“Dita e Lirisë”, Britania heq kufizimet kundër koronavirusit

Sot Britania e Madhe ka hequr gati të gjitha kufizimet për koronavirusin ndonëse numri i të infektuarve u është afruar niveleve rekorde, për shkak të variantit Delta, duke e konsideruar dhe si Ditën e lirisë.

Kështu, duke filluar prej sot në Britani nuk do të ketë kufizime se sa persona mund të takohen dhe të jenë pjesë e organizimeve, përfshirë klubet e natës ndërsa vendosja e maskës do të rekomandohet në disa hapësira edhe pse nuk do të kërkohet me ligj.

Kryeministri Boris Johnson përmes rrjetit social Twitter është shprehur se tani është momenti i duhur për të jetësuar fazën finale të heqjes së masave.

“Nëse nuk bëjmë diçka të tillë tani, ne duhet ta pyesim veten se kur do ta bëjmë? Mirëpo duhet ta bëjmë këtë gjë me kujdes. Duhet ta kujtojmë se virusi është ende me ne. Numri i të infektuarve po rritet, po e shohim variantin jashtëzakonisht ngjitës Delta,” tha Johnson duke iu drejtuar qytetarëve.

Ndryshe, Britania e Madhe është duke regjistruar mbi 50.000 raste të infektimit në ditë. Johnson e arsyetoi rihapjen përkundër rritjes së numrit të të infektuarve, me faktin se tani është koha që ekonomia të rihapet pasi gati 90 për qind e popullsisë së rritur ka marrë të paktën një dozë të vaksinës, ndërsa 68 për qind të dyja dozat.

Ndërkohë Qeveria britanike është shprehur se vaksinat kanë shkëputur lidhjen në mes të virusit dhe personave të shtrirë në spitale, si dhe numrin e vdekjeve.

Varianti Delta, i identifikuar fillimisht në Indi, në gjithë globin është duke shkaktuar rritje të numrit të infektimit dhe është duke rrezikuar rikthimin e masave për parandalimin e përhapjes në disa vende.