E Fortkthjellta PD, emergjencë për Doktorin dhe Demokratët!
nga Agim Popoci
Ajo që nisi si një revoltë e natyrshme qytetare ndaj pushtetit kriminal të Edi Ramës, dhe manipuloi mijëra shqiptarë që e mbështetën për largimin e këtij pushteti, pas 50 ditësh rezulton se ka dëmtuar vetëm Partinë Demokratike dhe kryetarin e saj Sali Berisha, por, jo dhe Qeverinë Rama!
Të dëmtuarit, pra, Doktori dhe Demokratët, pa një bilanc të mbështetjes pa rezervë të kësaj lëvizje që moton kryesore ka togfjalëshin më të sëmurë që është kompozuar nga shkronjat e gjuhës shqipe, që nga Kongresi i Manastirit e deri më sot, “Rama në burg, Berisha në burg”, dhe, pa ju penguar truri ideologjik i kësaj proteste që ishin po ato qelbësira që u mblodhën në vitin 2013 për ta rrëzuar Sali Berishën nga pushteti, vazhduan me ligjërimin politikë të flasin për realizimin e qëllimeve përmes Protestës Qytetare edhe pasi u përballën me atë që ishte paralajmëruar nga disa prej penave që vazhdojnë të mendojnë për Kombin Shqiptar: Kutërbimin Marksist-Leninist!
Me ndihmën e mediave nën kontrollin e Edi Ramës u devijuan shumë mendime politike për të mos e çuar të vërtetën e kësaj Proteste tek Marksizëm-Leninizmi, ku përfshihet edhe Pushteti i Mikrofonit, që ishte një pagëzim mediatik i pakënaqësisë së disa individëve por që në fakt ishte njëra ndër shtyllat kryesore të kësaj ideologjie kriminale, mundësi e lirisë së diskutimit brenda lëvizjes që kërkon unitet të plotë gjatë veprimit, pra, Centralizmi Demokratik!
Kur krerët e kësaj lëvizje menduan se kishin arritur kulmin, kur u shpenzua kot gjithë ajo energji për disa individ që të mbledhin mijëra qytetarë në Bulverad, krijimi i një organi drejtues që u pagëzua Kuvend Kombëtar, nuk tregoi vetëm qëllimin e vërtetë marksist-leninist të kësaj lëvizje për të krijuar një parti të organizuar mirë që do të përdorej për të udhëhequr revolucionin, që ca injorantë e menduan se vërtetë është për Flamingot, por konfirmoi prezencën e shtyllës kryesore të doktrinës politiko-ekonomike të Marksizëm-Leninizmit: Partia Pararojë!
Sot nuk dihen arsyet pse PD dhe lideri i saj Sali Berisha kanë vendosur ti bashkohen kësaj Proteste pa një bosht të qartë dhe pa pikë transparence financiare, që vetëm Edi Rama dhe të ngjashmit mund ta ideojnë, por, zhvillimet e fundit në Partinë Demokratike janë një alarm serioz si për vijimin e ndryshimeve përmes Ripërtëritjes, veprimit politik të demokratëve dhe përpjekjes për të bindur demokratët se kjo është protesta më e madhe që nga viti 1991!
Për të hequr merakun e të gjithë atyre që i janë bindur këtij konstatimi të Doktorit, duhet ta harrojnë një orë e më parë masivitetin e kësaj proteste, jo vetëm pse u pa shumë shpesh vetëm në dekadën e fundit, madje në disa raste ku e ku protestë më e madhe, por, me gjithë këtë organizim, gjithë këto para dhe gjithë këtë energji të qytetarëve të ndërgjegjshëm që u manipuluan duke përfshirë dhe Diasporën, Protesta nuk arriti të mbledhë rreth vetes 100 mijë vetë; Gjë të cilën e bënë Agron Shehaj dhe Adriatik Lapajn me partitë e tyre dhe pa pasur lidhje me politikën, poashtu me para të dyshimta dhe mekanizma tjerë propagandistikë, por pa sajuar ndonjë Revolucion qafkash dhe ndonëse iu vodhën mijëra vota dhe u luftuan nga të gjitha levat e pushtetit të Edi Ramës ndryshe nga Protesta në Bulevard, arritën të zyrtarizojn në zgjedhjet e 11 Majit 2025 mbi 110 mijë vota të partive të tyre, Mundësia përkatësisht Koalicioni Nisma Shqipëria Bëhet!
