Sot Kongresi i jashtëzakonshëm i PS, edhe pse në stadium ka rend të ditës

Partia Socialiste do të mbledhë sot në orën 17:30 Kongresin e jashtëzakonshëm. Edhe pse zhvillohet në stadiumin “Air Albania” ai ka një rend të ditës dhe pse kanë kaluar vetëm disa ditë nga fitorja e zgjedhjeve parlamentare, Partia Socialiste sot do të paraqesë vizionin për Shqipërinë 2030.

Sekretari i Përgjithshëm i PS, Taulant Balla, tha se Kongresi do të nisë me surpriza të bukura, duke vijuar me analizën e thellë në të gjitha strukturat e Partisë Socialiste, ku Balla paralajmëroi një analizën e gjërave që nuk janë bërë mirë si në zgjedhjet e fundit, ashtu dhe atyre të vitit 2013 dhe 2017.

Asambleja e Përgjithshme e PS, në ditën kur mori vendimin për thirrjen e Kongresit të jashtëzakonshëm miratoi këtë rend të ditës.

1. Hapja e Kongresit (Himni Kombëtar);

2. Rrugëtimi i Partisë Socialiste prej 12 Qershorit 1991;

3. Vizioni për Shqipërinë 2030 dhe Programi Qeverisës në Mandatin e Ri.

4. Miratimi i Vendimeve të Asamblesë Kombëtare të Partisë:

a. Vendim “Për ngritjen dhe funksionimin e Komisionit të Posaçëm të Analizës për Zgjedhjet e Përgjithshme të 25 Prill 2021”;

b. Vendim “Për zhvillimin e analizave për rezultatin e zgjedhjeve të përgjithshme të 25 Prillit 2021”;

c. Vendim “Për zgjedhjet e reja në strukturat vendore të partisë”;

d. Vendim “Për zhvillimin e fushatës së anëtarësimeve të reja në parti”;

e. Vendim “Për përfundimin e procesit të ngritjes dhe funksionimit të Regjistrit Digjital të Partisë”;

f. Vendim “Për miratimin e Kalendarit Politiko-Organizativ të Partisë për periudhën Qershor-Dhjetor 2021”.