25 vjetori i Masakrës Mejës, Kurti: Lufta speciale e Serbisë, dominimi i narracionit për luftën e Kosovës
Kryeministri Albin Kurti tha se edhe 25 vjet pas luftës, Serbia e vazhdon luftën ndaj Kosovës edhe sot, duke tentuar të mbizotërojë narrativen për krimet e kryera dhe duke refuzuar hapjen e arkivave.
“Në njërën anë është Serbia autokratike që përpiqet t’i fsheh dhe mohoj krimet e kryera në Kosovë duke i kryer përgjegjësive për to, kurse në anën tjetër është Kosova demokratike që me shoqërinë dhe shtetin e saj e thotë të vërtetën për luftën e Kosovës që nga vendet ku janë kryer krimet sikurse Meja e deri në instancat ndërkombëtare sikurse Organizata e Kombeve të Bashkuara. Këtu e kam fjalën për luftën speciale të Serbisë, për t’i përvetësuar, imponuar dhe dominuar narracionet për luftën e Kosovës, tha Albin Kurti në ceremoninë e 25-vjetorit të masakrës së Mejës në Gjakovë.
Pranvera e vitit 1999, tha Kurti, ishte stinë e vrasjes e gjenocidit shfarosës serb, dhe sot se Serbia ende po e vazhdon përpjekjen ndaj Kosovës dhe tash po e bën me strategjinë e fshehjes së krimeve.
“Trashëgimtarët e Millosheviçit në Beograd, dikur bashkëpuntorë e sot politikanë, drejtues të shtetit serb refuzojnë t’i hapin arkivat për t’i zbuluar lokacionet e varrezave masive dhe refuzojnë të punojnë me drejtësinë ndërkombëtare,” tha Kryeministri Kurti duke shtuar se faza e parë e masakrës së Mejës ka qenë vrasja e civilëve shqiptarë, ndërkaq faza e dytë përfshinë shkatërrimin e dëshmive të krimit ndërsa përfundoi:
“Faza e dytë e kësaj masakre ka qenë fshehja e trupave dhe shkatërrimi i dëshmive në vendin e krimit. Në ditët në vijim, të vrarët u varrosën e u rivarrosën në disa lokacione. Një pjesë e madhe e tyre u transportuan në Serbi, në varreza masive në Batajnicë. Krahas Batajnicës ku janë gjetur 742 njerëz tanë të vrarë e të rrëmbyer, në Serbi janë edhe 4 varreza tjera masive me mbi 200 shqiptarë.”
Presidentja e Kosovës: Masakra e Mejës, Srebrenica e Kosovës
Për Presidenten Vjosa Osmani, masakra e Mejës në Gjakovë është Srebrenica e Kosovës.
“Meja është testament i dhimbjes së vazhdueshme në çdo shtëpi të Kosovës. Lëndina e pikëllimit është vendi i së vërtetës sonë, rrëfimi i trishtë për 376 fate njerëzore, është Srebrenica e Kosovës. Ky vend është thirrja jonë më e fuqishme për drejtësi, është personifikim i rrugës së vështirë dhe sakrificës nëpër të cilën kemi kaluar si popull,” tha Vjosa Osmani duke e cilësuar Mejën si njollë të barbarizmit dhe shovinizmit të regjimit të Millosheviçit ndërsa përfundoi
“Masakra e Mejës duhet të vazhdojë të jetë njolla më e përgjakshme në ndërgjegjen e urdhërdhënësve dhe kryerësve të kësaj masakre të tmerrshme, që ka dëshmuar qëllimin e atij regjimi për shfarosje të popullit shqiptar.”
Ndryshe, në orët e hershme të mëngjesit të 27 Prillit 1999, në një operacion të planifikuar, ushtria serbe kishte grumbulluar 376 meshkuj nga fshatra të ndryshme të Gjakovës, të cilët më pas i ekzekutuan. Në mesin e rreth 400 masakrave sa shkaktoi regjimi serb gjatë luftës së fundit në Kosovë, masakra e Mejës është një ndër më të mëdhatë dhe cilësohet si Srebrenica e dytë e Ballkanit.
