Kaloi 3 shtete, kamioni me 300 kg kokainë kapet në Portin e Durrësit. Ja si u zbulua droga…

 Kamioni me 300 kg kokainë i cili është nisur nga Belgjika, më pas tranzit ka kaluar nëpër Serbi, Maqedoninë e Veriut dhe Shqipëri, u kap në Portin e Durrësit gjatë rrugëtimit të tij drejt Italisë.

Drejtuesi i mjetit, shtetasi Nafiz Ajrofski, 40 vjeç, nga Maqedonia e Veriut, kishte hyrë në vendin tonë nga Qafë-Thana dhe nesër do të nisej drejt Italisë. BW raporton se ende nuk dihet nëse droga do të transportohej për në qytetin italian, Napoli apo prej aty, do të drejtohej për ndonjë shtet tjetër të BE, ndërsa po hetohet më tej për një rrjet kriminal i shtrirë në tre shtete, Maqedoni të Veriut, Shqipëri dhe Itali.

Por, gjatë kontrollit në vijën e dytë të pikës kufitare të Portit u vu re diçka e dyshimtë në trupin e mjetit, i cili më pas iu nënshtrua kontrollit të imtësimshëm. Pasi u shkarkua malli, ngarkesë hekuri e cila do të shkonte drejt Italisë, në trupin e mjetit u gjetën 40 pako, të cilat ishin ambalazhuar me logon e 6 kompanive të ndryshme, që nga skuadra e basketbollit e deri tek firma të njohura të modës, nga “Dior”, “Chikago Bulls” e deri te ekipi parisien “Paris Saint Germain”.

Ndërkohë, shoferi i cili tashmë është arrestuar, Nazif Ajrofski gjatë momentit të ndalimit është shprehur i habitur se nuk kishte dijeni për drogën.

Grupi hetimor, nën drejtimin e Prokurorisë së Rrethit Gjyqësor Durrës vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.