Presidentja e Kosovës: Do t’i kundërshtojmë ata që synojnë destabilizimin e rajonit

Me përkrahjen e SHBA dhe Gjermanisë Ne do t’i kundërshtojmë fuqishmë ata që përpiqen ta destabilizojnë rajonin tonë, tha Presidentja e Kosovës, Vjosa Osmani, duke falenderuar presidentin amerikan Joe Biden dhe kancelaren Angela Merkel për mesazhin e përbashkët që dhanë nga Washingtoni në përkrahje të Ballkanit Perëndimor për integrim në Bashkimin Evropian.

“Faleminderit presidentit të ShBA-së, Joe Biden dhe kancelares Merkel për dërgimin e mesazhit të qartë të mbështetjes për integrimin e Ballkanit Perëndimor në BE në deklaratën e tyre të përbashkët,” u shpreh Vjosa Osmani përmes rrjetit social Twitter duke përfunduar:

“Me përkrahjen tuaj, ne do t’i kundërshtojmë fuqishmë ata që përpiqen ta destabilizojnë rajonin tonë.”

Ndryshe, Shtetet e Bashkuara dhe Gjermania do të qëndrojnë së bashku kundër agresionit rus, tha presidenti amerikan, Joe Biden, në takimin lamtumirës në Washington me kancelaren gjermane, Angela Merkel.