S’kanë parti, duan Kryetar!

nga Agim Popoci

Zgjedhjet e 25 Prillit përveç rezultatit përsëritën dhe klimën në Partinë Demokratike kur një lukuni e ministrave, këshilltarëve dhe drejtorëve në pritje të fitores, i vërsulen Kryetarit duke i kërkuar përgjegjësi për humbjen! Madje ata që kërkojnë dorëheqjen e Lulzim Bashës, janë po ata që i kërkuan në vitin 2017, njerëz pa parti!

Pra, s’kanë parti dhe duan për Kryetar atë që vetëm ata e emërojnë!

Hapin gojën dhe firmosin si “intelektual” pa u skuqur fare nga fakti se kur ishin në majat e piramidës së PD, kishin drejtuar një parti pa struktura por me shtabe “ad hoc” që vetëm Sali Berisha i menaxhonte!

Sot, kur strukturat e partisë sërish u krijuan në prag të zgjedhjeve, kur fushatën e drejtoi një njeri anonim që nuk e njeh si demokrat as pasqyra e vetë, kur shumica e drejtuesve politik të qarqeve nuk gjetën dakordësi me strukturat “e zgjedhura” lokale dhe bazën, nuk mori njeri përgjegjësi për humbjen ama vijnë ideologët që ishin në qarkullim të lirë për gjatë gjithë fushatës zgjedhore, për të treguar se Lulzim Basha është fajtori!

Sot Partisë Demokratike nuk i mungon Kryetari por të qenurit Parti, dhe e djathtë natyrisht!

Të përndjekurit politik të regjimit komunist, Dhjetoristët ’90 dhe Ish-Pronarët duhet të jenë themeli i Partisë Demokratike dhe jo lopa nga e cila PD duhet të mjelë vazhdimisht! Ky fakt duhet pasur kujdes edhe kur krijohen strukturat e saj në çdo fshat e qytet.

Pasi të jenë krijuar strukturat, duhet bërë një analizë të paktën nga viti 2005 si erdhi në pushtet PD dhe si u shkatërrua bërthama e kësaj partie që pësoi dhe humbjen spektakolare të vitit 2013! Pse nuk u themelua partia me Kryetarin e ri pas kësaj humbje, faktorët e humbjes në vitin 2017 dhe pse partia u degdis në “liket” e Facebookut, duke e shkëputur lidhjen me bazën?! Vetëm në këtë mënyrë do të përcaktohet situata reale në parti, arsyet madhore që PD humbi zgjedhjet e vitit 2021, qartësimin e atyre megalomanëve të Facebookut që morën shumë më pak vota preferenciale se sa “like”, dhe arsyen më madhore: Cilat ishin arsyet e atyre shqiptarëve që nuk e shitën votën ose refuzuan lekun e Edi dhe Tomës?! Sepse, puna e Drejtuesit politik të PD në Qarkun Kukës, Flamur Hoxha, dhe fitorja e tij spektakolare me 62% e bënë të qartë faktin se shitësit e votës nuk duhen gjykuar, siç po bëjnë disa nga kandidatët e PD; Nëse janë aq kurioz pse nuk duhet gjykuar kjo kategori votuesish, fajtorin e shitjes së votës, këta kandidatë mund ta gjejnë në pasqyrë!  

Dhe jo vetëm kaq! Ndikimi i pushtetit në jetën politike dhe shoqërore, si fajtore kryesor për situatën e krijuar në vend, duhet të hedhet në letër dhe jo të vazhdohet të rrëfehet në kafene, ashtu si dhe devijimi i partisë me arsyen e “kurimit”, në një parti sociale që do ta kishte zili edhe e majta ekstreme.

Ky pushtet do të blejë dhe do të vjedhë vota jo vetëm pse përballë ka Partinë Demokratike por sepse bashkëjeton me krimin. Shit-blerja e votës duke mos u luftuar me mekanizma të duhur, sot është bërë fenomen qesharak dhe për këtë PD-së i duhet një angazhim shumë më i madh; Ndërkohë blerja e komisionerëve dhe numëruesve demokratë nga Edi Rama me shokë, si model i ri i krimit zgjedhor, konfirmoi pse Partia Demokratike duhet të krijohet si parti.

Kurimi i imazhit të Partisë Demokratike u përfol shumë gjatë kësaj fushate zgjedhore madje disa delirant edhe u mburrën me të. PD nuk e kuron imazhin vetëm atëherë kur konstaton Baton Haxhiu! Në situatën e krijuar, Zyrat që merren me mediat dhe komunikimin masiv duhet të shkrihen menjëherë, pa u konsultuar fare pse kanë devijuar nga Platforma e partive të qendrës së Djathtë; Misioni i tyre jo vetëm që ka dështuar por ka favorizuar Partinë Socialiste.  

