Zonja Presidente: Edi Rama është manipulator i përmasave psikopatike!
nga Prof.Dr.Enver Bytyçi
Presidentja e Kosovës, Vjosa Osmani, u takua sërish me kryeministrin e Shqipërisë, Edi Ramën, kësaj radhe në Washington. Para një muaji ata u takuan në Prishtinë. Ndërsa po në pranverë morën pjesë në samitin për Ukrainën dhe sërish u takuan bashkë. Gjesti i pritur i kryeministrit në përqafim me presidenten më 10 qershor të këtij viti në Prishtinë ishte në fakt një mesazh për kryeministrin Kurti. Për t’i thënë atij se “Unë, padishahu i të gjitha kohërave për Shqipërinë! Unë që e quaj Kosovën një provincë timen! Pra unë Edi Rama, nuk kam nevojë për ty Albin, se kam këtu Vjosën, princeshën e Kosovës”! Dhe ju siguroj se di ta lexoj Edi Ramën jo vetëm në ato që thotë, por edhe në ato që ai nuk thotë.
Mendova se me atë gjest të para një muaji, zonja Osmani do ta kishte marrë mësimin e manipulimit që po i bënte asaj zoti Rama. Ndaj nuk prisja se ata do të takoheshin në Uashington. Aq më tepër që nuk besoj të ishin në të njëjtën sallë. Jam i bindur se ka qenë kryeministri i Shqipërisë, ai që e ka skenarizuar takimin në Uashington me presidenten e Kosovës. Aq më tepër kur atij i duhej ky takim për të manipuluar mungesën e takimeve dhe fotografive me liderët e tjerë të Aleancës Atlantike.
Por kam përshtypjen se Vjosa duhet të jetë pak më e kujdesshme, pak më e rezervuar në marrëdhëniet me Edi Ramën, edhe pse e di se ajo beson që po përmbush një detyrë kushtetuese, duke e takuar e duke biseduar herë pas here me të. Këtë që them e bazoj në disa arsyetime logjike e racionale:
Së pari, duhet ditur e duhet njohur fakti se Edi është manipulator i përmasave psikopatike. Dhe prej të tillë njerëzish duhet të ruhesh. Sidomos kur ti je në atë habitatin tënd të sinqeritetit. I ndershmi dhe i sinqerti e kanë vështirë të mendojnë të keqen. Aq më tepër kur qëndron pranë një prestigjiatori manipulues të përmasave të dymetroshit. Në jetën tonë ka dy lloje njerëzish, disa që përpiqen të të ndikojnë dhe kjo quhet normalitet në marrëdhëniet njerëzore dhe të tjerë që të manipulojnë. Manipulimin e këtyre njerëzve shqiptarët e kanë përkufizuar me termin “t’i hedhin sehiret”! Edi Rama është mjeshtër i sehireve. Edhe fushatat elektorale i bën me “na kanë marrë m’sysh”! Sa herë do t’ia ketë thënë gjithashtu Vjosës këtë fjalë, se “je për të marrë m’sysh”! Manipulimi fillon me lëvdata për ty! E vazhdon me përbetime se “jam njeri i ndershëm”! Kjo është taktika e ndikimit imponues të njerëzve nga kryeministri i Shqipërisë.
Së dyti, unë nuk jam kundër takimeve të presidentes së Kosovës me kryeministrin e Shqipërisë. Por kjo nuk duhet të jetë si kompensim i mungesës së takimeve me homologun e tij në Kosovë. Kryeministri i Shqipërisë e ka për detyrë të takojë më së pari kryeministrin e Kosovës. Pastaj presidenten e në fund Abdixhikun. Një kryeministër shqiptar që injoron ftesën ( të 12 qershorit) të homologut të Kosovës dhe shkon dy ditë përpara i ftuar nga një kryetar partie në Kosovë është kryeministër përçarës.
Se Edi Rama e ka përçarë skenën politike e institucionale të Kosovës nga fillimi e deri më sot, për këtë ka me dhjetra shembuj. Zonja Osmani e di se Rama vinte në Prishtinë si kryeministër dhe nuk takonte kryeministrin Mustafa, por rrinte vetëm me presidentin Thaçi. Ajo i njeh marrëdhëniet konfliktuale e përçarëse të Edit me ish-kryeministrin Ramush Haradinaj. Po ashtu edhe këto të sotmet me kryeministrin Kurti. Presidentja e Kosovës e ka provuar shpesh herë në lëkurën e saj fyerjen që asaj i ka bërë Edi Rama. Nuk dimë, nëse Rama i ka kërkuar ndjesë ndonjëherë ose jo! Derisa fyerjet ishin publike, atëherë edhe ndjesa duhej të ishte publike.
Së treti, presidentja e Republikës së Kosovës e ka provuar edhe në samite ndërkombëtare se sa e dëmshme ka qëlluar marrëdhënia vëllazërore e Edi Ramës me presidentin e Serbisë, Aleksandër Vuçiq. Në biseda intime ndoshta ajo i ka sqaruar këto marrëdhënie. Por publikisht qytetarët nuk dinë asgjë për atë, nëse vijojnë ose jo edhe sot marrëdhëniet e mira midis “dy vëllezërve binjakë”, Rama-Vuçiq! Së paku ne akoma nuk kemi dëgjuar nga goja e kryeministrit të Shqipërisë të thotë një të qintën e kritikave që presidentja e Kosovës ia bën presidentit të Serbisë. Atëherë ne duhet ta dimë se çfarë ka ndryshuar te Edi Rama në marrëdhëniet e tij me Aleksandër Vuçiq?! Pse Rama nuk e dënon aktin terrorist të Banjskës si vepër terroriste të mikut të tij në Beograd. Pse e quajti veriun e Kosovës si “tokë e askujt”, pikërisht kur aty po rivendosej sovraniteti shtetëror i Kosovës dhe Vuçiq humbi terren?! Pse anuloi mbledhjen e qeverive në Gjakovë vetëm 16 orë para se ajo të fillonte?! Pse nuk punon qeveria shqiptare për njohje të reja të shtetit të Kosovës, ose për njohjen nga katër vendet anëtare të NATO-s, ku bën pjesë vendi ynë?! Pse Tirana zyrtare nuk flet më në përkrahje të Kosovës për anëtarësime në organizatat ndërkombëtare dhe nuk dënon aktet sabotuese të Serbisë në këtë drejtim?! Janë njëmijë pse, të cilat do të duheshin sqaruar në kaq shumë takime të zonjës Osmani me Edi Ramën. Por ama publiku, qytetari nuk ka asnjë info për këto.
Për këto arsye dhe shumë të tjera unë i shoh me rezerva dhe skepticizëm marrëdhëniet Rama-Osmani! Qofsha i gabuar!
