Me ministrin Roth, Rama: Humbja e atyre që ishin, janë dhe do mbeten në opozitë…
Do të ishte çlirim i madh nëse do çeleshin negociatat me BE-në, por pas kaq kohë pritjeje nëse kjo gjë nuk ndodh, Kryeministri Edi Rama pas takimit me ministrin gjerman për Europën, Michael Roth, tha se nuk do të jetë i shqetësuar si dy herët e para, edhe pse dy herë në sy të publikut ai festoi duke thënë se negociatat u çelën..
Fajtor ekskluziv për konfliktin e krijuar me opozitën me shkatërrimin e procesit zgjedhor më 25 Prill, Edi Rama sot tha se nga konflikti mes opozitës dhe pozitës, ajo që humbet është Shqipëria ndërsa është i bindur edhe në sy të ministrit gjerman i cili u pas e nuk i interesojnë më zgjedhjet e lira dhe të ndershme:
“Ne ishim, jemi dhe do të jemi në qeveri dhe humbja e atyre që ishin, janë dhe do të mbeten në opozitë është shumë pak krahasuar me atë se çfarë humbet Shqipëria. Një nga gjërat që ne do të bëjmë më mirë është edhe përpjekja për t’u marrë vesh me njëri-tjetrin jo për të rënë dakord, për t’u kuptuar kur flasim, për t’u bërë pak më të mëdhenj, për ta kaluar fazën e adoleshencës politike që më pas e eksportojmë në Bruksel dhe Bundestag,” tha Kryeministri Rama duke dhënë madje dhe leksione demokracie:
“Ne nuk duhet të presim miqtë tanë që vijnë nga Europa dhe të na thonë gjeni gjuhën. Këtu është thjeshtë dhe vetëm një kërkesë shumë alarmante dhe e kahershme. Ne duhet të tregojmë se jo vetëm e meritojmë për detyrat që kemi bërë, por edhe se jemi një vend i maturuar,” tha Rama duke shtuar se kur flasim anglisht duhet të jemi shqiptar në radhë të parë dhe kur flasim shqip, jemi edhe demokratë edhe socialistë.
“Të gjithë jemi të përfshirë në një luftë që ka shkuar deri në absurd. Kush ka pasur më shumë përgjegjësi do ta thotë populli, por populli e tha me 25 prill. Ne kemi miq dhe aleatë të mëdhenj. Edhe vendet skeptike e duan vendin tonë aleat. Ndahen se sa shpejt dhe sa vonë, por kjo nuk është çështja jonë.”
Dhe jo vetëm kaq! Deri sa ministri Roth po heshtte dhe Kryeministri Rama po mburrej me reformat që ka bërë, ai vazhdoi duke thënë se Ne nuk i bëjmë reformat, nuk i bëjmë përpjekjet se na i kërkojnë në Berlin, Paris apo Bruksel, i bëjmë se bëjmë gjënë e duhur për Shqipërinë dhe shqiptarët.
Ndërsa se çfarë ndodh dhe si ndodh dhe kur ndodh me njohjen dhe afirmimin e punëve të bëra nga ne, kjo nuk është detyra jonë. Kjo është puna e të zotërinjve të asaj shtëpie që janë anëtarët e BE dhe të KE. Ndaj ndahet, bashkohet, s’bashkohet njëri me tjetrin, apo të tjerët me të tjerët, kjo nuk është çështja jonë, por e KE. Sepse është shumë e qartë se vendimmarrja në KE lidhet në këtë situatë me çfarë duan të bëjnë ata dhe jo me çfarë kemi bërë ne, ne do të vazhdojmë të bëjmë pune tonë. Ne jemi de-facto në disa aspekte më përpara se ata që negociojnë por kjo nuk do të thotë asgjë, se ne po bëjmë dëtyerën dhe do e bëjmë. Për mua sfida është se si të rrisim kërkesën ndaj vetes dhe si të bëjmë më shumë për veten. nëse nuk do të vijë dhe do të vonojë, ne do të vazhdojmë që të bëjmë punë.