Partitë e qendrës së djathtë, bazuar në Platformën zyrtare, janë në anën e interesit të biznesit. Shpesh përdorin kapitalizmin “laissez-faire” i cili më shumë karakterizon ndërhyrjen e kufizuara të shtetit në ekonomi se sa kontrollin e  prejardhjes së parasë. Tatimet janë të kufizuara dhe kryesisht përdoren për financimin e programeve që ndihmojnë ushtrinë dhe policinë, dhe shumë nga këta elementë figurojnë në Programin e PD, por jo dhe në performancën e partisë dhe liderit të saj, që për 30 ditë krijuan idenë e një partie që ekziston vetëm për të varfrit; Këtu përfshihet edhe ai i mazhi i shumëpëlqyer nga Batoni!

Anëtaret e qendrës së djathtë janë të shqetësuara për shkak të kërcënimit të sovranitetit dhe traditave kombëtare, që sipas tyre paraqesin shtetasit e huaj që dëshirojnë të jetojnë në vendin e tyre. Dhe, derisa Partisë Demokratike i takon të merret me imigrimin jo vetëm pse është pjesë e Platformës së partive të qendrës së Djathtë, por tashmë është bërë dhe problem kombëtar, kërcënimi i sovranitetit dhe traditave kombëtare duhet të jetë shqetësim edhe më madhor përderisa u promovua gjatë fushatës nga Kryetari i PS, Edi Rama, kur foli për domosdoshmërinë e të ardhurve nga Bangladeshi që nuk dinë shqip! 

Partitë e qendrës së djathtë besojnë se pabarazitë në demokracitë e pjekura janë legjitime dhe se nuk janë rezultat i privilegjeve të rrepta dhe të padrejta. Për këtë arsye, besojnë se shpesh, më keq është ti lejohet qeverisë që të “korrigjoj” privilegjet e padrejta përmes masave ndërhyrëse, theksonSimur Martin Lipset në “Enciklopedia e demokracisë”, dhe atë që nuk e thotë për rastin e Shqipërisë, është se, PD nuk ka më arsye të kompleksohet nga oligarkët, sepse nuk janë të tillë, por janë thjeshtë ca tregtar ordiner miq të Kryeministrit, që kanë emër dhe mbiemër dhe nuk duhet përgjithësuar me ata që janë të pasur dhe bëjnë një punë të ndershme. Ata që për interesa personale nuk nxjerrin dot nga goja emrat, Samir Mane ose Qet Kastrati, nuk mund të gjykohen nëse janë në PS, meqë është parti e shkatërrimit të shtetit dhe kombit; Por, nëse kanë vendosur të militojnë në PD, ata nuk mund ta tërheqin zvarrë misionin e Partisë Demokratike për një grusht eurosh të Qetit ose Samirit.  

Në fund, Politika Sociale. Sipas Platformës, anëtaret e qendrës së djathtë zakonisht besojnë se një shoqëri më së miri funksionon nën ndikimin e besimit që ka rrënjët tek feja. Dyshojnë se problemet siç janë krimi dhe varfëria mund të zgjidhen me inxhinieri sociale, dhe në rastin e Shqipërisë kjo u dëshmua edhe në vepër!

Mungesa e veprimit të një partie të djathtë në Shqipëri na mundësoi të shohim edhe video si ajo e ditëve të fundit, ku njeriu shet votën dhe njëkohësisht zë be në njërin ndër objektet më të shenjta shqiptare, Kishën e Laçit! Degradim, për të cilën më shumë duhet fajësuar Partia Demokratike se partia kriminale PS, e cila e luftoi dhe e lufton besimin fetar! PD duhet ti qëndroj çdo fshatari pranë, për të kuptuar edhe ai që shkon në Mal të Zi dhe bënë punë fizike për të ushqyer familjen, pse shpirti dhe vota nuk duhet të shitet. 

Sot atij nuk duhet kërkuar llogari pse mori 50 mijë lekë për një votë, por me ngritjen e nivelit të edukimit politik dhe fetar, votuesi shqiptarë do ta kuptoj rëndësinë e votës; Do ta kuptoj dhe arsyen pse dështoi përzgjedhja e kandidatëve nga baza në PD dhe ndikimi që kishin listat e hapura në luftën brenda partisë.

Në mënyrë, që edhe atij ti kthehet besimi, si çdo shqiptari, se Partia Demokratike do të bëjë një përzgjedhje ndryshe në të ardhmen dhe kur të vijë në pushtet, ai do të punoj dhe do të qëndroj pranë familjes, në këtë tokë të bekuar nga Zoti

Por, kjo bëhet vetëm atëherë kur shqiptarët do të kenë Partinë Demokratike, parti! Kush do të jetë Kryetari i PD?! Ky nuk është problemi, ai edhe sot është aty, në mesin e demokratëve që aktualisht nuk kanë parti por kokën e kanë të lodhur me Statutin dhe Strukturat e partisë, si dhe sloganin tashmë të zhvlerësuar: Një anëtar, një votë!