1 Maji, punëtorët protestë në Prishtinë: “Jemi lodhë, Parlament, Qeveri, të kujt jeni?”

Dita Ndërkombëtare e Punëtorëve, 1 Maji, edhe në Kosovë është shënduar me protesta, kur Federata Sindikale e Punëtorëve të Sektorit Privat në sheshin “Zahir Pajaziti” në Prishtinë u shfaq me pankartat kryesore “Mos na shkelni, mjaft pritëm”, “Për pesë vite në punë vdiqën 97 punëtorë”, “Jemi lodh, parlament-qeveri të kujt jeni?”. 

Kryetari i Federatës Sindikale të Sektorit Privat të Kosovës, Jusuf Azemi, para një pjesëmarrje simbolike u shpreh se punëtorëve të sektorit privat po u bëhet e padrejtë sa i përket pagës së 13-të. 

“Sektori publik mori pagën e 13-të u gëzuam shumë sepse menduam që edhe ne do t’i marrim. Është një padrejtësi të cilën vetëm punëtorët e sektorit privat të Kosovës mund ta mbajnë mbi barrën e vet,” u shpreh Jusuf Azemi duke theksuar se sa herë ka zgjedhje parlamentare lëviz diçka dhe paga minimale është rritur vetëm si veprim elektoral.

“Ne kemi dalë sot këtu për ta rrumbullakësuar një vit se deri ku kemi shkuar, po kemi lëvizur sepse kemi pasur një pagë minimale 260 euro dhe tani e  kemi 425 euro paramendojeni këtë, nuk e bëri vullneti i Qeverisë së Kosovës dhe i Parlamentit të Kosovës, këtë e bën zgjedhjet të cilat sa herë që kemi zgjedhje tek ne lëviz diçka,” tha Kryetari i Federatës Sindikale të Sektorit Privat të Kosovës, Jusuf Azemi, duke përfunduar:

“Është e tmerrshme, është e rëndë që të dalësh para opinionit dhe tu thuash unë po luftoj për të drejtat e punëtorëve të sektorit privat të Kosovës.”