Bombardohet Al-Jalaa në Gazë, IDF sqaron pse pësuan zyrat e Al Jazzera, AP dhe AFP…
Pas bombardimit të shumëkatëshes Al-Jalaa në Gazë ku ishin të vendosura zyrat e televizionit Al Jazeera, Agjencisë Associated Press dhe France Presse, Forcat Mbrojtëse të Izraelit, IDF, kanë sqaruar rrethanat në të cilat u bombardua kjo shumëkatëshe duke shtuar se ishte një sulm i paralajmëruar ku forcat izraelite i kishin dhënë një orë kohë punëtorëve të këtyre mediave që të largohen nga godina.
“Godinat e banimit në zonën e Rripit të Gazës, Hamas i ka shndërruar në fortesa ushtarake. Godinat e mëdha në Gazë po i përdor për disa qëllime ushtarake, siç është mbledhja e të dhënave sekrete, planifikimi i sulmeve, komandimi dhe mbikëqyrja si dhe komunikimi. Kur Hamas shfrytëzon godinën e madhe për qëllime ushtarake, ajo bëhet shënjestër ligjore ushtarake,” thekson IDF duke sqaruar se gjatë ditëve të fundit ka goditur disa godina të tilla, por para se ti bombardojnë kemi ndërmarrë masa që civilët të mos dëmtohen.
“I kemi thirrë banorët e godinës dhe ju kemi tërhequr vërejtjen që të largohen. Kemi dërguar SMS. Kemi gjuajtur bomba që lëshojnë zë fuqishëm dhe godasin vetëm çatinë. Kemi siguruar mjaft kohë për evakuim. Do ta përsërisim, kur Hamas vendos paisjet ushtarake brenda një godine të tillë, ajo bëhet shënjestër ligjore ushtarake. Kjo është e drejtë ndërkombëtare e qartë,” thekson IDF duke shtuar se të gjitha shumëkatëshet që janë qëlluar nga kjo forcë janë përdor për qëllime ushtarake.
Associated Press tha se është e shokuar dhe tmerruar nga sulmi izraelit në ndërtesën ku gjendeshin zyrat e AP-së.
AP tha se ishte paralajmëruar për sulmin, gjë që i mundësoi të evakuojë gazetarët me kohë. Ndërsa Al Jazeera tha se nuk do të hesht pas sulmit.
“Është e qartë se ata që po bëjnë këtë luftë nuk dëshirojnë vetëm të përhapin shkatërrim dhe vdekje në Gaza, por edhe të heshtin media që dëshmojnë, dokumentojnë dhe raportojnë të vërtetën e asaj që po ndodh në Gaza. Por kjo është e pamundur,” tha shefi i zyrës së Al Jazeera-s në Jerusalem, Walid al -Omari.
Zëdhënësja e Shtëpisë së Bardhë, Jen Psaki, tha se SHBA ka porositur Izraelin se duhet të kujdeset për sigurinë e gazetarëve pasi ushtria ka bombarduar godinën me zyrat e mediave të huaja të cilat janë shokuar dhe janë shumë shqetësuar shumë, por Izraeli për këto zhvillime akuzon Hamasin.
“Kemi komunikuar drejtëpërdrejtë me izraelitët se siguria e gazetarëve dhe mediave të pavarura është përgjegjësia më e rëndësishme,” tha Psaki përmes rrjetit social Twitter.
Ndryshe, deri sa diplomatët amerikan dhe ata arab vazhdojnë të kërkojnë mënyrën për ndalimin e dhunës, avionët izraelit vazhdojnë me sulmet ajrore në Gazë, ashtu si dhe Hamasi duke lëshuar raketa në drejtim të Izraelit.
