Zotimi, Presidenti Trump: Talibanët do t’i godasë më ashpër se kurrë më parë!
Presidenti amerikan, Donald Trump është zotuar për t’i goditur talibanët më ashpër se asnjëherë më parë, teksa Shtetet e Bashkuara kanë shënuar 18-vjetorin e sulmeve terroriste të 11 shtatorit të vitit 2001, të cilat kanë nxitur luftën në Afganistan, raporton RFE.
“Në katër ditët e fundit, forcat amerikane kanë goditur armiqtë tanë më ashpër se më herët dhe do të vazhdojnë,” tha Presidenti Trump ndër të tjera në fjalimin e mbajtur në Pentagon në nderim të 3.000 personave të vrarë në sulmet e vitit 11 Shtatorit 2001, ndërsa ka paralajmëruar talibanët kundër kryerjes së ndonjë sulmi tjetër kundër SHBA-së.
Përgjigjja amerikane do të jetë e atij lloji që ata nuk e kanë parë kurrë më parë, tha Trump, duke theksuar se nuk është duke iu referuar përdorimit të armëve bërthamore.
Komentet e presidentit kanë ardhur pasi Ayman al-Zawahiri, lideri i grupit terrorist, Al-Kaida, që ka kryer sulmet teroriste në SHBA më 2001, ka kërkuar përmes një video incizimi sulme në “interesat e Izraelit, Amerikës, Britanisë, Franës, Rusisë dhe aleatëve të tyre evropianë”.
Zawahiri është emëruar në krye të Al-Kaidës më 2001, pasi Osama bin Laden është vrarë nga forcat speciale në Pakistan.
Në fjalimin e tij më 11 shtator, Presidenti Trump tha se ka ndalur negociatat për paqe me talibanët javën e kaluar sepse një sulm me makinë-bombë i kryer nga talibanët në Kabul, ka vrarë një ushtar amerikan dhe 11 persona tjerë.
Pas nëntë raundesh të bisedimeve me talibanët në Katar, për t’i dhënë fund luftës 10-vjeçare, i dërguari i SHBA-së për paqe në Afganistan, Zalmay Khalilzad, ka thënë se ka arritur marrëveshje në parim me talibanët.
