Zotimi, kandidati i ‘Shtëpisë së Lirisë’: Bashki që punon për Durrësin dhe jo për Kryeministrin!
E kanë përdorur qytetin për interesat e tyre mafioze. E kanë kthyer qytetin në shërbim të pushtetit në Tiranë, tha kandidati i koalicionit “Shtëpia e Lirisë” në Durrës për zgjedhjet e pjesshme vendore të 6 marsit, Ardian Muka, pasi u prezantua nga lideri historik i PD, Sali Berisha duke u zotuar se me drejtimin e tijë do të kemi një bashki që punon për Durrësin dhe jo për Kryeministrin Edi Rama.
Me hapjen e fushatës në Sukth, Lideri historik i demokratëve, Sali Berisha, akuzoi Edi Ramën dhe Lulzim Bashën se po u presin kafshatën 12 mijë familjeve që ushqeheshin në Port për të shndërruar 800 mijë metra katrorë në një zonë ndërtimesh ndërsa Edvini dhe Lul Brava pastrojnë dhe miliarda para droge.
Duke folur para demokratëve të Durrësit pse duhet të votojnë për kandidatin e “Shtëpisë së Lirisë”, Ardian Muka, ai foli dhe për qeverisjen me këtë qytet nga Vangjush Dako dhe Edi Rama që Durrësin e ka kanë kthyer në kryeqytetin e betonit.
“Qeverisje që e shndërroi Durrësin në kryeqytetin e betonit. Kjo qeverisje zhvilloi në Durrës një prej mafiave më të rrezikshme, që ky qytet nuk e meriton. Durrësi ka parë ndër shekuj perandori dhe hordhi të huaja. Asnjëra prej tyre nuk ka menduar të ja heq portin qytetit. Porti dhe qyteti janë si trupi me zemrën, të lidhur me njëri tjetrin. Kjo qeveri në mënyrë më të papërgjegjshme, pas një nga aferat më të mëdha të Europë, duke prerë kafshatën e mbi 12 mijë familjeve që ushqeheshin në Port, për të shndërruar 800 mijë metra katrorë në një zonë ndërtimesh. U tha për Emarin, por tani del për Edvinin dhe Lul Bravën, për të larë miliarda para droge.
T’ia presin me sëpatë 3 mijë vite histori. Babëzia, lukunia nuk ka fund te këta njerëz. Nuk ka qëndrim më armiqësor ndaj qytetarëve të Durrësit dhe shqiptarëve,” tha Sali Berisha duke u shprehur qartë se vota për kandidatin e Lul Bravës, është absolutisht votë për Edi Ramën dhe pushtetin e tij.
“Asnjëri të mos i lejojë vetes një gabim të tillë. Kurse vota për kandidatin e Lul Bravës, është absolutisht fiks votë për Edi Ramën dhe pushtetin e tij, asnjë dyshim. Ai e di dhe Lulzim Basha e di se çfarë diskreditimi ekstrem ka pësuar ai, në historinë politike të Europës nuk gjen një ish-kryetar partie të ketë pritur me gaz, blinda anëtarët e partisë së tij që tre muaj më parë kishin votuar për të.
Vota për Lul Bravën është njëlloj sikur ta hedhësh në një pus të zi. Sepse është vetëm humbës. Në qoftë se ka njeri në skenën politike të Shqipërisë që këto 30 vite hyri dhe po del si humbës, ky e ka emrin Lulzim Basha, brava. Ndaj dhe thirrja ime vëllazërore, çdo votë për Ardi Mukën, kandidatin e koalicionit të fitores. Ju ftoj ju gjithashtu të votoni jo vetëm për dinjitetin tuaj si njerëz të lirë, por edhe për atdhetarizmin, patriotizmin tuaj. Nuk mund të ndërtohet Shqipëria kurrë nga njerëz që nuk e duan. E ndërtojnë burrat dhe gratë, djemtë dhe vajzat që e duan atë.
Çfarë po ndodh sot. Sot Edi Rama e ka shndërruar Shqipërinë në një vasal të Beogradit. Kam biseduar me shumë fermerë. Që të gjithë rrëqethen para idesë së Ballkanit të Hapur sepse do të thotë konkurrenca më e pandershme. Në Shqipëri, në mënyrën më fatkeqe, fermerët kanë filluar të therin lopët sepse nuk përballojnë dot qumështin serb, që prodhohet me subvencione të mëdha, këtu nuk jepet asnjë qindarkë,” tha Ish-Presidenti Sali Berisha duke i bërë thirrje banorëve të Durrësit, Katundit të Ri, Rrashbullit dhe kosovarëve kudo ku janë, se pas Enver Hoxhës, armiku numër një i Kosovës është Edi Rama, i cili ka blerë me para heshtjen e Lul bravës.
