Parlamenti dështon në ratifikimin e Marrëveshjeve Ndërkombëtare

Në mungesë të kuorumit për vendimmarrje meqë kërkohen 2/3 e votave Parlameti i Kosovës ka dështuar të votoj ratifikimin e Marrëveshjes ndërkombëtare me Bankën Evropiane për Investime, BEI, për financimin e Projektit për rehabilitimin e linjës hekurudhore 10.

Edhe pse ishin të pranishëm 93 deputetë, vetëm 71 votuan për dhe asnjë kundër. Në këtë situatë, kryesuesja e seancës, Saranda Bogujevci tha se meqë kërkohet 2/3 e deputetëve të Parlamentit kjo pikë shtyhet deri në plotësimin e kushteve për votim.

Bogujevci edhe për tri projektligje të tjera për ratifikim propozoi që mos të shqyrtohen pa prezencën ministrave përkatës dhe derisa të krijohen kushtet për votim.

Bogujevci: Nuk kemi kuorum, shtyhen për votim…

“Tani nuk I kemi pjesën e ministrave për prezantimin e këtyre pikave, por siç po duket nuk ka edhe kuorum për vendimmarrje, unë kisha propozu që tri pikat e radhës që do t’i lexoj tani, t’i shtyjmë për më vonë kur krijohen kushtet për prezantim por edhe për votim,” tha Saranda Bogujevci duke lexuar marrëveshjet në fjalë:

-Projektligjit për amendamentimin 02 të Marrëveshjes bilaterale ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut për Projektin e bashkëpunimit për zhvillim “KSV/017: Programi për mbështetje shëndetësore (pjesa II);

-Shqyrtimi i Projektligjit nr.08/L-008 për ratifikimin e Marrëveshjes së bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Agjencisë Austriake për Zhvillim për zbatimin e Projektit “Hulumtimi dhe shkencat e aplikuara në arsimin e lartë + (HERAS+) (ada numri referues 8116-00-2020);

-Shqyrtimi i Projektligjit nr.08/L-009 për ratifikimin e amendamentimit nr.1 të Marrëveshjes kornizë së kredisë të datës 14 gusht 2020, ndërmjet Republikës së Kosovës, e përfaqësuar nga Ministria e Financave, Punës dhe Transfereve, dhe Bankës Zhvillimore të Këshillit të Evropës për financimin e projektit “Reagimi Emergjent ndaj COVID-19.