Zyrtare/ Asambleja e FSHF, shtyhen zgjedhjet për President më 15 Mars
Asambleja e Federatës Shqiptare të Futbollit ka caktuar një datë të re për zgjedhjen e Presidentit të FSHF dhe Komitetit Ekzekutiv pasi në fuqi është vendimi i gjykate që pezullon zhvillimin e Asamblesë dhe u preferua që të mos rrezikohet shfuqizimi i çdo vendimi të marrë sot.
Kështu, Zv/Presidenti Edvin Libohova, i cili drejtoi Asamblenë, i kërkoi anëtarëve që të caktohej një datë tjetër për zhvillimin e zgjedhjeve për president dhe anëtar të Komitetit Ekzekutiv.
“Kësaj Asambleje i ka paraprirë dy vendime gjykate për pezullimin e Asamblesë. Ankimuesit janë tërhequr nga e drejta e padisë dhe ato kanë humbur thelbin e tyre. Njëri është shfuqizuar dhe është një tjetër që mund të bëjë pengesë. Në respekt të vendimit të gjykatës në fjalë, ju ftojmë të biem dakord që të shtyjmë zgjedhjet me datën 15 mars në orën 10. Nëse jeni dakord në parim të votojmë,” tha Edvin Libohova, porpozim i cili u mbështet edhe me votim nga Asambleja.
Duka: Të lëmë mënjanë sulmet, mllefin dhe inatin e mbartur!
Presidenti i pezulluar i FSHF, në fjalën e tij, kërkoi nga Asambleja që të lihen mënjanë sulmet, mllefi dhe inati i mbartur pasi futbolli ka nevojë për të gjithë.
“Duke kërkuar me qetësi atë që ka ndodhur gjatë këtyre ditëve, kam gjetur gjërat që duhet të zgjidhim dhe ajo është zhvillimi i futbollit. Të lëmë mënjanë sulmet, mllefin dhe inatin e mbartur. Jam i qartë në atë që them, duhet të shohim para, pa u ndikuar nga tensionet artificiale të situatës së krijuar. Kaluam monopate, kreshta e kodrina por ato na kanë kalitur.
Duhet të mbyllim të kaluarën, siç i takon shtëpisë tonë ku gjithçka zgjidhet me dashuri e vëmendje, jo me gjyqe e penalitete që i përkasin një periudhe të të kaluarës. Duke reaguar në këtë situatë, ju kërkoj vetëm një gjë, bashkim, kontribut dhe dashuri për lojën përbashkët, futbolli ka nevojë për të gjithë ne,” tha Presidenti i pezulluar i FSHF nga Gjykata penale, Armand Duka.
Ndryshe, të premten, Armand Duka do të paraqitet në orën 10:00 në Gjykatën Penale të Tiranës ku do ti komunikohet masa e pezullimit nga detyra.
