PDK akuzon dhe kërkon shkarkimin e ministres Jashtme, përgjigjet Gërvalla…
Pas akuzave të pandërprera nga opozita kundër ministres së Punëve të Jashtme të Kosovës, Donika Gërvalla, sot Shefi i Grupit Parlamentar të PDK-së, Abelard Tahiri, ashpërsoi gjuhën duke thënë se Gërvalla është përfaqësuese e Serbisë në Kosovë dhe se është turpi i diplomacisë. Përgjigjen e mori menjëherë nga Gërvalla në seancë plenare, e cila u sulmua edhe në konferencën për media me homologun kroat, e cila ishte e prerë se nuk ka qenë dhe nuk është dëshmitare në Gjykatën Speciale në Hagë.
“Serbia të ka ty përfaqësues në Kosovë, ti je turpi i diplomacisë së Kosovës me dal me thanë se Gjykata Speciale nuk është bërë nga Serbia është turpi më i madh për qytetarët. Dil kërkoju falje qytetarëve sepse ajo gjykatë është bërë me faktet e sajuara nga qeveria serbe. Kërkoju falje qytetarëve dhe njerëzve që janë atje të akuzuar, kjo gjykatë është bërë prej njerëzve sikur ju me dëshmi të sajuara,” tha Abelard Tahiri i cili me partinë e tij nuk po ambientohet dot në opozitën e Vetëvendosjes duke kaluar dhe në ekstrem me akuza:
“Sot Daçiqi nuk ka nevojë me fol se është Donika Schwarz se atë mbiemrin tjetër po më vjen marre me ta përmend. Ti sot më shumë ngjason me përfaqësuesin e Serbisë në Kosovë sesa me ministren e Punëve të Jashtme. Mjerim për këtë vend, turp i madh. Kërkoju falje viktimave, grave të dhunume. Është turp për ty, ti je përfaqësuese e Serbisë në Kosovë, ti nuk më përfaqëson mu,” tha Shefi i Grupit Parlamentar të PDK-së, Abelard Tahiri, duke kërkuar nga kryeministri Kurti që ta shkarkoj ministren Gërvalla.
“Sot nëse do të kishim një kryeministër të përgjegjshëm sot do duhej me të shkarkua, asnjë minutë s’mundesh me qenë ministre e jashtme. Ti nuk mundesh me qëndrua më në këtë sallë ti duhesh me ecë!”
Çfarë është shkelje dhe çfarë përgjegjshmëri, PDK mori përgjigje nga Ministrja e Jashtme e Kosovës, Donika Gërvalla, e cila duke ju drejtuar deputetëve të PDK-së tha se ata janë fajtorë që prijësit e tyre sot gjenden në Hagë dhe duke e sulmuar atë, nuk do të mund ta gjejnë zgjidhjen e këtij problemi.
“Gjykata Speciale në Hagë nuk është e instaluar nga Serbia, por nga ju. Pse është e instaluar nga ju? Sepse ju jo vetëm që nuk e keni luftuar, por s’keni ndërmarrë asgjë për dënimin dhe gjykimin dhe dënimin e krimeve të pasluftës. Jo vetëm që asgjë nuk keni ndërmarrë, por jeni munduar ta evitoni gjykimin e krimeve në Kosovë dhe ju jeni ata që në këtë formë e keni bërë të mundur Gjykatën Speciale. Ju e keni votuar, ajo s’ka pikuar nga qielli. Të mos bëhemi qesharakë sepse e dimë se si është krijuar Gjykata Speciale. Ky koalicion qeveritar nuk e ka krijuar atë,” u tha Gërvalla deputetëve të PDK-së se tani janë në një kohë kur kanë nevojë për t’u sqaruar se pse e kanë bërë një veprim të tillë, prandaj edhe merren çdo ditë me sajime, gënjeshtra dhe kjo nuk është forma që do të mund t’ia shpjegojnë veprimet e tyre të së kaluarës përkrahësve të partisë.
Por Donika Gërvalla nuk u sulmua vetëm nga deputetët e opozitës. Ndërsa u takua me homolgun kroat, Gordan Grliç-Radman, ajo u pyet nga mediat nëse është dëshmitare e Gjykatës Speciale, mori përgjigje por askush nuk e pasyqroi duke përfshirë dhe meidan që parashtroi pyetjen:
“Për të mos e keqpërdorur vizitën e homologut, për të mos shpenzuar kohën e tij, një përgjigje shumë e shkurtër. Jo, as nuk kam qenë as nuk jam. Mendoj që është përgjigja e mjaftueshme”, tha Gërvalla.
