Zorrë, dilni nga prushi!
nga Agim Popoci
Të gjithë ata që i besuan Presidentit të Kosovës, Hashim Thaçi, dhe Kryeministrit Avdullah Hoti se më 4 Shtator në Washington do të firmoset Marrëveshja ku Serbia do ta pranoj shtetin e Kosovës, nuk e kanë kuptuar seriozitetin e shtetformimit dhe pozitën gjeopolitike në të cilën ndodhet Kosova!
Nëse dikush e ka menduar se Kosovën do ta pranoj Serbia ashtu siç thoshte Thaçi duke i falë edhe Luginën e Preshevës; Ose, siç e mendoi ky gjytyrymi politik që Hashimi e bëri Kryeministër, se po shkon për fundjavë në Shtëpinë e Bardhë për tu kthyer me njohje nga Serbia, atëherë duhet ti drejtohet psikologut! Ta konsultojnë mirë dhe mos të kërcejnë si zorra në prush duke humbur aq shumë ekuilibrin, sa për tre ditë nuk po e gjejnë qoftë edhe një gjë të mirë që përmban Marrëveshja Ekonomike Kosovë-Serbi e firmosur nga Hoti dhe Vuçiç në prani të Presidentit të SHBA, Donald Trump.
Çfarë nuk u tha për Marrëveshjen dhe Pse?! E para, takimi në Shtëpinë e Bardhë ashtu si dhe Marrëveshja konfirmuan se SHBA respekton sovranitetin dhe integritetin e shtetit të Kosovës. Ndryshe, pjesë e Marrëveshjes do të ishte ideja e ngjizur në Procesin e Berlinit për shkëmbimin e territoreve, Asociacioni Komunave Serbe i cili u firmos në Bruksel, ose në fushën e ekonomisë, pronësia e Kombinatit “Trepça”, që pa Amerikën, shqiptarët dhe zorrët e tyre duhet ta dinë mirë se u dalin shumë pronar, që me dokumente mund të kërkojnë pjesë mbi pronësinë që e dëshmojnë edhe me “kontrata legale” që i njeh Arbitrazhi Ndërkombëtarë!
Për zorrët që kërcyen për Liqenin e Ujmanit nuk duhet ta harrojnë kurrë, se Amerika është vend ku respektohet prona dhe nuk falet!
Zorrët nuk kërcyen në prush kur arat e Debëlldesë u ndanë mes për mes, por u fol për njohjen e domosdoshme nga Maqedonia. Sa mal i është falur këtij shteti, zorrët e nuk e thonë; Ashtu si dhe 8.300 hektarët e Maleve të Rugovës për Malin e Zi! Harruan Çakorin dhe përrallat me harta, ama duan që Serbia ti fal 2.7 km liqe në mënyrë që shteti serb ta njeh Kosovën!
Sot Kosova ka zotimin amerikan se Liqeni i Ujmanit nuk falet por pas fizibilitetit që do të kryhet nga Amerika do të diskutohet edhe kjo çështje. Më shumë nuk mund të bëhet, dhe le ta harrojnë ata që me ose pa urdhrin e Sorosit çirren si patriot!
U shqetësuan për Izraelin, shtetin mysliman, sinagogën në Prishtinë dhe Ambasadën në Jerusalem sepse reagoi Turqia!
Njohja nga Izraeli është çelësi i vetëm që shqiptarët kanë për ti mbyllur gojën 5 shteteve anëtare të BE që nuk e njohin Kosovën. Teoria e pakicave ose territoreve të kontestuara mbyllet me këtë njohje nga Izraeli, dhe ngelet vetëm vullneti dhe interesat që kanë këto shtete për ta njohur Kosovën shtet të pavarur dhe sovran.
Presidenti Trump u kritikua dhe sulmua ashpër pse tha që Kosova është vend me shumicë myslimane! Kur Konferenca Islamike nuk e mbështeti idenë e Turqisë për ta pranuar në bllok Kosovën, zorrët kërcyen në prush duke theksuar se pse nuk e mbështesin një vend me shumicë myslimane. Kur këtë e thotë Presidenti i SHBA na del se Kosova qenka vend laikë ndonëse 97% janë deklaruar mysliman!
Problem i njohjes nga Izraeli del edhe detyrimi i Kosovës që ti kthehet sinagoga që hebrenjtë kishin në Prishtinë! Logjikë të çuditshme kanë zorrët, shqetësohen pse duhet kthyer një pronë që i takon hebrenjve! Dhe jo vetëm kaq!
Zorrët u shqetësuan edhe për reagimin e Turqisë për Ambasadën në Jerusalem me arsyetimin se është një partner i rëndësishëm i Kosovës. Interesante! Deri në firmosjen e kësaj Marrëveshje në Washington, Turqia akuzohej se në Kosovë po ndërton xhamia dhe në Serbi, fabrika. Për ata që akuzonin për xhamitë dhe faktin se investimet turke në tokën serbe janë shumë herë më të mëdha, dhe sot dalin në krah të sorosistëve, duhet sqaruar se deri më sot Ankaraja zyrtare nuk kërkoi llogari nga vëllezërit serbë pse po hapin Ambasadë në Jerusalem; Pse duhet ti kërkojë llogarinë vetëm Kosovës, këtë ndoshta edhe e dinë këto koka të gjeostrategjisë dhe gjeopolitikës, por njëri ndër kundërshtarët e kësaj ideje, Ministri i Jashtëm i Serbisë, Ivica Daçiç tha se Marrëveshja e Washingtonit nuk është vetëm pjesë e politikës së jashtme por edhe politikës së brendshme të SHBA që Izraelin e kanë njërin prej qëllimeve kryesore të strategjisë së jashtme.