Dhe jo vetëm kaq! Ndoshta lideri i PD, Sali Berisha, nuk e ka vërejt por deputetët e tij që sot kanë kapur majat e pushtetit demokratik si Kryetar Këshilli Kombëtar dhe Nënkryetar partie, më shumë flasin si Lenini se sa si demokratë, dhe në sy të tij vetëm nuk guxojnë të gërthasin, jo se nuk e mendojnë, “Rama në burg, Berisha në burg”!
Nëse kësaj i shtojmë dhe faktin se si guxon një deputet i PD si Arian Ndoja të marrë shembull të keqpërdorimit të Parlamentit, Mbretin Zog, situata vetëm për të qarë nuk është sepse jo vetëm loti të ngrihet kur dëgjon marrëzira të tilla komuniste.
Pra, deputeti i PD sot i alarmuar nga shumica parlamentare e Edi Ramës, tha nga foltorja e parlamentit se shumicën e kishte edhe Ahmet Zogu dhe u bë Mbret!
Sali Berisha duhet ta ketë të qartë se spastrimin e kokës komuniste të Arian Ndojës nuk e bënë dot Ripërtëritja, nuk e bënë as zëvendësimi i tij në zgjedhjet e radhës, sepse që të gjithë kanë po të njëjtën urrejtje për “Satrapin Zog”, dhe, si Ariani nuk e dinë se kush e bëri Zogun Mbret, dhe, pse Perëndimi nuk e deshi bolshevikun Fan Noli edhe kur e kishte shumicën dhe e rrëzoi Zogun!
Dhe, rrëzimin e Edi Ramës nuk e bënë dot Revolucioni i Flamingove, sado që është lehtë të përvetësohet ky Revolucion nga një lexues i pasionuar si Doktori, që e ka të qartë se përveç shqiponjave dhe shkabave, ndërhyrja njerëzore është rreziku më i madh për mbijetesën e Flamingove!
Në këtë situatë, urgjent, shumë urgjentë, emergjencë kombëtare është krijimi i Fortkthejlltës PD!
Po, pikërisht ashtu siç u krijua E Fortkthjellta Republikë e Venedikut, me synimin e qartë për më shumë tregti se sa të marrin pjesë në luftërat e panevojshme!
Pra, me ringjalljen e ekonomisë të cilën e ka asfiksuar Edi Rama dhe shqiptarët po jetojnë në varfëri ekstreme, dhe, pa marrë pjesë në luftërat e panevojshme si kjo e marksist-leninistëve kundër të gjithëve që janë në opozitë, por, jo me një Parti Demokratike që është sot; Me deputetë që besimin në zot e ngatërrojnë me besimin në yje dhe lexojnë Horoskopin, Mbretin Zot që vuri themelet e shtetit shqiptar vazhdojnë ta konsiderojnë si “satrap”, kujdesin ndaj familjes e kërkojnë te Protesta për Flamingot dhe jo tek ajo e Pastor Akilit për Familjen, ndërsa të përndjekurit politik të komunizmit që janë shtylla e kësaj partie i njësojnë me përndjekjen e qelbësirave që bëri së fundi Edi Rama pasi u dehë me pushtet.
Askush nuk mund të thotë se Partisë Demokratike i duhet një Dozh, siç u emërua në fillim të Republikës së Venedikut, por Këshilli i Vogël me gjashtë këshilltarët e Dozhit dhe Signoria është e domosdoshme jo vetëm për heqjen nga rendi i ditës i moshës së Doktorit, por, për të garantuar vijimësinë e Partisë Demokratike, ashtu siç thotë shprehja e famshme: “Se è morto il Doge, niente Signoria!”/Lexo shqip: Nëse Dozhi ka vdekur, s’ka vdekur Signoria/.
Duke funksionuar si Republika e Venedikut me një lloj qeverisjeje të përzier, duke kombinuar monarkinë në formën e Dozhit, aristokracinë në Senat dhe demokracinë në Këshillin e Madh, që aktualisht i ka pjesë përbërëse Partia Demokratike si monarkinë, aristokracinë ashtu dhe demokracinë, por, i ka të çakërdisura në atë farë feje që nuk ka Niccolò Paganin as Jascha Heifetz që i akordon, për demokatët është e domosdoshme, E Fortkthjellta PD!
Në fund, E Fortkthjellta PD është e domosdoshme edhe për Shqipërinë jo pse rrezikohet të pushoi së ekzistuari si Republika e Venedikut kur pas më shumë se 1000 viteve u pushtua nga Napoleoni në vitin 1797, sepse jemi anëtarë të Aleancës Veriatlantike; Por, duke qartësuar raportin me Amerikën si aleatin kryesor, E Fortkthjellta PD, ashtu siç e anëtarësoi Shqipërinë në NATO, do ta çoj shtetin shqiptar drejt familjes evropiane, BE.
