17 vjet pa Ibrahim Rugovën
Sot shënohet 17-vjetori i vdekjes së Ish-Presidentit të Kosovës, Ibrahim Rugova.
Me rastin e 17 vjetorit të vdekjes së Ish-Presidentit të Kosovës, Ibrahim Rugova, për nder të kujtimit dhe trashëgimisë së tij, nën përkujdesjen e Presidentes së Kosovës, Vjosa Osmani, organizohet ceremonia e vendosjes së kurorave.
“Të pranishëm do të jenë liderë institucional dhe ambasadorë të akredituar në Kosovë”, njofton Zyra e Presidencës.
Edhe kryetari i LDK-së, Lumir Abdixhiku me bashkëpunëtorë sot bën homazhe te varri i Ish-Presidentit Ibrahim Rugova me rastin e 17 vjetorit të vdekjes së tij.
Në përvjetorin e parë të vdekjes së Ibrahim Rugovës, Ish-Presidenti i Kosovës, Fatmir Sejdiu, e dekoroi Rugovën me Urdhrin “Hero i Kosovës”, titulli më i lartë në vendin tonë që u jepet figurave historike shqiptare dhe të Kosovës.
Dr. Ibrahim Rugova lindi më 2 dhjetor të vitit 1944 në fshatin Cerrcë, komuna e Istogut. Më 10 janar 1945 komunistët jugosllavë ia pushkatuan të atin, Ukën dhe gjyshin Rrustë Rugovën, që kishte qenë luftëtar i njohur kundër çetave çetnike që po depërtonin në Kosovë gjatë Luftës së Dytë Botërore.
Ibrahim Rugova u zgjodh më 23 dhjetor 1989, kryetar i Lidhjes Demokratike të Kosovës, partisë së parë politike në Kosovë që sfidoi drejtpërdrejt regjimin komunist në fuqi.
