Zyrtarisht në krye të KQZ, Ilirjan Celibashi u zotua për ato që i shkeli me dy këmbë: Integritetin, paanësinë dhe transparencën!

Deri sa vazhdon debati për listat e hapura dhe koalicionet ndërsa kontestohet Kodi i ri Zgjedhor, sot në krye të KQZ u rikthye Ilirjan Celibashi si Komisioner Shtetëror i Zgjedhjeve, i cili nuk garanton cilindo qoftë Kod Zgjedhor. Ndonëse me rasten e marrjes zyrtare të detyrës, u shpreh se veprimtaria e tij si Komisioiner do të karakterizohet nga disa parime kryesore si integriteti, paanësia dhe transparenca, në kohën kur ishte Kryetar i Komisionit Qendror të Zgjedhjeve, si në zgjdhjet parlamentare të vitit 2001 dhe ato lokale të vitit 2003, shqiptarët e mbajnë mend vetëm nga fakti se Ilirjan Celibashi nuk kishte integritet, paanësi dhe transparencë.

“Përgjegjësia si komisioner që duhet të reflektoj është një sfidë e vështirë e imponuar edhe nga koha, por gjej rastin ta theksoj se qoftë veprimtaria ime si Komisioneri Shtetëror i Zgjedhjeve por edhe e KQZ do të karakterizohet nga disa parime kryesore si: integriteti, paanësia dhe transparenca

Gjej rastin të inkurajoj median të ketë bashkëpunim të hapur me KQZ dhe me mua si Komisioner Shtetëror. Ky bashkëpunim është në interes të procesit, të shqiptarëve por edhe faktorit politik. Sfida kryesore për ne është çështja e teknologjisë së informacionit. Ne do bëjmë të pamundurën që ta realizojmë këtë proces, por koha ka bërë që edhe çështje të tjera të aspektit zgjedhor të jenë po me kaq prioritet,” tha Celibashi me ardhjen e të cilit në krye të KQZ-së iu vu dhe kapaku i gjithë maskaradës me Reformën Zgjedhor.

Dhe, si pa dashje ndërsa foli për proceset zgjedhore ndër vite të kontestuara nga palët politike, nga deklarata e vetë Celibashi u pa se ato nuk u kontestuan vetëm kur ai nuk i drejtoi zgjedhjet:

“Unë mendoj që edhe në të shkuarën ka pasure zgjedhje të pranuara nga palët: 2005 dhe 2013, ku ndonëse faktori ndërkombëtar ka pasur vërejtje kjo nuk është një situatë kaq gri apo e zezë. Kanë marrë vlerësim nga ndërkombëtarët qoftë për procesin ashtu edhe për punën e KQZ-së”,- tha Celibashi.

Ndërsa Nënkomisionerja e KQZ-së, Lealba Pelingu, përkundër të kaluarës shumë të errët të Celibashit, ishte optimiste se do ecin përpara me sfidat që kanë.

Ndryshe, të hënën, me 106 vota për, Parlamenti i Shqipërisë votoi për Komisioner Shtetëror të Zgjedhjeve, Ilirjan Celibashin.