Nuk shoh ndryshim mes këtyre të dyjave, këto janë aspekte të rëndësishme formale. Përmbajtja e procesit s’na e pengon kush që të punojmë. Ne punojmë me partnerët dhe BE dhe miqtë gjerman dhe me të tjerët. Reforma në drejtësi nuk do të ndalojë se u hapën apo nuk u hapën dyert për Shqipërinë dhe Maqedoninë e Veriut. Reforma e drejtësisë do vazhdojë. Sfida jonë është se si ta çojmë edhe më larg çdo arritje në këtë punë. E dimë vetë të parët, ky është fillimi i një rruge të gjatë, spo kërkojmë që të futemi në Be. E kanë bërë disa sikur ne do shkojmë në 23 dhe do vëmë vetot tona. Do na e japin, sdo na e japin, është çështje kohe.”
Ministri gjerman për Europën, Michael Roth, sot në Tiranë sikur kishte turp se Edi Rama i vjedhi zgjedhjet nga meraku mos po i dështon Këshilli Europian që zhvillohet më 22 Qershor duke theksuar se madje po bëhet presion që Shqipëria të marrë një vendim pozitiv për mbajtjen e konferencës së parë ndërqeveritare dhe ky proces të mund të nisë.
Me këtë rast Roth foli për arritjet e Shqipërisë por nuk i zuri në gojë zgjedhjet e 25 Prillit thuajse janë zhvilluar në vitin 1991 ndërsa u shpreh pro çeljes formale të negociatave.
“Është bukur që të jesh sërish këtu, se di nëse ju ka marrë malli, por mua më ka për ju po dhe jam i gëzuar që të mund të tregoj sot dhe një shenjë solidaritetit nga ana e Gjermanisë kundrejt Ballkanit Perëndimor, por para së gjithash kundrejt Shqipërisë.
Ka kolegë në BE që thonë se ndoshta zemra ime rreh ca si shumë për Ballkanin Perëndimor. Unë përgjigjem gjithmonë që këtu nuk bëhet fjalë për preferencat e mia personale por një interes strategjik të spikatur të BE. Ballkani Perëndimor nuk është oborri i pasmë, por i brendshëm i Europës. Paqja, stabiliteti, mirëqenia, shteti ligjor, pajtimi rajonal janë në interesin europian dhe gjerman. Shumë prej jush janë të zhgënjyer nga BE sepse në të shkuarën është bërë shumëçka dhe ju të gjithë e dini që ka pasur kushte të tjera për të plotësuar nga Shqipëria sikurse ka qenë funksionaliteti i Gjykatës Kushtetuese dhe i Gjykatës së Lartë. Shqipëria ka shënuar arritje, ashtu sikurse mund të thuhet dhe për Maqedoninë e Veriut. Për këtë arsye ne po punojmë me trysni që më 22 qershor Këshilli i Ministrave të Evropës të mund të marrë një vendim pozitiv, duhet që më në fund të nisim.
Sigurisht që ka shumëçka për t’u bërë ende. Jemi thjesht në fillim të një rruge, shteti ligjor, një sistem drejtësie funksional, një administratë moderne, qasje me respekt kundrejt pakicave. Ne nuk jemi thjesht një komunitet ekonomik dhe monetar, por jemi një komunitet vlerash. Pandemia ka treguar që ne jemi të tërë në një bark. Ju keni arritur progres të madh, respekti im. Ne në Gjermani nuk jemi ende në një pikë, ne duhet ende të mbajmë maska. Nuk na ndihmojmë masat e izolimit, të gjithë duhet të mbështesim njeri-tjetrin. Është në interesin tonë që strategjia e përbashkët është që të mbështetemi në mënyrë reciproke,” tha Roth duke shtuar:
“BE nuk lë askënd vetëm në këtë drejtim. Deri në 12 mld euro do vendosim në dispozicion për Ballkanin Perëndimor për të amortizuar pasojat e pandemisë. Nuk e them këtë si një xhaxha bujar. Nuk dua që të krijohet përshtypja që Rusia dhe Kina të jenë shumë më të angazhuara në rajon. Unë premtoj më tepër angazhim nga të gjitha shtetet anëtare. Ju mund të keni besim tek Gjermania, por pikërisht se duhet të marrim vendime të njëzëshme duhet të përfshihen të gjithë partnerët. Tani ka një problem mes Maqedonisë së Veriut dhe Bullgarisë. Unë jam tepër mirënjohës presidencës portugeze që ata janë duke vijuar linjën e pres gjermane. Për këtë kemi nevojë për politikanë të guximshëm që janë të gatshëm të ndërtojnë ura. Dua të shpreh urimet e mia kundrejt Kryeministri që me partinë e tij, arriti një rezultat të qartë.”
