Zyrtare/ Shpërthim i fuqishëm në Beirut, 73 të vdekur dhe 3.700 të plagosur

Një shpërthim i fuqishëm në qendër të Beirutit la të paktën 73 të vdekur dhe 3.700 të plagosur, tha ministri i Shëndetësisë i Libanit ndërkohë në qytet vazhdon të mbretëroj paniku. Televizioni publik i Libanit duke ju referuar hetimeve paraprake raportoi për shpërthimin e 2.700 tonëve amoniak të konfiskuar që ishte vendosur në një depo në port.

Pas shpërthimit të fuqishëm, Beiruti u trondit aq shumë sa shumica e qytetarëve në shtëpitë e tyre menduan se bëhet fjalë për tërmet ndërsa vala goditëse që përfshiu pjesën më të madhe të qytetit, shembi shumë prej ballkoneve ndërsa theu shumicën e xhamave.

Ministri i Brendshëm i Libanit ndërsa sqaroi shpërthimin në portin e qytetit tha se informacionet zyrtare flasin për një shpërthim të një materiali i cili është konfiskuar para shumë viteve dhe ishte vendosur në një depo në port. Mediat lokale raportuan për fishekzjarre ndërsa hetimet paraprake të forcave të sigurisë flasin për shpërthim të 2.700 tonëve amoniak që shpërtheu ndërsa po saldohej një vrimë e krijuar në depo ku ishte vendosur malli i konfiskuar, për tu parandaluar vjedhja.

Presidenti i Libanit, Michel Aoun, thirri urgjentisht Këshillin e Sigurisë Kombëtare ndërsa Kryeministri Hassan Diab, të mërkurën e shpalli ditë zie.

Ndërkohë Guverantori i Beirutit, Philip Boulos, duke e konsideruar si katastrofën më të madhe të Libanit ndërsa po fliste për mediat shpërtheu në lot.

Ndryshe, ky shpërthim i fuqishëm ndodhi tri ditë para gjyqit ku pritet të jepet vendimi për 4 të akuzuarit pjesëtarë të Hezbollahut për shkak të sulmit të vitit 2005 ku mbeti i vrarë kryeministri Saad Rafik al-Hariri dhe 21 persona të tjerë.