Presidenti i Serbisë nuk pajtohet me qëndrimin për mosndryshimin e kufijve

Në Brdo të Sllovenisë, ka përfunduar Samiti i shefave të shteteve të rajonit të Ballkanit Perëndimor, që është në kuadër të nismës së përbashkët të Sllovenisë dhe Kroacisë Brdo-Brijuni. Presidenti i Serbisë, Aleksandar Vuçiç është larguar para përfundimit të samitit, me arsyetimin se ka takime në selinë e NATO-s në Bruksel. Ai citohet t’u ketë thënë gazetarëve serbë se nuk ka pranuar që në konkluzionet e takimit, të përmendet mosndryshimi i kufijve në rajon, pa u përfshirë edhe kërkesa e Serbisë, që kjo të nënkuptojë “mosndryshimin e kufijve të njohur nga Organizata e Kombeve të Bashkuara”, që sipas tij, nuk është pranuar nga presidentja e Kosovës.

Vuçiq ka insistuar se Kosova është “pjesë e Serbisë” dhe se “me shpalljen e pavarësisë së Kosovës po ashtu nuk është respektuar parimi i mosndryshimit të kufijve”.

Në këtë nismë ka për qëllim të ndihmojë vendet e rajonit në procesin e integrimeve evropiane morën pjesë presidentja e Kosovës, Vjosa Osmani, ai i Shqipërisë, Ilir Meta, Malit të Zi, Milo Gjukanoviç, Stevo Pendarovski i Maqedonisë së Veriut, Aleksandar Vuçiç i Serbisë ndërsa nga Bosnja e Hercegoinva janë ftuar të tre anëtarët e presidencës, Shefik Xhaferoviç, Zheljko Komshiç dhe Milorad Dodik.

Para samitit në Brdo, Presidenti i Sllovenisë, Borut Pahor ka zhvilluar disa vizita përgatitore nëpër vendet e rajonit. Ai dje në Bled të Sllovenisë ka zhvilluar një takim edhe me Presidentin e Kroacisë, Zoran Milanoviç, bashkëkryesuesin e samitit të sotëm.

Milanoviç tha se qëllimi i takimit është që t’u ndihmohet fqinjëve që “sa më shpejtë dhe sa më lehtë, nëse është e mundur, të hyjnë në Bashkimin Evropian”.

Presidenti i Sllovenisë, Borut Pahor, tha në prag të takimit se me rëndësi të madhe është që të formohet një qëndrim i përbashkët për zgjerim më të shpejtë të BE-së në Ballkanin Perëndimor dhe në të njëjtën kohë edhe qëndrimi për reforma që duhet t’i kryejnë këto vende për ta arritur këtë qëllim.

“Nëse do të kemi sukses në këtë drejtim do të jetë një arritje dhe një shpërblim për kurajon e këtij procesi, pasi shumica e liderëve nga rajoni para dhjetë vjetësh nuk kishin fare raporte dhe nuk bisedonin mes vete,” tha Pahor duke paralajmëruar se do të ketë biseda të hapura në këtë samit.

Ai ka shprehur bindjen se konkluzat që do të miratohen do të jenë një hap i madh përpara në perspektivën evropiane të Ballkanit Perëndimor.

Sipas draftit të kësaj deklarate të përbashkët, do të bëhet ftesë për një qasje të përbashkët në procesin e zgjerimit të BE-së. Po ashtu edhe për bashkëpunim më të madh mes vendeve të rajonit.

Gjatë ditës, në kulisat e samitit në Brdo janë zhvilluar edhe një varg takimesh dypalëshe. Presidentja e Kosovës, Osmani u takua me homologun e saj kroat, Zoran Milanoviç, me të cilin ka biseduar për thellimin e bashkëpunimit në mes të dy vendeve, veçmas në zbardhjen e fatit të të zhdukurve me dhunë gjatë luftës.

“Temat që do të diskutohen në takimin në Bërdo afër Kranjit janë: rëndësia e procesit Bërdo-Brijoni në 10- vjetorin e tij, adresimi i pasojave të COVID-19, rimëkëmbja ekonomike dhe plani investiv i BE-së, zgjerimi i BE-së si prioritet gjeostrategjik, si dhe përmbyllja e projektit të Evropës së bashkuar me përfshirjen e shteteve te Ballkanit Perëndimor”, thuhet në komunikatën e Zyrës së presidentes së Kosovës duke paralajmëruar takime me homologët nga Shqipëria, Mali i Zi dhe Maqedonia e Veriut./RFE/