Sekuestrohen 400 kg kokainë, Policia e Kosovës: 7 të arrestuar, në kërkim…

Shtatë persona janë arrestuar si të dyshuar gjatë një operacioni policor ku u sekuestruan 400 kilogramë substancë narkotike që dyshohet se është e llojit kokainë, ka bërë të ditur Policia e Kosovës duke shtuar se janë në kërkim edhe disa personave të tjerë të dyshuar.

“Gjatë këtij operacioni policor deri më tani janë arrestuar shtatë persona shtetas të Republikës së Kosovës dhe janë konfiskuar 400 kg substancë narkotike që dyshohet të jetë kokainë, një armë dhe vetura të ndryshme, kamionëve dhe gjësendeve tjera,” tha Drejtori i Përgjithshëm i Policisë së Kosovës, Sabedin Mehmeti, duke shtuar:

“Personave të arrestuar, në konsultim me prokurorinë kompetent u është caktuar masa e ndalimit deri në vazhdimin e procedurave të tjera gjyqësore. Lidhur me këtë rast Policia e Kosovës është në kërkim edhe të disa personave të tjerë të dyshuar tashmë të njohur për Policinë dhe që dyshohet se kanë qenë pjesë e këtij grupi kriminal.”

Për 400 kilogramë kokainë që u kapën në një konteiner me mish që vinte nga Brazili, Drejtori i Përgjithshëm i Policisë së Kosovës dha detaje deri në sekuestrim:

“Dërgesa në Kosovë ka ardhur më datë 15 maj, dhe palët sot kanë filluar aktivitetin kriminal për tërheqjen e saj. Policia ka arrestuar personat e dyshuar. Prokurori i rastit ka autorizuar bastisjen edhe disa lokacioneve tjera.

Dërgesa kishte destinacion edhe shtete të tjera dhe deri më tani janë arrestuar shtatë persona shtetas kosovarë. Janë konfiskuar edhe telefona, vetura edhe një armë.Ngarkesa është ndalur në parkingun e një depoje mirëpo gjatë tërë kohës u mbikëqyr nga Policia. Sot rreth orës 11 të dyshuarit kanë filluar aktivitetin kriminal. Policia ka ndërhyrë. Kanë arritur të  arrestojnë të dyshuarit ku ishin rreth 400 kg narkotikë të llojit kokainë. Janë bastisur edhe lokacione të tjera.Besohet se kamioni ka ardhur nga Brazili duke kaluar nga disa shtete përmes Kosovës.Kokaina ishte e fshehur në pako të llojeve të ndryshme të mishit. Operacioni po vazhdon, mund të ketë edhe arrestime të tjera.”

Ndërsa Kryeprokurori i Kosovës, Aleksandër Lumezi, tha se sekuestrimi i 400 kilogramëve kokainë në qytetin e Lipjanit është bërë në bashkëpunim të ngushtë me autoritetet e Shqipërisë dhe shtetit të Italisë. Gjatë hetimit, tha ai, janë përdorur mjete të fshehta hetimore teksa ka shtuar se do të luftohet krimi i organziuar.

“Policia e Kosovës, në bashkëpunim të ngushtë me policinë, autoritet italiane dhe auto amerikane. Janë konfiskuar 400 kg kokainë vlera e të cilave arrinë rreth 20 milionë euro. Po ashtu janë konfiskuar disa makina dhe mjete tjera. Gjatë hetimit janë përdorur masa të fshehta duke shikuar lëvizjen e të dyshuarve nga Italia deri në vendin tonë. Ju dërgojmë mesazh të qartë të gjitha grupeve kriminale se do të përballen me drejtësinë. Jemi të vetëdijshëm se nuk mund të luftohen nga një shtet i vetëm. Ashtu kemi bashkëpunuar me shtete tjera duke e ditur se krimi mund të na prek të gjithëve. kemi arritur të mposhtim krimin e organizuar. Më lini të falënderoj prokurorët e Shqipërisë, Prokurorët Italianë, policinë shqiptare dhe policinë e Italisë,” tha Kryeprokurori i Kosovës, Aleksandër Lumezi. 

Ndryshe, në fillim mediat në Tiranë raportuan për sekuestrimin e 2.2 ton kokainë ndërsa organet në Kosovë refuzuan të raportojnë për aksionin policor i cili vijon dhe vetëm në orët e mbrëmbjes Policia dhe Prokuroria në një konferencë të përbashkët ku ishte dhe kreu i SPAK, Arben Kraja dhanë detajet lidhur me rastin.

Kraja tha se hetimet kanë nisur që në momentet e para që ka ardhur informacioni nga autoritetet e huaja ku është përfshirë SPAK deri në kapjen e 400 kg kokainë në Lipjan.

“SPAK a qenë e përfshirë në hetimin e këtij rasti që në momentet e para që ka ardhur informacioni nga autoritetet e huaja me të cilat ne bashkëpunojmë në mënyrë të vazhdueshme dhe jemi këtu sot me produktin që kemi arritur.

Ka dy momente që duhen vlerësuar në këtë rast. Momenti i parë që organizatat apo grupet e strukturuara kriminale ushtrojnë aktivitetin në një territor shumë të gjerë, nga Brazili deri në Kosovë, duke kaluar në shumë territore dhe kjo tregon që kanë rritur shkallën e rrezikshmërisë së tyre. Por nga ana tjetër reagimi që bëjnë institucionet tona, duke filluar nga autoritetet e huaja shqiptare, të Kosovës, italiane tregon që nëse do jem itë gjithë bashkë, do koordinojmë me njëri-tjetrin pa diskutim që do jemi të suksesshëm dhe besoj që bllokimi i një sasie të tillë tregon që efektiviteti i strukturave tona ishte në lartësinë e duhur. Duhet ta kemi të qartë të gjithë që ne e kemi seriozisht dhe jemi të vendosur që deri në fund të luftojmë raste të tilla. Ky është një mesazh për të gjithë ata që mund t’iu shkojë mendja të merren me aktivitete të tilla kriminale. Dua të falënderoj të gjitha autoritetet që kanë bashkëpunuar për këtë hetim,” përfundoi kreu i SPAK, Arben Kraja.