Zyrtarët e lartë evropian drejt Kievit, BE miraton sanksione të reja kundër Moskës
Presidentja e KE, Ursula von der Leyen, dhe Përfaqësuesi i Lartë për Politikë të Jashtme dhe Siguri pranë BE, Josep Borrell, janë nisur drejt kryeqytetit të Ukrainës, Kiev, për takim me presidentin Volodymyr Zelensky ndërkohë Bashkimi Evropian bënë të ditur se ka miratuar pakon e pestë të sanksioneve kundër Rusisë për luftën e saj të paprovokuar kundër Ukrainës.
Në mesin e sanksioneve përfshihen ndalesa në importin e qymyrit dhe mbylljen e porteve të bllokut evropian për anijet ruse.
“Bashkë me katër pakot tjera, këto sanksione do të shtojnë presionin ekonomik ndaj Kremlinit dhe do të vështirësojnë aftësinë për të financuar pushtimin e Ukrainës,” shprehet sot BE përmes një deklarate duke shtuar.
“Këto masa janë më të gjera dhe më të ashpra, ashtu që të kenë ndikim edhe më shumë në ekonominë ruse. Ato janë krijuar në koordinim me partnerët ndërkombëtarë.”
Sanksionet e reja shënjestrojnë gjashtë sektorë: qymyrin, transaksionet financiare, transportin, importin dhe eksportin në Rusi dhe përjashtimin e Rusisë nga kontratat publike dhe fondet evropiane.
Shtetet e Bashkuara dhe aleatët evropianë kanë vënë sanksione të ashpra ndaj Rusisë, prej nisjes së luftës në Ukrainë.
Synimi është që Moska të izolohet në aspektin ekonomik, financiar dhe diplomatik.
Këto sanksione janë përgjigje ndaj të dhënave për mizori të kryera nga trupat ruse.
Looking forward to Kyiv.@JosepBorrellF @eduardheger pic.twitter.com/YFAgGr5Tlc
— Ursula von der Leyen (@vonderleyen) April 8, 2022
Vizia e Ursula von der Leyen dhe Josep Borrell, shoqëruar nga kryeministri sllovak, Eduard Heger në Kiev, është vizita e parë e liderëve të Perëndimit prej publikimit të imazheve për mizori në qytezën ukrainase, Buça.
Hapësira ajrore mbi Ukrainë është e mbyllur për udhëtime ajrore, për shkak të luftës dhe udhëtimi me tren ishte i detyruar.
Perëndimi ka ashpërsuar sanksionet ndaj Rusisë, pas imazheve që tregojnë për ekzekutime të civilëve në rrugët e Buças.
Zyrtarët lokalë kanë thënë që më shumë se 300 njerëz janë vrarë nga forcat ruse në Buça dhe rreth 50 prej tyre janë ekzekutuar.
Moska hedh poshtë akuzat.
Si përgjigje ndaj këtyre mizorive të dyshuara ruse, von der Leyen ka propozuar pakon e pestë me sanksione për të shënjestruar Rusinë. Sanksione të cilat Përfaqësuesit e 27 vendeve anëtare të BE-së i kanë përkrahur dje.
Ndryshe, në mesin e muajit mars, raporton RFE, kryeministrat e Polonisë, Sllovenisë dhe Republikës Çeke kanë udhëtuar me tren në Kiev.
Javën e kaluar edhe presidentja e Parlamentit Evropian, Roberta Metsola e ka vizituar kryeqytetin ukrainas.
Më 24 shkurt, presidenti rus, Vladimir Putin ka urdhëruar atë që e konsideron “operacion special ushtarak” për të çmilitarizuar Ukrainën.
Veprimi i Kremlinit ka nxitur zemërim dhe është dënuar në shumë vende të botës.
