Zv/Nd.Sekretari i Shtetit në KLP, ja si do të ngritet SPAK

Kryetari i Këshillit të Lartë të Prokurorisë, Gent Ibrahimi në takim me Zv/Ndihmës Sekretarin amerikan të Shtetit, Jorgan K. Andrews, e informoi sot mbi ecurinë dhe punën e organit që ai drejton, ngritjen e SPAK dhe zgjedhjen e kryeprokurorit të përgjithshëm.

“Ne 10 muaj KLP ka ngritur infrastrukturën ligjore solide për ngritjen e SPAK. Këshilli është ne hapat e fundit për dy procese te rëndësishme: Zgjedhja E Prokurorit të Përgjithshëm dhe ngritja e SPAK. Këshilli shikon hapësirat ligjore për ngritjen e SPAK me 8 prokurorë tashmë të votuar dhe 2 prokurorë të komanduar nga lista e kandidatëve të kualifikuar për SPAK, të cilët kanë kaluar vetingun  me vendim të formës së prerë,” tha Kryetari i Këshillit të Lartë të Prokurorisë, Gent Ibrahimi.

Nga ana e tij Zv/Ndihmës Sekretari amerikan i Shtetit, Jorgan K Andrews tha se SHBA do ta mbështesë pa rezerva Shqipërinë në zbatimin e reformës në drejtësi si dhe mbrojtjen e prokurorëve të SPAK:

“SHBA do të vazhdojë të mbështesë zbatimin e reformës në drejtësi në Shqipëri. Do t’ju ofrojmë asistencën tonë gjatë punës tuaj. Jemi të ndërgjegjshëm për presionin me të cilin përballet KLP dhe jemi të vendosur t’ju ofrojmë mbështetjen tonë për mbrojtjen e prokurorëve të SPAK. Keni ngritur një baze ligjore të fortë për institucionet e reja të drejtësisë, e aftë të mbajë larg korrupsioni dhe presioni i politikës mbi këto struktura.”

Ndryshe, Zv. Ndihmës Sekretari amerikan i Shtetit të SHBA. Jorgan K. Andrews, i cili është caktuar në Byronë Ndërkombëtare të Narkotikëve dhe Çeshtjeve të Zbatimit të Ligjit dhe mbikëqyr programet e kësaj byroje në Europë, Azi, duke përfshirë edhe Afganistanin dhe Pakistanin, ishte i shoqëruar nga e ngarkuara me punë e SHBA në Shqipëri, Leyla Moses- Ones, dhe Julie Craven dhe Michelle Lakomy nga OPDAT.