7 Korriku, tre ditë për burbonët e Edi Ramës!

nga Agim Popoci

Në korrik nuk bëhen protesta, është muaj që askund në botë nuk kanë ra qeveritë, njerëzit shkojnë në plazhe, nuk rrëzohen më qeveritë me protesta, ishin disa nga paralajmërimet që lançoi makineria propagandistike e Edi Ramës, por që të gjitha ranë në vesh të shurdhër dhe opozita e cila u ringjallë me foltoret e Sali Berishës ishte e prerë: Protesta kundër regjimit të Edi Ramës do të mbahet me 7 Korrik!

Ky vendim i cili u shpall nga Kryetari i Partisë Demokratike, mobilizoi strukturat e partisë dhe shoqërinë civile ndërsa sqaroi më vonë se 7 korriku ishte shpallur si datë e protestës kombëtare sepse kishin konstatuar që pakënaqësia është shumë e madhe ndaj kësaj qeverie dhe në rast se do ta shtynin protestën për një kohë optimale, në fakt do thellohej dëshpërimi tek njerëzit!

E njerëzit e këtij vendi që vazhdojnë dhe jetojnë nën terror shtetëror, me çmime të produkteve të shportës gjithnjë në rritje, dhe një Kryeministër që kujdeset për mbushjen e xhepave të miqve të tij ndërtues duke i subvencionuar, e dinë shumë mirë se jo qeveri por në korrik është rrëzuar dhe një mbret i fuqishëm nga dinastia e Burbonëve, ashtu siç e dinë se ky popull nuk është se mund të reagoj për Urdhërin e Shën Fugës edhe kur censurohen mediat, pasi 8 vjet të opozitarizmit të Lulzim Bashës nën sqetullën e Edi Ramës ka vrarë nervin qytetar të atyre pak shqiptarëve që po qëndrojnë përballë kësaj qeverie antishqiptare!

Por, sot, ndryshe nga Mbreti Charles X që akuzohej se po përbuzë të gjithë ata që nuk kanë emigruar, Edi Rama ka përballë një armatë të tërë që i përbuzë për shumë vite, brenda dhe jashtë Shqipërisë, në arë ose uzinë, det ose tokë, dhe shkon duke i shtuar radhët e gjithë këtij kontingjenti armiqësor ndaj veprimeve të Kryeministrit!

Edi Rama përbuzë ata që nuk punojnë dhe punëson vetëm patronazhistët e tij, përbuzë Presidentin e Republikës dhe e voton atë të radhës përjetësisht të përbuzur nga partia që drejton.

Kryeministri aktual përbuzë fermerët shqiptarë dhe fton ata të Vuçiçit që përmes Ballkanit të Hapur të na tregojnë se si punohet toka dhe milet lopa!

Pasi i përbuzi mirë minatorët shqiptarë, minierat i la në duart e oligarkëve për të mbushur xhepat e tyre me djersën e minatorëve të përbuzur që përjetësisht ngelën të tillë!

Biznesin e madh dhe të vogël i përbuzi që nga dita e parë kur erdhi në pushtet por jo dhe miqtë oligarkë që deri dje i akuzoi se janë të rivalëve politik.

E gjeti të ndërtuar Rrugën e Kombit dhe përbuzi atë që dinë të bëjë më së miri, përbuzi kombin shqiptar duke i vënë taksë për të lëvizur në këtë rrugë! E la edhe pa Teatër dhe nga ana tjetër e akuzon po këtë komb shqiptar për nivelin e ulët të kulturës që ka!

Shqiparët i la pa toka dhe sot i përbuzë për nuhatjen që kanë për bujqësi dhe të bërit biznes ndryshe nga popujt tjerë të Ballkanit.

Dhe, sado zjarrfikës që ishte Lulzim Basha, 9 vjetëve të kësaj përbuzjeje të pashembullt sot po i shihet llava e terrorit shtetëror, e gatshme të shpërthej. Ashtu si në Parisin e korrikut të vitit 1830, sot në Tiranë temperaturat janë të larta, njerëzit ikin nëpër fshatra por qytetarët e pakënaqur dhe ata që tashmë kanë ngelë pa punë për shkak të politikave qeveritare që mbështesin ardhjen e të huajve për të punuar në Shqipëri, janë të gatshëm për protesta, ashtu siç janë dhe fermerët që kanë filluar të marrin goditjet e para në kurriz nga Ballkani i Hapur, dhe kokën mbajnë nga maja e kraterit të vullkanit të zemërimit.

Këtë situatë, burbonët e Edi Ramës e kanë nuhatur dhe kanë filluar numërimin mbrapsht, të ulin çmimin e derivateve, vajit dhe miellit, duke propaganduar kujdesin e Kryeministrit, por jo duke zmbrapsur edhe qëllimin e organizatorëve të protestës së 7 Korrikut që sot janë më të qartë se kurrë:

Do e përmbysim me siguri regjimin e Edi Ramës!

U organizuan shumë takime, u paralajmërua hapja e sezonit të protestave ndërsa u bindën dhe deputetët e opozitës së përçarë që të marrin pjesë në protestën e 7 Korrikut, por  shqiptarët ndryshe nga herë të tjera janë në pritje të shpalljes së Les Trois Glorieuses /lexo shqip: Tre ditët e lavdishme/ nga lideri i tyre i shpresës, Sali Berisha!

Jo se duan ti bëjnë gati saksitë për policët e Blendi Çuçit meqë edhe protesta fillon në orën 19:00, nuk u besojnë as protestave paqësore si ajo e 21 Janarit që u shpall nga gjykata e Edi Ramës, e kanë të qartë se oficerët e Kryeministrit aktual janë shumë më servil se ata të Mbretit Charles X, por sot shqiptarët janë më të vendosur se kurrë dhe nuk do ti lejojnë asgjë rastësisë, siç i mundësuan kësaj qeverie ti tërheq zvarrë për nëntë vjet, me Basha e McAllister nga më të ndryshmit, me çadra që hapen me ideal demokratik dhe mbyllen me pazaret e Kunatit, me kode zgjedhore që tunden në ambasada dhe shkelen në parlament, dhe të gjitha mediat nën kontrollin e qeverisë që vërtetë nuk mund të nxisin fillimin e Les trois journées de juillet /Lexo shqip: Tre ditët e korrikut/ por as ta ndalojnë atë.

Për këto dhe shumë arsye të tjera, qytetarët e pakënaqur dhe të zemëruar që janë të vendosur ti bashkohen protestës së 7 Korrikut, duan të dinë tre ditët e lavdishme, në mënyrë që të jenë të qartë se cila është dita e tretë dhe e fundit e dinastisë së burbonëve të Edi Ramës!

A do të jetë monarku i këtyre burbonëve në Tiranë apo do të largohet nga kryeqyteti shqiptar, pak rëndësi ka. Në Shqipërinë që po vjen duhet të sundoj ligji, dhe vendimi për fatin e Edi Ramës nuk duhet të jetë në duart e popullit, por, drejtësisë!