Lirohen nga detyra ambasadorët e emëruar politikë
Presidentja e Kosovës, Vjosa Osmani, me kërkesën e Ministres së Punëve të Jashtme dhe Diasporës, Donika Gërvalla, ka liruar nga detyra të gjithë ambasadorët e Kosovës, që ishin të emëruar politikë.
Këtë e ka konfirmuar për RFE, Bekim Kupina, nga Zyra për informim e Presidencës se Kosovës.
Ministria e Punëve të Jashtme dhe Diasporës i ka dorëzuar gjatë kësaj jave Presidentes së Kosovës, Vjosa Osmani, propozimin për lirim nga detyra dhe tërheqje nga misioni diplomatik, për të gjithë ambasadorët e Republikës së Kosovës, të emëruar politikë.
Largimin nga pozita e ambasadorit, e ka konfirmuar edhe Ambasadori i Kosovës në Australi, Hajdin Abazi, përmes një postimi në Facebook të enjten.
“Në ditën që bëra fiks dy vjet nga prezantimi i kredencialeve në Australi, nga Presidentja e Kosovës më erdhi Dekreti për lirimin nga detyra”, ka shkruar ai, duke shtuar se kërkesa e Qeverisë për lirimin e tij në gjysmë të mandatit “nuk është praktikë e dinjitetshme në diplomaci,” thekson Abazi.
Mediat në Kosovë kanë, raportuar se bëhet fjalë për largimin e 12 ambasadorëve.
Ushtruesi i detyrës së kryetarit të Partisë Demokratike të Kosovës, Enver Hoxhaj, propozimin e Qeverisë së Kosovës për lirimin nga detyra të të gjithë ambasadorëve të Kosovës të emëruar politik, e ka konsideruar si pezullim të politikës së jashtme të Kosovës. Sipas tij, ky vendim përbën skandalin më të madh në politikën e jashtme.
Sipas ligjit për Ministrinë e Punëve të Jashtme dhe Shërbimin Diplomatik, së paku pesëdhjetë për qind të emërimeve të Ambasadorëve dhe Shefave të Misioneve, duhet të bëhet nga anëtarët në detyrë të Shërbimit të Jashtëm të Republikës së Kosovës.
Pjesa tjetër e të emëruarve mund të jenë të emëruar politik.
Procedurat ligjore për emërimin e ambasadorëve të rinj marrin kohë, raporton RFE. Pas propozimit të Ministrisë së Jashtme, që bëhet në koordinim me kryeministrin, emrat për ambasadorë dërgohen në Komisionin për Politikë të Jashtme të Kuvendit të Kosovës. Ky komision pastaj i dërgon emrat në Presidencë, ku pason dekretimi nga ana e presidentit të Republikës. Por, procedura nuk përfundon me kaq. Shteti pranues duhet të japë pëlqimin për ambasadorin e ri, procedurë kjo që mund të marrë disa muaj kohë.