“Në 2013 Shqipëri tejkaloi nevojat e veta për qumësht dhe vezë dhe filloi të eksportojë, sasi jo të pakët sepse kishin një mbrojtje të merituar prodhimet tona. Por të kundërtën për Ballkanin e Hapur… do të më thoshte një ndërtues, mirë shumë për “Ballkanin e Hapur”, pse i thashë mirë shumë, sepse shes apartamente. Për hir të tij, nuk mund të shkatërrojmë një Shqipëri të tërë bujqësore sepse tokë nuk kemi shumë, por e kemi të klasit më të lartë. Dhe në rrafshin politik, Ballkani i Hapur është vasalitet ndaj Serbisë dhe influencë e Rusisë. Iu bëj thirrje banorëve të Durrësit, u bëj thirrje banorëve të Katundit të Ri, të Rrashbullit dhe kosovarëve kudo ku janë, se pas Enver Hoxhës, armiku numër një i Kosovës është Edi Rama, i cili ka blerë me para heshtjen e Lul bravës, i cili thotë njëherë se i kam rrënjët në Kosovë, njëherë në Dibër, por në fakt në qëndrimet politike paraqitet apatrid (pa shtet) njësoj si Edi Rama. Stop me Edi Ramën! Mjaft me Edi Ramën! Boll me Edi Ramën,” tha lideri historik, Sali Berisha para demokratëve të Durrësit duke përfunduar.
“Më 6 mars nuk votoni vetëm për Ardi Mukën, votoni për ata qindra mijëra, të rinj e të reja që morën rrugët e Europës. Votoni për diasporën shqiptarë. Është një votë sa lokale, aq kombëtare. Është një votë sa individuale, sa e rëndësishme për mbarë kombin shqiptar!”
Ndërsa kandidati i “Shtëpisë së lirisë” për Durrësin, Ardian Muka, para banorëve të Sukthit, Manzës, Ishmit, Katundit të Ri e Rroshbullit duke u zotuar për një bashki që bashkon dhe që punon për Durrësin dhe jo për Kryeministrin në Tiranë, një bashki që punon për Durrësin por jo për koncesionet e bëri të qartë moton e drejtimit të Bashkisë Durrës: Poshtë pushteti, rroftë qyteti
“Sot po fillojmë një rrugëtim, një mision, një garë elektorale. Sot pushteti na sheh ne nga lart poshtë. Ata që dikur e morën pushtetin, e bënë pronë të së keqes në Durrës. Daullet, bravat janë e shkuara e cila flet për një të ardhme imagjinare. Nëse të gjithëve na premtojnë të ardhme, atëherë kush do ta jetojë të tashmen. Fëmijët tanë po emigrojnë sepse nuk po shohin një ditë të bardhë në vendin tonë. Ne nuk do t’i shmangemi realitetit, do kujdesemi që askush mos ndihet nesër i përjashtuar nga vendimmarrja.
Ne që kemi vite që mbetëm viktima të një pushteti jo politik, ne që mbetëm viktima të një pushteti jo politik, sot duhet të ngrihemi të gjitha bashkë për të rimarrë qytetin tonë, të marrim në dorë fatet tona, të largojmë nga bashkia ata që sundojnë me fjalë të pafajshme, me fjalë të mosangazhimit, me fjalë të shoqërisë, por që në fakt ne na sundojnë. E kanë përdorur qytetin për interesat e tyre mafioze. E kanë kthyer qytetin në shërbim të pushtetit në Tiranë. Ky qytet është një monument dashurie dhe ky qytet do jetojë. Unë sot thërras poshtë pushteti dhe roftë qyteti. Bashkohuni ta bëjmë bashkë qytetin,” tha Ardian Muka para demokratëve të Qarkut Durrës duke u zotuar për kthimin e Durësit qytetarëve:
“Ti kthej Durresin qytetarëve të thjeshtë. Duhet të ngrihemi të gjithë bashkë për të marrë në dorë fatet tona. Të largojmë nga bashkia ata që sundojnë në bashki dhe në fakt e kanë përdorur qytetin për interesa të tyre mafioze. Ne nuk do lejojme që semundja e butë të vrasë qytetin tinë. Nuk mund të lejojme që qytetin tonë ta nxjerrim në pazar.
Poshtë pushteti dhe rroftë qyteti, bashkohuni të bëjmë bashkë qytetin. Unë zotohem për një bashki që bashkon dhe që punon për Durrësin dhe jo për Kryeministrin në Tiranë. Një bashki që punon për Durrësin por jo për koncesionet,” tha kandidati i koalicionit “Shtëpia e Lirisë” në Durrës për zgjedhjet e pjesshme vendore të 6 marsit, Ardian Muka, duke përfunduar:
“Në me 6 mars do t’ja dalim që Durrësin t’ua kthejmë qytetarëve!”
