës, ca zog gomerësh që zgjohen në mëngjes dhe ngjyjnë penën në Facebook për ti ngarkuar gjithë fajet e Qeverisë, liderit të opozitës Sali Berisha!
Jo se ky është i pafajshëm për situatën e krijuar, sepse zogjtë e gomerëve që bleu Edi Rama, dhe që sot numërojnë ditët se sa do të jetoj Sali Berisha, janë pjellë e folesë së tij! Nuk bënin as për kuaj, dhe ndonëse e dinte se janë thjeshtë zogj gomerësh, i bëri ministra, ministra e kryetar partie, ambasadorë, drejtor, ca edhe prefekt, dhe sot Kryeministri thjeshtë i përdor si gjyle topi për të shkatërruar opozitën.
Sot, kur po shkelim në vitin e 10 të qeverisjes së Edi Ramës, kur asnjë nga premtimet nuk i mbajti, kur patronazhistët menaxhojnë votat dhe trafikantët e drogës të dhënat e shqiptarëve, dhe fajin, sipas zogjve të gomerëve të blerë në pazarin e Kunatit, na i paska Sali Berisha!
Qeveria dhe Populli
/Pse kurrkush sʼdin me kallxue, Kta zotni shka kanë veprue, Qʼse kanë nisë ktu me sundue: Ku janë rrugat qi kanë shtrue? Ku janë urat qi kanë lshue?… Sa janë knetat qi kanë thá? Kund ndo ʻi prrue a lùm a ká, Qi kta prû tʼa kenë nʼâmë tʼvet?… Qé , tash mbushʼ janë plot dhetë vjet/, thotë At Gjergj Fishta në poemin dramatik! Po, i shkruar në vitin 1923, kur edhe thotë:
/E po ku, posë se nʼShqipni. Njikjo punë mundet me u ndi/ Se, pa u mbushun gjymsa e vjetit,/ Firo shkon gjith parja e shtetit,/ Nëpër xhepa tʼ “atdhetarve”/.
Dhe, mos kujtoni se vetëm qeveria ishte si kjo, sot, e vitit 2022, po populli:
/Besà, keq, si nʼujë tʼpafund,/ tuʼu përpjekë si peshku nʼzáll;/ Me tʼu bâ mos me kenë gjáll./ Eja rreth e gjithmonë zhárg,/ Zdathë e zdeshë e pa bukë nʼbark,/ Mbytun nʼborxh e me ʻi tubë fmí,/ Na shkon jeta si â mâ zí:/ Gjymsa nʼburg, gjymsa angârí;/ Bájë zyrtarë, e bájë shkatrrina,/ Bájë dajakun sá tʼhà shpina:/ Si “moʼ, Zot!/ Ma keq për né”,/ Qi bâjm hije për mbi dhé!/
Ndërsa ata që e marrin sot guximin dhe kundërshtojnë Edi Ramën, po, përballen me dajak dhe gaz lotsjellës e birucë, ca prej tyre edhe pa e kundërshtuar fare duke qëndruar në hall dhe shtëpi të vet, aty ku Rama i çon fadromën dhe gazin lotsjellës!
Thoni e padëgjuar! Jo, jo, e dëgjuar dhe e përsëritur:
/Na nën Turk, zotni kemʼ kênë,/ E un po tʼtham po, un qi ʻam i kshtênë/ -Lé nʼDervênd, mbi Urë të Gjolës/ – Se, tʼthuesh, kurr Turku i Stambollës/ Sʼi a ka bâ Shqipnisë ketë dhunë;/ Me rrahë njerzit punë e pa punë,/ Si po i rreh sot Qeverija./
Ndonëse vetëm 10 vjet shtet, dhe situata e pashpresë edhe mund të kuptohet, por, sot 100 vjet pasi u shkrua “Gomari i Babatasit”, si i vihet emri kësaj dukurie kur shqiptarët jetojnë me të njëjtët ministra dhe qeveri, popull të vuajtur duke marrë botën në sy, dhe për fat të keq, Kryeministër që blenë zogj gomerësh për të përçarë zërin ndryshe!
Zogu i Gomarit 2022
/Po, ketë punë e kam mendue/ Edhe un vetë. Veç se nuk due/ Me blé kalë: Tham, ma për sʼmarit/ Mʼdel me blé nji zog gomarit;/ Pse gomari bjen mâ lirë./ E din vetë, se nʼketë kohë tʼvshtirë/ Nuk asht, besà, kurrkund ngâja/ Me bâ kot shpenzime tʼmdhaja./
E kishte llogaritur kështu Babatasi dhe çuditërisht po këtë llogari e ka dhe Edi Rama, sot, kur kuajt e tij janë majur, vrapojnë me të madhe, nga ministri me iniceneratorë e ara të mbjellura me hashash deri tek një specialist IT-je që e trafikon drogën e mbjellur, dhe përderisa nuk i ndalon dot, zgjedhjet po vijnë, Kryeministrit i mbetet vetëm ta shkatërroj rivalin, i cili, i dëshpëruar nga zgjedhjet e vitit 2021, thjeshtë, mund dhe blihet!