Kur jemi te feja, disa koka të kombit u shqetësuan edhe për Kishën Ortodokse të Serbisë dhe të drejtat e saj që janë përfshirë në Marrëveshje. Para se të kërcejnë në prush, zorrët duhet ta dinë se atë që deklarohet në Marrëveshjen e Washngtonit figuron në Planin e Ahtisarit dhe që është pranuar edhe nga Parlamenti i Kosovës me Deklaratën e Pavarësisë.
Madje këtu situata rëndohet edhe më shumë kur disa prej zorrëve, firmëtarë të Marrëveshjes së Rambujesë dhe pjesë e Ekipit Negociator për Statusin e Kosovës që prodhoi edhe Planin e Ahtisarit, kritikojnë Marrëveshjen e Washingtonit! Pse nuk iu dha ky shans për Zyrën Ovale apo pse u urdhëruan nga komandanti i tyre George Soros për momentin nuk është e qartë!
Në fund, Minishengeni Ballkanik. Kur u servir nga dyshja kriminale Rama-Vuçiç, u argumentua në detaje pse kjo Aleancë është e dëmshme për Kosovën, dhe shumica prej këtyre argumenteve qëndrojnë edhe sot kur Marrëveshja Ekonomike Kosovë-Serbi është firmosur. Çfarë ndryshon kur këtë e thotë Amerika dhe jo Hashim Thaç e Edi Rama, këtë më së miri e din delegacioni i Kosovës me të cilin të dërguarit e Presidentit Trump, Grenell dhe O’Brien janë sqaruar, dhe të cilët janë të obliguar ta informojnë opinionin e gjerë publik; Ndërkohë Marrëveshja e Washingtonit dëshmon se si SHBA e trajton shtetin e Kosovës të barabartë si gjithë të tjerët, arsye kjo që e bënë Aleksandar Vuçiçin të mendoj ndryshe nga sa mendonte në Novi Sad kur u zhvillua takimi i parë Vuçiç-Rama-Zaev!
Sot folet me të madhe edhe për daljen në det! Kur u lançuan projektet e Procesit të Berlinit, me të drejtë u kritikua Kryeministri Edi Rama pse shmangu Kosovën dhe projektin e hekurudhës e çoi nga Beogradi në Podgorica në linjën Shkodër- Durrës. Projekti për të cilin flet Marrëveshja për “dalje në det” lidhet jo me korrigjimin e këtij projekti por me një projekt të ri që lidh hekurudhën Budapest-Novi Sad-Beograd për të vazhduar drejt Prishtinë-Durrës!
Zorrët, para se të kërcejnë në prush për këtë projekt dhe të akuzojnë Presidentin e SHBA, Donald Trump, se po e sjell Serbinë në Durrës, a e pyesin e veten se kush e solli Serbinë në Kosovë në fundqershorin e vitit 1999, vetëm 2 javë pas përfundimit të luftës dhe masakrave serbe. Toka kosovare kutërbonte gjak dhe zorrët bënin moral se nuk duhet ngatërruar ekonomia dhe politika ndërsa inkurajonin mbushjen e dyqaneve me mall serb!
Sot, 21 vjet pas këtyre veprave barbare politiko-mediatike, hekurudhën Beograd-Prishtinë-Durrës e quajnë tradhti nga Amerika! Tradhti edhe mund të ishte sikur për 21 vjet ne ta kishim ndërtuar hekurudhën Durrës-Prishtinë, dhe raftet e dyqaneve të ishin mbushur me mall shqiptar, mall të cilin do ta konkurronte kjo “dalje në det”! Por, siç e ka Durrësin, Serbia ka dhe Tivarin në Mal të Zi, sa do ta shfrytëzoj kjo nuk varet nga Marrëveshja e Washingtonit dhe aq më pak nga Presidenti Trump!
Sot, zorrët duhet të dalin nga prushi, dhe mos të llapin më se Amerika e bombardoi Serbinë në vitin 1999 sepse ishte turpëruar me Srebrenicën dhe Presidenti Clinton ishte në hall me skandalin Lewinski; Dhe, se Presidentit Trump i duhet Marrëveshja për zgjedhjet Presidenciale 2020. Thjeshtë, fati jonë është se jemi në anën e Amerikës dhe se Kosova është projekt i saj!
Para se të kërcejnë në prush, zorrë duhet ta kenë të qartë se Amerika nuk e fut Ujmanin, Izraelin, Minishengenin Ballkanik në një Marrëveshje, vetëm për të shkatërruar projektin e saj.
Për zorrët që kërcyen në prush pa menduar kaq pak, le ti japin vetes përgjigje si e ndau Serbia qytetin e Mitrovicës ndërsa shqiptarët po flenin duke pritur se çfarë po i thotë Amerika, Rusisë; Dhe, sot, gjithashtu, shqiptarët e presin bashkimin e kësaj pjese të Kosovës vetëm nga Amerika sepse “Rusia e fortë” është në krah të Serbisë!
Dhe jo vetëm kaq.
Ndërsa zorrët që nuk po dalin dot nga prushi duke trumbetuar zgjidhjen vetëm përmes Bashkimit Europian, duhet ta kenë të qartë se Bosnje Hercegovina nuk është se nuk bëhet dot shtet funksional, por këtë nuk e bënë dot BE sepse nuk është vetë funksionale; Ose, edhe më saktë, nuk është Amerikë!
