Zyrtare/ Elisabeta Ymeraj, nga çëshjta Tahiri në krye të Prokurorisë së Tiranës

Prokurorja e Përgjithshme e Përkohshme Arta Marku ka vendosur të komandojë prokuroren e Krimeve të Rënda, Elisabeta Ymeraj në krye të Prokurorisë së Tiranës pas shkarkimit të Dritan Rreshkës. Lajmi është konfirmuar nga burime zyrtare të Prokurorisë.

Elisabeta Imeraj prej vitesh është prokurore e Prokurorisë së Krimeve të Rënda dhe së fundi është bërë e njohur për opinonin për shkak të angazhimit të saj në çështjen “Tahiri”.

Genci Qano i cili u përfol në orët e mëngjesit si drejtuesi i Prokurorisë së Tiranës, mësohet se nuk e ka pranuar propozimin e bërë nga Prokurorja e Përgjithshme e Përkohshme Arta Marku.

Ndryshe, Dritan Rreshka u shkarkua dje nga Komisioni i Pavarur i Kualifikimit pasi u konstatua se ka pasur deklarime të rreme dhe fshehje pasurie dhe nuk ka burime të ligjshme për pasurinë.

Sipas, ILDKPKI, Rreshka nuk kishte bërë deklarim të saktë, kishte mungesë burimesh financiare, kishte bërë fshehje pasurie dhe deklarim të rremë. KPK deklaroi se subjekti ka mungesë burimesh financiare për investimet në bono thesari në vlerë 7.9 milionë lekë në vitin 2015 dhe 2016.