Skenat e 8 Janarit në selinë e PD ishin të paimagjinueshme për çdo shqiptar që i thotë bukës – bukë, e ujit – ujë, këtu vërtetë bënë përjashtim Edi Rama që bukën e ka nga vëllau serb Vuçiç dhe ujin nga ai turk Erdogan, gjithsesi, atij i hyri në punë dhe materializoi të paimagjinueshmen!
Fillimisht Edi Rama çuditej pse blindohej selia e PD, pse shitej “parimi” dhe akuzohej Sali Berisha për votën e manipuluar kur vetë po votonin në Këshillin e paqenur Kombëtar qofshin të përndjekur politik, pronar të lënë pa prona ose ish-komunistë; Po ky llum që mbështetej nga ata që gërthisnin se “nuk ka më tokë e xanun në PD” ndërkohë radhët e tyre po mbusheshin po nga ajo maxhe, me gjyle për të goditur komunistin Berisha! U çuditë edhe kur e merrnin në telefon të gjithë të ngujuarit me vetëdëshirë në selinë e PD sepse na qenkan të rrezikuar nga Sali Berisha, dhe kërkonin, atë që ka edhe socialist që nuk e pëlqen, dajakun për mbështetësit e Berishës në selinë e Partisë Demokratike!
Por, më nuk u çuditë, Edi Rama pa tek ky grup çelësin shpëtimit të partisë së tij kriminale PS dhe qeverisë po aq kriminale që nuk ka Dri e Vjosë që e lanë sikur mos të ishte “Misioni i Lulzim Bashës”!
Të shikosh demokratë në shkallë duke u ngjitur drejt ballkonit të zyrës së Lulzim Bashës, por jo dhe ata që i rrahin me shkopa bejsbolli, e goditje të rënda deri në kokë, dhe të ndjesh kënaqësi ndonëse deri dje ata ishin të familjes tënde politike, kjo nuk ka të bëjë më me politikë, as me votë, as me parti e aq më pak me selinë e saj!
Pra, i gjithë ky grup pa dallim, që duartrokiti këtë tentim vrasje, pa ardhur deri te ndërhyrja e policisë së Edi Ramës me qillo gazi lotsjellës për kokë demokrati, dhe blerja e Edi Ramës për të shpartalluar Partinë Demokratike, padyshim që meritojnë titullin e zi në historinë shqiptare, Zog Gomari i vitit 2022!
A ju shtuan këtyre radhëve, pas 8 Janarit, bashkëmendimtarë të idesë së shtypjesë së mbështetësve të Sali Berishës?! Pa diskutim, por skena vrasjeje nuk kishte! Kishte ndonjë post zyrtar nën zë, gjyqtar ose vetting pa pagesë, tender ose ngritje trau dogane duke i mbyllur sytë, por jo shkop bejsbolli në lule të ballit dhe përgjërim të Edi Ramës për ti lënë të vdekur pranë Lanës!
Kishte dhe mashtrues që gërthisnin se Dosjet e Sigurimit u Hapën ose dhe këtë fundvit ata që nuk fituan në Primaret e PD dhe festuan me Kryetarin e komanduar nga kafexhiu i Bashës, por, ata janë llum, si ai llumi i kafes turke që as nuk hahet dhe as nuk pihet!
Ka dhe nga ata primitiv që vazhdojnë ta urojnë vdekjen e Sali Berishës duke e konsideruar si shpëtim të Partisë Demokratike, asaj partie që ata e shkërmoqën me urdhër të Edi Ramës! Por, janë përkufizuar nga At Gjergj Fishta dhe sado që flejnë gjumë në Facebook rëndësia e tyre nuk merr vlerë, sepse vazhdojnë dhe jetojnë me ëndrrën “Sikur…”; Ëndërr me sy hapur që i shërben vetëm komunistëve, dhe blihet!
Dhe, aty është Edi Rama me pushtetin e tij kriminal, me pallate të shembura që kompensohen, Portin e ri të Durrësit, leje ndërtimi pallatesh, anëtar të Gjykatës Kushtetuese, Nënkryetar Parlamenti…
Në fund, Pafrikë.al duke ju uruar një vit të ri sa më të mbarë, ju këshillon që të mos shpresoni se zog gomari nuk do të ketë në këtë tokë shqiptare! Po, këtë tokë me plotë me rreze drite, por, mos harroni, dhe me shumë gomerë vërdallë!
