Zgjedhjet e 25 prillit, KQZ: Partitë që nuk kaluan pragun 1%, nuk përfitojnë kompensim financiar

Vlera e një vote të vlefshme është 85 lekë të reja ndërkohë partitë që nuk kanë kaluar pragun 1% në zgjedhjet e 25 prillit, nuk do të përfitojë kompensim financiar. Kështu bëri të ditur Ilirjan Celibashi pas mbledhjes së Komisionit Qendror të Zgjedhjeve duke shtuar se nga kalkulimet e bëra nga KQZ, rezulton që 106 parti, nga 131 gjithsej e kanë dorëzuar bilancin e partive politike; Partitë që nuk e kanë dorëzuar këtë raport, u vendos masa 1milion lekë gjobë ndërsa 4 partitë që e kanë dorëzuar bilancin jashtë afatit, u gjobitën me 15.000 lekë.

“Vlera në para të një vote të vlefshme është 85 lekë. Ky vendim hy në fuqi menjëherë. Pika e dytë ka të bëjë me kompensimin financiar pas zgjedhor. Partitë Politike që kanë qenë të regjistruara si subjekte zgjedhore kanë përfituar fonde paradhënie, për zgjedhjet e 25 prillit, janë 10 parti politike. Që një parti pas zgjedhjeve të kompensohet duhet të kalojë këtë 1 %,” sqaroi Ilirjan Celibashi duke saktësuar se nga fondi prej 130 mln lekësh, PS përfiton 48.6%, PD 39.4%, LSI 6.8% dhe PSD 2.2% ndërsa shtoi:

“Partitë që nuk kanë përfituar fonde janë tre, Partia Agrare Ambientaliste, Partia Lëvizja Legalitetit dhe Partia Bashkimi për të Drejtat e Njeriut. Këto tre parti duhet të kalonin 1%-in, asnjë nuk e kaluar të merrte mbi 15 mijë vota. Për këtë arsye nuk kompesohen. Bazuar në nenin 19 në shkronjën K dhe M, vendos të mos shpërndajë kompensimin financiar pas zgjedhorë për asnjë parti politike pjesëmarrëse në zgjedhjet e 25 prillit. Ky vendim hy në fuqi menjëherë, e kundër këtij vendimi mund të bëhet ankesë në KAS.

Janë 106 parti të cilat nuk kanë dorëzuar raportet financiare brenda afatit, edhe në momentet që flasim nuk e kanë dorëzuar. 4 prej këtyre e kanë dorëzuar, por pas afatit. Ne vendosim gjobë në masën 1 mln lekë për partitë ;politike që nuk kanë dorëzuar raportin financiar. Gjobë në masën 15 mijë lekë për partitë politike që e kanë dorëzuar raportin pas afatit të caktuar.”