Vuçiç: Një fuqi e madhe do të kërkojë tërheqjen e KFOR-it dhe UNMIK-ut!

Presidenti i Serbisë, Aleksandar Vuçiç, duke bërë të ditur se një fuqi e madhe do të kërkojë tërheqjen e KFOR-it dhe UNMIK-ut vlerësoi se kjo do të ishte katastrofë për të gjithë. Nuk mund të flas, tha ai, për cilën fuqi të madhe është fjala, por saktësoi se kemi të bëjmë me të dhëna të inteligjencës nga burime zyrtare.

Këtë deklaratë Presidenti i Serbisë e bëri në kazermën “Dedinje” ku u hap një pikë e vaksinimit ndërsa shtoi se lidhur me çështjen e KFOR-it dhe UNMIK-ut do të flasë me Sekretarin e Përgjithshëm të NATO-s, Jens Stoltenberg, me të cilin pritet të takohet më 17 maj në Bruksel.

“Kemi marrë informacione se një nga fuqitë e mëdha së shpejti do të bëjë një kërkesë zyrtare për tërheqjen e KFOR-it dhe UNMIK-ut nga Kosova. Do të flas me Stoltenbergun për të bërë gjithçka që është e mundur që kjo të mos ndodhë,” tha Vuçiç duke u munduar me shifra nga buxheti ushtarak të tregoj se nuk ka frikë, por:

“Prishtina ka paralajmëruar se në vit do të ndajë 100 milionë euro për ushtri, që nuk krahasohet me Serbinë e cila tashmë ka arritë 2 miliardë euro. Nuk duhet të kemi frikë, por e kemi të qartë se cili është qëllimi i dikujt.”

Në fund, Presidenti i Serbisë, Aleksandar Vuçiç, u mburr se si i ka përballuar presionet e SHBA dhe nuk i ka plotësuar kërkesat amerikane, gjë që sipas tij nuk arriti ta bëjë Izraeli.