Zotni Lafsha*
nga Agim Popoci
Edi Rama, ta dish mirë se kur të ngrihemi në këmbë në protestë, nga rruga nuk shqitemi pa të hedhur ty aty ku e meriton! Ky kumt i liderit historik të Partisë Demokratike, Sali Berisha, nga “Foltorja” e Elbasanit u prit me një entuziazëm të madh nga demokratët që zyrtarisht për kryetar kanë Lulzim Bashën!
Po, Lulzim Bashën, i cili për 8 vjet, ndonëse përballë kishte një regjim kriminal që prodhonte nga 2-3 skandale në ditë, nuk i shkoi nëpër mend ose nuk deshi të bëjë kurrë një protestë “pa u shqitur nga rruga deri sa ta rrëzojnë Edi Ramën”. Madje, edhe një herë kur arriti të ngrit demokratët dhe çadrën dhe të bëhet lider, e mbylli atë me pazare, me turp, me dështim, dhe në fund me humbje të turpshme!
Pse pas 8 vitesh duhej të vinte lideri historik i PD në Elbasan për të kuptuar se çfarë duan demokratët, jo përrallat me qeveri teknike për dalje nga çadra, qeveri me Ilir Metën, Sali Berishën jashtë grupit parlamentar, dhe së fundi edhe marrëzi si bashkëqeverisje me Edi Ramën, këtu vetëm Berisha nuk ka faj pavarësisht maleve me mëkate që ka në gjithë këtë histori të turpshme të PD!
“Foltorja” në Elbasan dhe jo vetëm, përveç se shpërfaqi kërkesën e demokratëve dëshmoi se ithtarët e Partisë Demokratike janë në kërkim të shpresës, aty ku nuk ka as shitje dhe as pazar, as humbje dhe as turp, as Ramë por me patjetër as Bashë!
Demokratëve, për asnjë arsye në botë nuk u duhet më as Lulzimi dhe as Basha! Sa mund të shërbej një lafshë e prerë?!
Pavarësisht se si bëhet circumcisio /lexo shqip: syneti/, lafsha ngelet lafshë, e prerë, për të cilën nuk ka diskutuar njeri nëse vjen, siç thoshte Zeller, me incisio, perforatio, circumcisio vera ose exstirpatio testikuli; Dhe pavarësisht nëse është bërë për shkaqe mjekësore ose fetare.
Ose, dhe nëse vjen si circumcisio që e njohim nga Bibla dhe është bërë si një shenjë e një marrëveshjeje midis Zotit dhe Abrahamit, domethënë Zotit dhe hebrenjve. Procedurë e cila u miratua më vonë nga të krishterët (deri në vitin 325), si dhe nga myslimanët, që njihet si “synet”, sepse ka vetëm një epilog, flakjen e lafshës!
Flakjen, sepse nuk i hyn më njeriu në punë, as për arsye mjekësore ose jomjekësore, as për fimozën patologjike ose balanopostitin refraktar, e aq më pak për infeksionet kronike ose të përsëritura të traktit urinar! Por, as për seks ose higjienë, e për efekte anësore, nuk ka se si të prodhoj lafsha. Të ngjitet sërish, jo se jo!
Ky është sot zotni Lulzim Basha ose në PD, Zotni Lafsha!
Zotni Lafsha nga i cili demokratët nuk presin asgjë sikur circumcisio të bëhet edhe ashtu siç e sugjeron Shoqata Mjekësore Mbretërore Holandeze; Ajo shpreh disa nga kundërshtimet më të forta ndaj circumcisios duke argumentuar se ndërsa ka arsye të vlefshme për ta ndaluar atë, kjo mund të bëjë që prindërit që këmbëngulin për ta kryer këtë procedurë, ti drejtohen praktikuesit popullor dhe jo profesionistit mjekësorë. Gjithsesi, në fund, ajo që flaket me ose pa holandezë sërish është lafsha!
Por, edhe me flakjen e lafshës, asnjë demokrat nuk ka iluzione se e gjitha përfundon këtu!
Sot demokratët e kanë të qartë se regjimi i Edi Ramës duhet të shuhet sa më shpejtë ashtu siç janë të sigurt se nuk do të ketë më protestë që mund të përfundoj me Marrëveshje si ajo e 17 Majit 2017!
Sot demokratët e kanë të qartë pse pesë humbjet nga viti 2013 deri më sot goditën Partinë Demokratike dhe pse PD në të ardhmen duhet të drejtohet nga një Kryetar që mund të humb vetëm një parë zgjedhje duke mos pasur mundësi të shijimit të “mëshirës” së rivalit politik fitues, qoftë ky komunist ose jo!
Sot demokratët e kanë të qartë pse Edi Rama arriti të ndanë në dysh kombin me traun e Qetit, duke marrë dhe miratimin e kreut të PD-së dhe pse Partia Demokratike e së ardhmes nuk duhet të ketë Kryetar që ndez dhe fikë protesta në bazë të interesave të kunatit!
Sot demokratët e kanë të qartë se çdo lloj zgjedhje me Edi Ramën mund të përfundoj si në vitin 2017 ose në vitin 2021, por që të mos ndodhë kjo nuk u duhet as Basha dhe as Berisha, por një Parti Demokratike e fortë!
Në fund, demokratët e kanë të qartë se Kuvendi i rithemelimit të PD nuk duhet të bëhet vetëm për të larguar Zotni Lafshën sepse i domosdoshëm është dhe ristrukturimi i partisë. Por, me largimin e Zotni Lafshës, Edi Rama mbetet pa dorën e tij të djathtë, me të cilën i pashqetësuar për 8 vjet e gëzoj fitoren edhe kur nuk arriti ta blejë ose vjedh! E në garën elektorale, ashtu siç i ka ndodhur historikisht, Edi Rama gjithmonë humb!
*Pjesa e cila hiqet pjesërisht ose krejtësisht nga penisi përmes operacionit circumcisio quhet, lafshë.
