25 Prilli në Qarkun Gjirokastër, KAS rrëzon kërkesën e PD dhe LSI

Komisioni i Ankesave dhe Sanksioneve, KAS, ka rrëzuar me shumicë votash ankimimet e PD, LSI dhe kandidatit të pavarur Kreshnik Merxhani, lidhur me parregullsitë e pretenduara prej tyre gjatë dhe pas votimit, në zgjedhjet e 25 prillit në Qarkun Gjirokastër.

“KAS për miratimin në zonën zgjedhore të Qarkut Gjirokastër, me shumicë votash, vendosi rrëzimin e kërkesës ankimore të paraqitur nga PD dhe rrëzimin e ankesës ankimore të paraqitur nga Kreshnik Merxhani. Ky vendim hynë në fuqi menjëherë dhe paraqitet në fletoren zyrtare. Për këtë vendim bëhet apelim në Kolegjin Zgjedhor, brenda pesë ditëve nga dhënia e vendimit,” u shpreh anëtari i KAS, Ledio Braho.

Ndryshe, Partia Demokratike, Lëvizja Socialiste për Integrim dhe kandidati i pavarur në zgjedhjet e 25 prillit për Qarkun Gjirokastër, Kreshnik Merxhani, pretenduan disa parregullsi para dhe gjatë procesit zgjedhor por me provat e tyre nuk bindën KAS.

Beteja ligjore, sipas paralajmërimeve të palëve ankimore vijon në Kolegjin Zgjedhor.