Deçan, 2 të vdekur dhe mbi 800 të helmuar, shpallet gjendje e jashtëzakonshme

Mbi 800 persona kanë marrë trajtim mjekësor në Qendrën Kryesore të Mjekësisë Familjare në Deçan pasi dyshohet se kanë pasur simptoma të helmimit ndërkohë dy persona që gjatë ditës së djeshme kërkuan ndihmë pas dyshimeve për helmi nga uji, kanë vdekur. Kryetari i Komunës së Deçanit, Bashkim Ramosaj, ka bërë me dije se ka marrë vendim për shpalljen e gjendjes se jashtëzakonshme në këtë komunë.

Ky helmim dyshohet se ka ardhur nga uji i pijes, e lidhur me këtë shkak sot është deklaruar Drejtori i Institutit Kombëtar të Shëndetësisë Publike, Naser Ramadani.

“Rezultatet laboratorike që kanë dalë sot flasin për momentin se nuk kemi asnjë pistë të helmimit hidrik. Por, kjo nuk do të thotë se nuk ka infeksione hidrike. Por, kjo do të dal pas analizave permanente si të ujit ashtu edhe të analizave të pacientëve. Do të informohemi me kohë,” tha Ramadani duke shtuar:

“Të gjitha infeksionet që kanë të bëjnë qoftë me rrugë hidrike, ushqim apo infeksione të tjera janë nën monitorim. Gjithashtu është në hulumtim edhe çështja e ujësjellësit dhe furnizimit me ujë të pijes i cili në vazhdimësi po monitorohet për cilësinë e ujit të pijes”.

Ndërkohë Ministri i Shëndetësisë, Arben Vitia, pasi u takua me kryetarin e komunës Deçan, Bashkim Ramosaj, tha se dy raste e vdekjes në Deçan nuk kanë të bëjnë me helmimet e fundit që kanë ndodhur në këtë komunë.

“Dy rastet e vdekjes nuk kanë të bëjnë fare për me situatën aktuale, me situatën e krijuar,” tha Arben Vitia.

Dy vdekjet e dyshimta janë konfirmuar edhe nga Prokuroria Themelore e Pejës. Zëdhënësi i kësaj prokurorie, Shkodran Nikqi, tha se prokuroria ka kërkuar që të bëhet obduksioni i dy trupave të pa jetë për të kuptuar shkaktarët e vërtetë të vdekjes së tyre.

 “Për shkak të situatës së krijuar në Deçan, prokurori ka urdhëruar që dy trupat të dërgohen në Institutin e Mjekësisë Ligjore, për  obduksion, për të kuptuar më shumë rreth shkaqeve të vdekjes. Gjithashtu, Prokuroria Themelore e Pejës, në bashkëpunim me Policinë e Kosovës, janë duke ndërmarrë të gjitha veprimet e nevojshme, për shkak të situatës së krijuar, ku qindra qytetarë kanë kërkuar ndihmë pasi kanë simptoma të helmimit,” tha Nikqi duke shtuar se prokuroria ka filluar grumbullimin e provave për hetimin e rastit të helmimit të qytetarëve nga Deçani. E, drejtori i shëndetësisë në këtë komunë, Musë Berisha, thotë se dy të vdekurit dyshohet se kanë patur probleme kardiake.

Musë Berisha tha se Komuna e Deçanit ka shpallur sot gjendje emergjente, pasi edhe gjatë 24 orëve të fundit qytetarë të shumtë kanë kërkuar ndihmë mjekësore.

 “Gjatë natës ka pasur fluks të madh të qytetarëve, të cilët janë me të njëjtat simptoma me të ditëve të më parshme. Janë simptoma mbase të helmimit, por ende nuk është vërtetuar. Institucionet kompetente kanë marrë mostrat e ujit dhe ne po presim për të kuptuar se nga ka ardhë kjo situatë. Të gjitha institucionet në Deçan janë në nivel të përgjegjësisë së tyre, sidomos shëndetësia, e cila  është angazhuar maksimalisht për t’i dalë në ndihmë qytetarëve të helmuar,” sqaroi Drejtori i Shëndetësisë në komunën e Deçanit, Musë Berisha, duke siguruar se janë mobilizuar për tejkalimin e situatës së helmimit të qindra qytetarëve ndërsa janë në pritje të rezultateve finale të mostrave bakteriale të ujit nga Instituti Kombëtar i Shëndetit Publik në Kosovë.