Pas lëvdatave për punën e qeverisë shqiptare që zili i kishte edhe Kryeministrit Edi Rama, ministri gjerman Michael Roth u pyet nëse ka vende skeptike në Bashkimin Europian për hapjen e negociatave.
“Pandemia na ka ndryshuar të gjithëve. Ndoshta diçka është zhvilluar në drejtim jo aq pozitiv por shumëçka në drejtim pozitiv. Është një krizë që na ka ndikuar të gjithëve. Çka e bën praninë e secilit prej nesh të nevojshme.
Vendet të cilat janë të drejtuar nga regresioni dhe revanshizmi nuk janë me perspektivë në të ardhmen. Në Evropë kemi një situatë të privilegjuar, ky rajon ndryshon nga ai lindori. Gjendja në vendet e Ballkanit Perëndimor është e ndryshme. Në Lindje nuk ekziston për të gjitha perspektiva e anëtarësimit. Për Shqipërinë dhe Maqedoninë e Veriut klima është bërë më pozitive dhe në kontekstin e pandemisë kemi një perspektivë më miqësore drejtuar vendeve të Ballkanit Perëndimor. Për momentin konstatoj vetëm një problem, por nuk ka të bëjë me Shqipërinë. Është një problem mes Bullgarisë dhe Maqedonisë së Veriut. Ne po e trajtojmë dhe unë kam qenë dje atje për të biseduar si mund të eliminohet një konflikt i tillë,” tha Roth duke e cilësuar si autokritikë deklaratën që BE duhet të mbajë premtimet e veta për Shqipërinë, duke qenë se tashmë i ka përmbushur kushtet dhe se problemi i vetëm është ngërçi mes Maqedonisë së Veriut dhe Bullgarisë.
“BE duhet të mbajë premtimet e veta dhe këtë e them në mënyrë autokritike. për shembull liberalizimi i vizave duhet të ishte përmbushur prej kohësh. Po kështu edhe sot është e njëjta gjë, kushtet janë përmbushur dhe duhet të mbajmë fjalën. Por Europa është strukturuar mbi arritjen e konsensusit. Ne në fund duhet që të gjitha shtetet e BE të mbajnë përgjegjësitë e tyre. Jam i detyruar të jem racional sepse jam i bindur që me argumente të mira mund të kapërcehet dhe skepticizmi. Ky është një proces ku të gjithë duhet të mbajnë përgjegjësitë e tyre,” tha ministri i Shtetit për Europën, Michael Roth, duke folur për reforma të Edi Ramës që shqiptarët as nuk i njohin dhe as nuk i shijojnë ndërsa përfundoi:
“Konsolidimi i shtetit ligjor, pavarësia e sistemit të drejtësisë, liria e mediave, larmia e mediave, lufta e vendosur kundër korrupsionin dhe krimit të organizuar nuk janë një dhuratë që i bëhen Brukselit, Varshavës, Parisit apo Berlinit, por reforma në të shërbim të vendit tuaj, sigurisht ato ndihmojnë në kapërcimin e skepticizmit. Ndaj diskutojmë në BE jo si një treg i brendshëm, por një sistem vlerash. Ne kemi ndërfutur mekanizma të rinj, mekanizmin e dialogut për shtetin ligjor, apo që shtetet anëtare të marrin më pak fonde në momentin që nuk i nënshtrohen parimeve të shtetit ligjor.”
Më 22 Qershor tashmë është e qartë se çfarë do tu thotë ministri gjerman i Shtetit për Europën, Michael Roth, homologëve të tij nga BE por nuk është e qartë se çfarë do ti thotë nesër kur ta takoj Kryetarin e PD, Lulzim Basha, pasi i pranoj faktin Edi Ramës se ai ishte, është dhe do të jetë në qeveri dhe kanë humbur ata që ishin, janë dhe do të mbeten në opozitë!
