Zyrtare/ Gjykate Speciale ka arrestuar Salih Mustafën

Në bazë të një fletarresti, urdhri për transferim dhe aktakuzës së konfirmuar, të lëshuara nga një gjykatës i procedurës paraprake i Dhomave të Specializuara të Kosovës, sot Zyra e Prokurorit të Specializuar ka arrestuar ish-eprorin e Ushtrisë Çlirimtare të Kosovës në zonën e Llapit, Salih Mustafa. Lajmin e ka bërë të ditur përmes një njoftimi Dhomat e Specializuara dhe Zyra e Prokurorit të Specializuar të Kosovës.

“Sipas Ligjit për Dhomat e Specializuara dhe Zyrën e Prokurorit të Specializuar, policia në kuadrin e Zyrës së Prokurorit të Specializuar ka autoritetin dhe përgjegjësinë që të ushtrojë kompetencat që i janë dhënë policë së Kosovës sipas ligjeve të Kosovës. Në Ligjin për Dhomat e Specializuara dhe Zyrën e Prokurorit të Specializuar gjithashtu përcaktohet se personi kundër të cilit është konfirmuar aktakuzë, merret në ndalim në zbatim të urdhërarrestimit ose fletarrestimit të lëshuar nga Dhomat e Specializuara,” thuhet në njoftim duke saktësuar se Salih Mustafa po transferohet në objektin e paraburgimit të Dhomave të Specializuara të Kosovës në Hagë dhe do të dalë para gjykatësit të procedurës paraprake pa vonesë të papërligjur.