Komiteti i Ekspertëve: Muzika deri në orën 23:00. Masat tjera Anticovid mbeten në fuqi!

Komiteti i Ekspertëve foli për situatën epidemiologjike, gjendjen në spitalet covid dhe incidencën dy javore për të cilën tha se është e mirë ashtu si dhe vijmësia e procesit të vaksinimit, por masat për parandalimin e përhapjes së koronavirusit mbeten të pandryshuara me përjashtim të zgjatjes së orarit të lejimit të muzikës deri në orën 23:00.

“Komiteti i Ekspertëve, duke u bazuar në të dhënat e hetimit epidemiologjik për rastet e infektuara, duke u bazuar dhe në vijimësinë e procesit të vaksinimit si dhe vaksinimin masiv si një nga elementët kryesorë të mbrojtjes nga infeksioni, propozon zgjatjen e orarit të lejuar të muzikës nga 22:00 që e kemi patur, në orën 23:00. Ndërsa masat e tjera vazhdojnë të mbeten në fuqi, siç kanë qenë më pare dhe që kanë hyrë në fuqi në datën 1 korrik të vitit 2021,” tha Zv/Ministrja e Shëndetësisë, Mira Rakacolli  ndërsa për të shtruarit në pavione tha se janë  me moshë mesatare mbi 65 vjeç dhe mosvaksinimi është arsyeja kryesore që këta të infektuar po shfaqin  simptoma të rënda.

Duke folur për situatën epidemiologjike, Drejtorja e ISHP-së, Albana Fico, tha se incidenca dy javore për periudhën 5-18 korrik është 5 për 100 mijë banorë.

“Ka një rritje të lehtë të mesatares së rasteve pozitive të reja ditore nga 8 në 13. Numri i rasteve aktive është rritur në 156 krahasuar me 137. Ndërkohë që ka një zbritje të numrit të bashkive të prekura, nga 10 në 9. Raporti i infeksionit femra-meshkuj është 52-48 %.  Mbetemi në incidencë 5 për 100 mijë banor. Bashkitë e prekura nga 10 në 9, të shtruar në spital janë 5 pacientë dhe nuk ka asnjë në reanimacion. Nnumri i vdekjeve ka qenë 0 për ditë me radhë, Raporti i fataliteteve mbetet konstant 1.9%,” tha Albana Fico duke shtuar se ka një rritje të lehtë të pozitivitetit të mostrës.

Gjithsesi pjesë e rëndësishme është edhe aplikimi i vaksinave.

“Duke qënë se jemi në javën e vaksinimit masiv, apeloj qytetarët për të aplikuar të kryejnë vaksinën në qendrat e përcaktuara. Të mos harrojmë se situata në vende të Evropës ka pësuar ndryshime me rritje të numrit të infektimeve. Në Shqipëri nuk kemi referenca nga laboratori në Gjermani, pavarësisht raseve të pazakonta. Është e rëndësishme që përtej vaksinimit të shohim me përparësi e të respektojmë masat e vendosura nga autoritetet shëndetësore,” tha Drejtorja e ISHP-së, Albana Fico.