Zohran Mamdan, 34 vjeç, kryetar i ri i New Yorkut

Zohran Mamdani, 34 vjeç, është fitues në zgjedhjet për Kryetar të Bashkisë New York duke u bërë dhe kryetari i parë mysliman i qytetit më të madh në SHBA.

Zohran Mamdani ishte relativisht i panjohur vetëm disa muaj më parë dhe arriti fitoren me premtime për të taksuar milionerët, në mënyrë që të financojë programe të zgjeruara sociale.

Në një fjalim sfidues në Brooklyn, kryetari i sapozgjedhur i Bashkisë New York, Zohran Mamdani, premtoi një ndryshim rrënjësor në drejtimin e qytetit dhe në politikën kombëtare, duke e përshkruar New Yorkun si “dritën në këtë moment errësire politike”.

“Kur të hyjmë në bashki pas 58 ditësh, pritjet do të jenë të larta. Do t’i përmbushim ato,“ tha Mamdani, duke iu përgjigjur skeptikëve për moshën dhe përvojën e tij.

Ai përshkroi vizionin e tij si një “madhështi që nuk do të jetë abstrakte”, duke theksuar ndikimin konkret që politikat e tij do të kenë në jetën e qytetarëve.

“Do ta ndiejë çdo qiramarrës me qira të stabilizuar që zgjohet në ditën e parë të muajit dhe sheh se qiraja nuk është rritur. Do ta ndiejë çdo gjysh që mund të qëndrojë në shtëpinë për të cilën ka punuar, ndërsa nipërit e mbesat e tij jetojnë afër, sepse kostoja e kujdesit për fëmijët nuk i ka detyruar të largohen në Long Island,” tha Mamdan.

Trump ka kërcënuar se do të shkurtojë fondet federale për New Yorkun nëse Mamdani fiton ndaj të pavarurit Andrew Cuomo dhe republikanit Curtis Sliwa.

Fitorja historike e Mamdanit u njoftua mes një vale fitoresh demokrate në të gjithë vendin, me kongresmenen Abigail Spanberger që u bë guvernatorja e parë femër e Virginias dhe Mikie Sherrill që mposhti kundërshtaren e saj të mbështetur nga Trump në zgjedhjet për guvernatore të New Jerseyt.

Zohran Mamdani do të jetë kryebashkiaku i ardhshëm i New Yorkut, duke u bërë myslimani i parë dhe personi me prejardhje nga Azia Jugore – si edhe më i riu në më shumë se një shekull që mban këtë pozicion.

Ndryshe, demokratët kanë fituar bindshëm në zgjedhjet e para madhore të mandatit të Trumpit, duke ngritur një brez të ri udhëheqësish dhe duke i dhënë partisë së goditur një valë të re përpara zgjedhjeve të ardhshme të Kongresit vitin tjetër.

Në New York, Mamdani, një socialist demokrat 34-vjeçar, fitoi garën për kryebashkiak, duke kurorëzuar një ngritje të shpejtë dhe të papritur. Ndërkohë, në Virginia dhe New Jersey, demokratet moderuese Spanberger, 46 vjeç, dhe Sherrill, 53 vjeç, fituan zgjedhjet për guvernatore me epërsi të theksuar.

Garat e djeshme ofruan një tregues se si amerikanët po i përgjigjen nëntë muajve të trazuara të presidencës së Trumpit. Ato shërbyen gjithashtu si një provë për strategjitë e ndryshme të fushatave demokrate përpara zgjedhjeve të vitit 2026.

Përfitimi më i madh praktik për demokratët dje erdhi nga California, ku votuesit u dhanë ligjvënësve demokratë fuqinë për të rishkruar hartën kongresionale të shtetit, duke zgjeruar kështu betejën kombëtare mbi rishpërndarjen e zonave elektorale, e cila do të ndikojë garën për Dhomën e Përfaqësuesve të SHBA-së.

Të tre kandidatët demokratë vunë theksin te çështjet ekonomike, në veçanti përballueshmëria e kostove të jetesës, një temë që mbetet ndër më të rëndësishmet për shumicën e votuesve.