2 Prilli, Noka: Është koha që revoltën e shqiptarëve ta kthejmë në kryengritje

Sot është dita kur shkodranët, qytetaria shkodrane u ngrit kundër diktaturës. 2 Prilli është një ditë që tregon edhe fytyrën gjakatare të regjimeve, tha Sekretari i Përgjithshëm i Partisë Demokratike, Flamur Noka, pas homazheve në nderim të katër dëshmorëve të demokracisë në masakrën komuniste të 2 Prillit 1991 në Shkodër, një leksion i dhënë shoqërisë shqiptare që vlenë edhe sot.

“Ne ishim këtu sot në Shkodër dhe në memorialin e 2 Prillit për të përkujtuar këtë ditë historike, për të përkujtuar dhe shprehur mirënjohjen dhe respektin për veprën e katër martirëve të 2 Prillit dhe mirënjohje për qytetarinë shkodrane, e cila i ka dhënë një leksion të madh shoqërisë shqiptare.
Leksion që është adekuat edhe sot, që regjimet duan përballje.

“Regjimet duan të menaxhohet revolta popullore dhe të shndërrohet në kryengritje. Regjimet rrëzohen me sakrificë.

Dikur u desh një përballje përpara 33 vitesh me një regjim ideologjik, që ishte regjimi komunist.

Sot Shkodra dhe gjithë Shqipëria ka përballë një regjim edhe më të rrezikshëm, regjimin e mafies, bandave dhe krimit,” tha Sekretari i Përgjithshëm i Partisë Demokratike, Flamur Noka, nga Sheshi i 2 Prillit duke i bërë apel edhe qytetarisë shkodrane dhe gjithë shqiptarëve se është koha të ngrihemi, është koha të përballemi ndërsa përfundoi:

“Është koha që revoltën e shqiptarëve ta kthejmë në kryengritje dhe t’i japim vendit zgjedhje të lira dhe demokratike, të cilat duhet të vijnë nëpërmjet një qeverie teknike, e cila krijon besim mes palëve.”

Ndryshe, kanë kaluar 33 vjet demokraci shqiptare, por edhe 33 vjet ankth, akuza dhe kundërakuza, pabesi dhe dëshpërim për qytetarët e Shkodrës që vazhdojnë të kujtojnë ditën e terrorit komunist të 2 Prillit të vitit 1991, për të cilin vet regjimi komunist hetoi, gjykoi, por nuk e ka tha të vërtetën për vrasjen e 4 të rinjve dhe plagosjen e 78 qytetarëve të Shkodrës.

Kjo masakër ishte një hakmarrje për meshën dhe lutjen e parë fetare në Shqipëri, përpjekjen për rrëzimin e bustit të Stalinit ose demonstratën e parë antikomuniste në kujtim të viktimave të kufirit shqiptar, por përveç kësaj, dhe një gjakderdhje më shumë e komunistëve që votën e popullit nuk e morën dot por i bënë me dije shkodranëve se me gjakin lum, një ditë pushtetin edhe do ta marrin.

Fatkeqësisht, në këtë 33 vjetor të masakrës së 2 Prillit komunistët u rikthye sërsish në Shkodër, për të sunduar mbi shkodranët me çizmen e krimit.