Zvicër, shqiptari dëbohet në Kosovë për 300 franga
Një pronar lokali në Aargau të Zvicrës i kishte një kosovari një borxh prej 300 frangave. Kur dy vëllezërit shqiptarë nga Kosova i kërkuan t’ia kthenin ato, situata u përshkallëzua dhe përfundoi me një goditje thike në shpatullën e majtë të borxhliut. Për shkak të këtij akti, njëri prej vëllezërve është dëbuar, pasi që Gjykata Federale ka hedhur poshtë ankesën e tij.
Sherri për 300 franga
Kushtrimi ishte i zemëruar pasi që nuk i kthehen paratë. Vëllai i tij Valoni e ka deklaruar këtë në Gjykatën e Lartë Aargau. Prandaj, dy vëllezërit kosovarë kanë shkuar në Rothrist në një të hënë të ftohtë në fillim të shkurtit të vitit 2014, shkruan “Aargauer Zeitung”.
Kushtrimi ende kishte një llogari prej 300 frangash të pashlyer me pronarin e “Lounge Billiard”. Debati mes tre personave përfundon me një goditje thike në shpatullën e majtë të pronarit të lokalit. Kishte qenë Valoni ai që e kishte goditur dy herë me thikë nga pas. Vëllezërit u larguan, raporton albinfo.ch, por u identifikuan dhe u kapën falë kamerave të sigurisë. Gjykatësit e Aargaut i shpallën fajtorë, Kushtrimin dhe Valonin, ndër të tjera, për shkaktim lëndimesh të rënda trupore.
Kjo nuk ishte shkelja e parë e ligjit për Kushtrimin. Burri që sot është në mesin e të 30-ave, në moshën 21-vjeçare kishte ardhur nga Kosova në Zvicër. Ardhja ndodhi pasi që ai u martua me një bashkatdhetare që jetonte në kantonin e Bernit.
Gruaja e tij lindi dy fëmijë para se Kushtrimi të merrte lejen e përhershme të qëndrimit në Zvicër, në vitin 2010. Po atë vit ai u dënua për armëmbajtje pa leje. Pasojnë veprat e tjera penale: dëmtim pasurie, vjedhje, fyerje. Krimi më i rëndë i Kushtrimit ishte përplasja e përgjakshme në Rothrist, në të cilën ai veproi si drejtues dhe nismëtar. Kjo e solli atë prapa hekurave për tre vjet e gjysmë.
Në vitin 2018, Kushtrim mori letër nga autoritetet e Bernit. Zyra Kantonale për Migracionin dhe gjendjen civile i revokoi atij lejen e qëndrimit dhe mori vendim për dëbimin e tij nga Zvicra me një afat ndalese për hyrje të sërishme. Kosovari e kundërshtoi këtë vendim dy herë, por pa sukses. Tani, instanca më e lartë zvicerane, Gjykata Federale, duhej ta merrte në duar çështjen e Kushtrimit.
Në ankesën e tij, ai ka argumentuar se revokimi shkelte të drejtën e tij për jetën private dhe familjare. Tani ai është baba i tre fëmijëve të lindur në Zvicër. Për më tepër, incidenti në “Billiard Lounge” në Rothrist ishte “sjellje e gabuar”.
Por, Gjykata Supreme Federale ka ardhur në një përfundim tjetër. Gjyqtarët në Lozanë thonë se edhe krimet e kryera më parë të Kushtrimit nuk janë “të parëndësishme”. Përmes sjelljes së tij, ai për një kohë të gjatë kishte dëshmuar se nuk ishte “i gatshëm ose i aftë” t’i përmbahej sistemit ligjor. Për më tepër, me kalimin e viteve, serioziteti i shkejljeve të tij ligjore, vetëm sa është rritur.
Sa më e rëndë të jetë shkelja e ligjit dhe sa më shpesh që një prind me prejardhje të huaj bëhet kriminel, aq më shumë peshon interesi publik për largimin e një shkelësi, thuhet në aktvendim, raporton albinfo.ch. Në rastin e Kushtrimit, kjo tejkalon interesin e vlerësuar lart të fëmijëve të tij për të qenë në gjendje të rriten me të në Zvicër.
Kthimi në vendlindje
Sidoqoftë, për gjyqtarët, një kthim në vendlindjen e tij duket i arsyeshëm: Kushtrimi ka kaluar pjesën “mbizotëruese dhe formuese” të jetës së tij në Kosovë. Ai ishte gjithashtu i martuar me një bashkatdhetare dhe “maksimumi i nivelit të integrimit që ai mund ta arrinte në Zvicër ishte i nivelit të pjesshëm”. Ai rregullisht shkon me pushime në vendlindje, ku gjithashtu zotëron pronë dhe ende ka të afërm dhe miq.
Gjykata Supreme Federale pajtohet me gjykatën e ulët që Kushtrimi gjithashtu mund të riintegrohet në Kosovë edhe në aspektin profesional dhe ekonomik.
“Me sjelljen e tij, ai me faj të vetin e ka sjellë në lojë vazhdimin e jetës së tij familjare në Zvicër,” thekson Gjykata Federale. Prandaj, ankesa e tij është hedhur poshtë, dhe Kushtrimi duhet të paguajë shpenzimet gjyqësore prej 2.000 CHF dhe të largohet nga Zvicra.
